QARANCHÖ YACHATSIKÏPITA | JEHOVÄPA TESTÏGUNKUNAPITA MANA MUSYANQËKI
¿Imanirtaq yachatsikuyan?
Diospita yachatsikuyanqäpitam reqishqa kayä. Wayin wayin, nunakuna mas puriyanqan sitiukunachö y më tsëchöpis yachatsikuyämi. ¿Imanirtaq yachatsikuyä?
Jehoväpa testïgunkunaqa yachatsikuyä Diosta alabayänäpaq y jutinta reqitsikuyänäpaqmi (Hebrëus 13:15, NM). ‘Jinantin nasioncunapa ewar, noqaman creyicuyänanpaq nunacunata willapäyanqui, yachatsiyashqaqcunata yachatsiyanqui pecunapis alli cäsucoq cayänanpaq’ nir Cristu mandakunqantam wiyakuyä (Mateu 28:19, 20).
Jina nuna mayïkunata kuyarninmi yachatsikuyä (Mateu 22:39). Musyayämi cada nunapa creenciankuna kayäpunqanta y wakinqa yachatsikuyanqäkunata wiyëta mana munayanqantapis. Peru Bibliapa yachatsikïninkuna nunakunapa kawëninta salvëta puëdinqantam següru kayä. Tsëmi kallpata qoyäman punta cristiänukuna rurayanqänölla, Diospa alli willakïninta cada junaq yachatsikuyänäpaq (Hëchus 5:41, 42).
Venezuëla nacionpa El Universal nishqan juk periödicunchömi, juk estudiösu nuna Antonio Cova Maduro kënö nirqan: “Jehoväpa testïgunkunaqa alläpam kallpachakuyan, y Diospa Palabran entëru Patsaman chänanrëkurqa wanurpis wanuriyanmanmi”.
Publicacionnïkunata leyeqkunaqa manam llapantsu Testïgu kayan. Y juk religionkunapita millonyëpayan nunakunatam Bibliapita yachatsiyä, pëkunaqa juk Testïgu watukanqampitam agradecikuyan.
Itsa noqakunapita mas tapukïnikikuna kanraq. Respuestankunataqa tukïnöpam tarita puëdinki:
Jehoväpa testïgunkunata tapuri.
Internetchö jw.org/que neq päginaman yëkï.
Mëqan reunionnïkunallamampis ëwë. Debaldillam y llapankunam ëwëta puëdiyan.