¿Imanirtaq Diosqa pëman mañakunata munan?

Diosqa pëwan amïgu kanantsiktam munan

Piwampis amïgu kënintsiktaqa sinchiyätsintsik imëpis parlarmi. Jina Diospis pëwan parlar amïgu kanapaqmi invitamantsik. Tsëmi kënö nimantsik: “Qamkunam qayayämanki y shayämunki, y mañakayämunkim y noqam wiyayashqëki” (Jeremïas 29:12). Dioswan parlarmi pëman mas witishun, y pëpis noqantsikmanmi ‘witimunqa’ (Santiägu 4:8, NTCN). Bibliam kënö änimantsik: “Llapan qayakoqninkunapa lädunchömi Jehoväqa këkan” (Salmu 145:18). Pëman imëpis mas mañakunqantsikmi amïgu kanqantsikta sinchiyätsinqa.

Diosqa yanapamënintsiktam munan

Jesusqa kënömi nirqan: “¿Acasu meqequipis tsuriquicuna tantata mañayäshuptiqui, rumincu qoyanqui! Jina ¿acasu pescaduta mañayäshuptiqui, culebrancu qoycuyanqui! Si qamcuna [...] tsuriquicunata allicunata qoyanqui, sielucho quecaq Dios Yayanäqa mas alli carmi, mas allicunata qoyäshunqui mañacuyaptiqueqa” (Mateu 7:9-11). Awmi, Diosqa pëman mañakunantsiktam munan, porqui pëqa ‘yarparëkanmantsikmi’ y yanapamënintsiktam munan (1 Pëdru 5:7, NM). Y problëmantsik kanqan höra pëman mañakunapaqmi animamantsik. Bibliaqa nin: “Ama imapaqpis yarpacachäyëtsu, antis imano ecano carpis, Diosnintsicman ‘Grasias’ nicur mañaquicuyë” (Filipensis 4:6).

Nunakunaqa Diostam wanantsik

Estudiösukunaqa niyan, nunakuna Diosman mañakïta wananqantsiktam. Hasta Diosman mana creeqkunapis tsëtam rurayan.a Tsëmi rikätsikun, Kamakoq Diosnintsikman witinapaq munëyoq kamashqa kanqantsikta. Tsëchi Jesusqa nirqan, “kushishqam kayan Diosta wanar asheq kaqkunaqa” (Mateu 5:3, NM). Diosnintsikta kushitsinapaqqa seguïdum pëman mañakunantsik.

Amïgun kanapaq Dios invitamanqantsikta chaskikushqaqa, ¿imaraq pasakunqa?