¿Pitaq culpayoq sufrinantsikpaq?
Diosnintsik culpayoq mana këkaptinqa, ¿imataq o pitaq culpayoq? ¿Imanirtaq tsëtsika nunakuna mallaqëpita wanïkäyan y waktsa këkuyan? ¿Imanirtaq guërrakuna, tukïläya qeshyakuna y desgraciakuna pasakun? Diospa Palabran Bibliachömi willakun nunakuna imanir sufriyanqanta:
Chikinakuyaptin y mallaqashqa kayaptin. ‘Nunaqa nuna mayinta sufritsinanllapaqmi dominashqa’ (Eclesiastes 8:9). Mëtsikaqmi nuna mayinta chikipäyan y mana llakipëpa tratayan.
Mana pensayanqan hörachö imapis pasaptin. Bibliachömi willakun “mana pensayanqan hörachö” nunakunata imapis pasaptin sufriyanqanta (Eclesiastes 9:11). Mana cuidakunqantsikrëkur o imallapis mana alli yarqapamashqam, accidentikunaqa mëchö këkashqapis o imë hörachöpis pasaramashwan.
Llapan nunakunapa mana alli gobernantin. Bibliachömi willakun nunakuna sufriyanqampita pï culpayoq kanqanta, “mana cäsukoq nunakunaqa Satanaspa makinchömi këkäyan” ninmi (1 Juan 5:19). Diabluqa alläpa puëdeq mana rikakoq espïritum. Alli angel kashqa karpis, “manam rasumpa kaqchö tsarakurqantsu” (Juan 8:44). Wakin angelkunapis munëninkunata rurakuyänampaqmi, Satanasnölla Diospa contran churakäyarqan y tsëta rurarmi demoniukunaman tikrariyarqan (Genesis 6:1-5). Tsëpita patsëmi, Satanaswan demoniunkunaqa nunakunata pasëpa mana allikunata rurëkätsiyan, kanannäqa masran tsëta rurëkäyanqanqa rikakun. Diabluqa manam kushishqatsu këkan ‘entëru patsatam engañëkan’, tsëmi Bibliachöqa “¡allaw patsa y lamar!” nin (Revelacion 12:9, 12). Satanasqa manam pitapis llakipantsu y alläpa mana allim y nunakuna sufriyaqta rikarmi kushikun. Pëmi sufrinqantsikpitaqa culpayoq y manam Diostsu.
KËMAN PENSARI: Alläpa mana alli y shonqunnaqkunallam nunakunataqa sufritsiyan. Peru Bibliachöqa “Diosqa kuyakïmi” ninmi (1 Juan 4:8). Tsëmi Diosnintsikqa mana allikunataqa imëpis ruranmantsu (Job 34:10).
Tsëqa itsapis kënö tapukïkanki: “¿Imëyaqraq Diosnintsikqa Satanas gobernananta permitinqa?”. Rikärinqantsiknömi Diosqa mana alli rurëkunata chikin y noqantsik sufrishqaqa pëpis nanatsikunmi. Jinamampis Palabran Bibliam nimantsik llapan yarpachakïnintsikkunata pëta willanapaq, porqui pëqa noqantsikpaqmi yarpachakïkan (1 Pëdru 5:7). Diosnintsikqa alläpa puëdeqmi y alläpam kuyamantsik, tsëmi ichikllachöna sufrimientukunata y llapan mana allikunata ushakäratsimunqa, tsëpaqmi qateqninchö maslla yachakurinki.a
a Imanir alläpa sufrinqantsikpaq maslla yachakïta munarqa, ¡Manana wanurmi kushishqa kawakushun! neq libruchö 26 kaq yachakunëkipaq kaqta leyiri, kë librutaqa Jehoväpa testïgunkunam rurayämushqa. Jina jw.org/que päginapitam jorqëta puëdinki.