¿Imanötaq Bibliapita yachakushwan yanapamänapaq y gustamänapaq?

Josuëmi Ley qellqaranqan rölluta leyikan; Jericö perqakuna ishkirin, peru Rahabpa wayinqa ishkintsu; Josuëmi Jehoväman mañakurëkar makinta pallarin

ISRAEL naciontam Josuëqa Dios änikushqan Patsaman diriginan karqan. Peru tsëta rurananqa manam fäciltsu kanan karqan. Tsënö kaptimpis, Jehoväqa alli yarqapakunampaq kaqtam nirqan y valienti kanampaqmi animarirqan. Y Leyta cada junaq leyinampaq y ninqanmannö ruranampaqmi mandarqan. Tsëkunata ruraptinqa, llapan ruranqankunam alli yarqunan karqan (Jos. 1:7, 8).

Kë “ushanan junaqkunachöqa alläpa mana alli tiempukunachömi’ kawëkantsik, tsëmi llapantsikpis imëka mana allikunapa pasantsik (2 Tim. 3:1). Peru Josuëta Jehovä ninqannö Bibliata cada junaq leyirninqa, llapan ruranqantsikkunam alli yarqunqa y imëka problëmakuna kaptimpis allim tsarakushun.

Bibliapita yachakï alläpa precisaq kaptimpis, manam llapantsiktatsu gustamantsik. Y wakinnintsikqa manam imanö yachakunapaq kaqta musyantsiktsu. Tsëqa, ¿imataraq rurashwan Bibliapita yachakunqantsik yanapamänapaq y gustamänapaq? Tsëpaqqa “Këkunata rurë” nishqan recuadruchömi atska yanapakïkunata tarinki.

Salmus libruta qellqaqmi kënö nirqan: “Mandamientïki ninqannö kawanäpaq yanapamë, porqui mandakunqëkita cäsukurmi kushishqa sientikü” (Sal. 119:35). Noqantsikpis Diospa Palabrampitaqa kushishqa yachakïta puëdintsikmi. Yachakunqantsikmannömi precisaq yachatsikïkunata tarishun.

Noqantsikqa manam Josuënötsu precisaq carguta chaskishun, peru imëka problëmakunapam pasashun y tsëchöqa alleqmi tsarakunantsik. Tsëmi Josuë ruranqannö, Diospa Palabrampita alleq yachakunantsik y ninqankunata cäsukunantsik. Tsëta rurashqaqa, llapan ruranqantsikmi alli yarqapamäshun.

KËKUNATA RURË

Manaraq yachakur Diosman mañakï. Llapanta puëdeq Diosnintsikpa pensëninmi Bibliachöqa këkan, y biennintsikpaqmi tsë willakïkunataqa qellqatsimushqa. Tsëmi Biblia ninqanta entiendinapaq, yachakunqantsikta yarpänapaq y ninqannö kawanapaqqa, Diosman mañakunantsikraq alläpa precisan (Esd. 7:10).
Leyinqëki höra tapukïkunata rurakï. Bibliata o publicacionkunata leyinqëki höra kënö tapukï: “¿Imatataq Jehoväpita yachatsiman? ¿Imatataq Diospa Gobiernumpita yachatsiman? ¿Imanötaq wakin nunakunata yanapanäpaq utilizäman?”.
Yachakunqëkiman pensë. Leyikanqëki höra këkunaman pensë: “¿Imanötaq sientikü këkunata yachakur? ¿Imanirtaq tsënö sientikü? ¿Imanötaq unë yanapamanman karqan? ¿Imanötaq kanan yanapaman? ¿Imanötaq shamoq tiempuchö yanapamanqa? ¿Imanötaq Bibliapa consëjunkunata y allikunata ruranäpaq willakïkunata cäsuküman?” (Job 23:5; Sal. 49:3). Jina kënö pensë: “¿Puëdïku entienditsikïta Jehovä imanir wakin rurëkunata michäkunqanta, y consëjunkunata mana cäsukïqa imaman chätsikunqanta?” (Deut. 32:28, 29).
Tsëchö këkaqnö leyi. Bibliapa willakïninkunata leyirqa tsëchö këkaqnömi leyinantsik. Josëta wawqinkuna rantikuyanqan junaq ima pasakunqanman pensë (Gen. 37:18-28). Tsëchö llapan pasëkanqanta rikëkaqnö y wiyëkaqnö leyi, y nïkur kënö tapukï: “¿Imatataq pensëkäyan? ¿Imanötaq këkäyan?”. Tsëkunaman shumaq pensarnin leyirqa, tsëchö këkaqnömi sientikunki, y yachakunqëkipis masmi yanapashunki.
Yachakunapaq yanapakïkunata utilicë. Maslla yachakunapaqqa mëtsika yanapakïkunam kan. Idiömëkichö ima publicacionkuna kanqanta musyëta procurë, tsëtaqa tarinki Internet päginachö kar o imprimishqa publicacionkunachömi. Y tsëkunata utilicëta yachakunëkipaqqa ama mantsakïtsu yanapakïta ashita. Índice de las publicaciones Watch Tower y Jehoväpa testïgunkuna yanapakïta ashinapaq nishqan librukunachömi, atska yanapakïkunata tarinki y Bibliapa atska versïculunkunatam alleq entiendinki. Jina Diospa Palabrampita yachakunapaq yanapakïkuna neq follëtuchöqa, unë markakuna mëchö këkäyanqanta, imapis imë pasakunqanta, Biblia parlanqan pësukuna y medïdakuna kanan witsan ëka kanqanta y maskunatam yachakunki.
Mas precisaq kaqkunata yarpëta procurë. Tsëmi yanapashunki yachakunqëkita yarpänëkipaq. Y mas alliqa kanqa yachakunqëkipita wakinkunata parlapanqëkim. Tsëmi, “¿puëdïmanku Diospita yachatsikunqächö yachakunqäpita parlakurita?” nir tapunëki. Tsëta rurarqa mas precisaq kaq yachatsikïkunatam yarpanki, y wakinkunata yanapanëkipaqpis utilicëta puëdinkim.