Qowëki o warmiki jukwan ëwakuptin

WARMIKI o nunëki jukwan engañëkushuptikiqa, kawëniki chipyëpam cambiarin.a Wakinkunaqa majankunata perdonayashqam. Peru perdonashqa kar o mana perdonashqa karpis, mana engañakoq kaqmi masqa llakikun. Tsëpa pasashqa kaptikiqa, ¿imaraq yanapashunkiman mana alläpa llakïkunëkipaq?

DIOSPA PALABRANMI YANAPASHUNKI

Tsëkunapa pasaq kaqkunataqa, Diospa Palabranmi alläpa mana llakikuyänampaq yanapashqa. Bibliata leyirmi cuentata qokuyashqa, pëkunapaq Diosqa yarpachakunqanta y imapa pasëkäyanqanta alli musyanqanta (Malaquïas 2:13-16).

“Yarpachakïkuna alläpa llakitsimaptinmi, qamqa kuyakïwan shumaq shoqamarqëki” (Salmus 94:19).

Billmi kënö yarpan: “Kë textuta leyinqä höraqa, juk kuyakoq teytanö Jehovä shoqëkämanqantam sienteq kä”.

“Imëpis qamllata sirwishoqniki kaqtaqa manam jaqinkitsu” (Salmus 18:25).

Carmentaqa, atska killapam qowan juk warmiwan engañashqa karqan. Tsëmi Carmen kënö nin: “Qowä juk warmirëkur jaqimashqa kaptimpis, Jehoväqa manam imëpis jaqimanqatsu”.

“Ama imapaqpis yarpachakur kayëtsu, sinöqa imëkachöpis mañakurnin y rogakurnin [...] yarpachakïnikikunata Diosta musyatsiyë; tsëqa imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filipensis 4:6, 7).

Sasham kënö willakun: “Kutin kutinmi kë textuta leyeq kä. Y Diosman seguïdu mañakurmi yamëna sientikoq kä”.

Kë yachatsikïchö parlanqantsik nunakunaqa llakishqallana kawakuyänampaq kaqtam pensayarqan, peru Jehoväman confiakuyanqan y Bibliata leyiyanqanmi yanaparqan. Billmi kënö nin: “Llapan rurëta munanqäkuna manana rurakänampaq kaqta pensëkaptïmi, Diosman markäkunqäqa alläpa yanapamarqan. Juk tiempupaqa, imëka ‘paqaschö pureqnömi’ ima rurëtapis musyarqätsu, peru Diosqa manam jaqimarqantsu” (Salmus 23:4).