Mana wanushpa kawakïtaqa llapantsikmi puëdintsik

DIOSNINTSIKQA manam munarqantsu kanannö kawanantsikta. Pëqa munarqan Patsachö kaqkuna mandakunqanta cäsukur alli kawakuyänanta y pënölla allikunata rurar kayänantam. Jina yamë kawakuyänanta, familiayoq karnin kushishqa kayänanta, imëkata yachakuyänanta y Patsata juk shumaq huertaman tikratsiyänantam munarqan.

DIOSQA ÄNIMANTSIK QALLANANCHÖ MUNANQANNÖ KUSHISHQA KAWAKÏTAM

• “Patsapa juk kuchumpita hasta juknin kuchunyaqmi guërrakunata ushakätsimunqa” (Salmus 46:9).

• “Dispunishqa tiempum chäramurqan [...] patsata ushakëkätseqkunata ushakätsinëkipaq” (Revelacion 11:18).

• “Manam ni pï ninqanatsu: ‘Qeshyämi’” (Isaïas 33:24).

• “Akrashqäkunaqa makinkunawan llapan rurayanqantam kikinkuna utilizäyanqa” (Isaïas 65:22).

¿Imanötaq kë änikïkunata Jehovä Dios cumplimunqa? Gobiernunwanmi. Y tsëchö mandakamunampaqmi tsurin Jesucristuta rey kanampaq churashqa. Jesusqa ciëlupita patsëmi jinantin Patsata mandakamunqa (Daniel 2:44). Jina Bibliachöqa kënömi nin: “Gobiernunqa manam ni imëpis ushakanqatsu” (Lücas 1:32, 33).

Kë Patsachö kawanqan witsan Jesus milagrukunata ruranqanqa, mandakamunqan witsan imëka allikunata ruramunampaq kaqtam rikätsimantsik.

CÄSUKOQ NUNAKUNAPAQ IMATA RURANAMPAQ KAQTAM JESUSQA RIKÄTSIKURQAN

• Tukï cläsi qeshyayoq kaqkunata kachakätsirmi, qeshyakunata chipyëpa ushakätsita puëdinqanta rikätsikurqan (Mateu 9:35).

• Llutëpa y feyupa vientuta päratsirninmi, patsa kuyïkuna y imëka mana allikuna manana kanampaq kaqta rikätsikurqan (Marcus 4:36-39).

• Waranqëpayan nunakunata pachan qararninmi, imapis mana pishinampaq kaqta rikätsikurqan (Marcus 6:41-44).

• Juk casakïchö yakuta vïnuman tikratsirmi, mandakamunqan witsan kushishqa kawanapaq kaqta rikätsikurqan (Juan 2:7-11).

Diosnintsik änikunqannö kushishqa kawakïta munarqa, ¿imatataq ruranëki? Juk “näni” cuentapam ëwanëki. Diospa Palabranchöqa nimantsik, tsë näniqa “kawëman chätsikoq” näni kanqanta y wallkaqlla tsë nänita tariyanqantam (Mateu 7:14).

MANA WANUSHPA KAWËMAN CHÄTSIKOQ NÄNI

¿Imataq mana wanushpa kawëman chätsikoq näniqa? Tsë näniqa Diosnintsik mandamanqantsikkunata cäsukïmi. Pëmi kënö nimantsik: “Noqam Jehovä Diosniki kä, kikikipa biennikipaq yachatsishoqniki, y alli nänipa ëwanëkipaq pushashoqniki” (Isaïas 48:17). Diosnintsik mandamanqantsiknö kawakïmi mas alliqa.

Jesusmi kënö nirqan: “Noqam näni, rasumpa kaq y kawë kä” (Juan 14:6). Diosman mas witinapaq y mas alli kawakunapaqqa, Jesus yachatsimanqantsiktam wiyakunantsik y ruranqannöllam imatapis ruranantsik.

¿Imanötaq tsë nänita tarinkiman? Näni cuenta mëtsika religionkuna kayaptinmi, Jesusqa kënö willakurqan: “Manam llapan ‘Señor, Señor’ nimaqnïtsu ciëluchö Gobiernuman yëkunqa, sinöqa ciëluchö këkaq Teytäpa munëninta ruraq kaqllam” (Mateu 7:21). Jina kënömi nirqan: “Rurëninkunapitam pëkunataqa reqiyanki” (Mateu 7:16). Mëqan mas alli religion kanqanta musyanëkipaqqa, Diospa Palabranmi yanapashunki (Juan 17:17).

¿Imatataq ruranëki tsë nänipa purinëkipaq? Kamamaqnintsiktam alli reqinëki. Pï kanqanta, jutin ima kanqanta, imanö Dios kanqanta, imakunata rurëkanqanta y noqantsikpita imata shuyaranqantam alli musyanëki.a

Diosqa manam munantsu trabajarninlla, mikurninlla, kushikunapaq imëkata rurarninlla y familiayoq karninlla kanata. Tsëpa rantinqa, amïgun kanapaq alli reqinantsiktam munan. Tsëmi Jesus kënö nirqan: “Këmi imëyaqpis kawakïman chätsikun, qam japallan rasumpa kaq Diosta reqikäyäshunqëki” (Juan 17:3). Mandamanqantsikta rurarninqa, Diosnintsikta shonqupita kuyanqantsiktam rikätsikushun.

DIOSPITA YACHAKURMI QALLANËKI

Diosnintsikpa shonqumpaqnö kanëkipaqqa, jukläya nuna kanëkipaqmi kallpachakunëki. Dios mandamanqantsikta cäsukï mana puëdipaqnö kaptimpis, yachakur qallëkurninqa imanö yanapashunqëkitam rikanki. Diospita maslla yachakïta munarqa, Internetchö jw.org päginäkunaman yëkuri. Jehoväpa testïgunkunaqa munanqëki höram mëmampis watukariyäshunki.