Wakinkunata yanapashun Diospa amigun kayänampaq
1 Kananmi llapan naciompita nunakuna yachakïkayan Jehovapa nänimpita (Isa. 2:2, 3). ‘Aguantarnin alli wayuyänampaqqa’, precisum Jehovata kuyayanan (Luc. 8:15; Mar. 12:30). Kë kuyaki mana kaptenqa, manam kallpankuna kanqatsu kë mundupa mana alli poderninkunata aguantayänampaq, ni alli kaqta rurayänampaqpis. Jehovapa shumaq kuyakïninta rikätsinqantsikmi, yanapanqa estudiantikunata Jehovata kuyayänampaq. Tsemi, yanapashun alleq pensayänampaq Acerquémonos a Jehová nishqan libru leyiyanqanman.
2 Rurënikikuna: Ruranqekita rikäyanqanmi estudiantikunata yanapanqa. Jehovawan kuyanaki qampaq precisu kanqanta rikarmi y imano kawenikicho yanapashunqekita rikarninmi, pekunapis qamno Jehová kuyeta munayanqa (Luc. 6:40). Nenqantsikpitapis masmi yachakuyanqa, ruranqantsikkunata rikämarnintsikqa.
3 Papäkuna wambrankunata yachatsiyänampaqqa, kikinkunam alli ejempluta churayanan (Deu. 6:4-9). Huk matrimonium, wambrankunata Jehovapita yachatsi munëwan, mañakuyarqan consejukunata wakin papäkunata. Kenomi ollqu kaq nerqan: “llapan parlanqa nunakunam niyämarqan, papakunapa alli ejemplunkunam precisuqa”. Llapan kawëninkunacho alli kaqta rurarmi alli ejempluta qoyanqa, wambrakuna rikäyanampaq ima ninanmi “Jehovapa amigun” keqa (Sant. 2:23).
4 Llapan shonquwan oraki: Hina yanapantsikmi wakinkunata Jehovapa amigun kayänampaq, shonqupita orakita yachatsir. Yachatsishwanmi Jesús yachatsimanqantsik oracionta y wakin shumaq sentimientuyoq oracionkunatapis Bibliacho kaqta (Mat. 6:9, 10). Kikintsik orakonqantsikwanmi yachatsishun wambrantsikkunata y estudiantikunata orakuyänampaq, shonqupita orakunqantsikta wiyarmi, rikäyanqa Jehovata kuyanqantsikta. Pruebakunacho kayaptenqa animë seguidu orakuyänampaq (Rom. 12:12). Menestiyanqan hora Jehovapa yanapakïninta chaskirmi, yachakuyanqa Jehovaman más confieta y kuyeta huk razumpa amigutano (Sal. 34:8; Fili. 4:6, 7).