Llapanmi yanapakuyanman Jesuspa qateqnin këman chäyanampaq
1 Kikintsikllapitaqa manam huk nuna Jesuspa qateqnin këman chanmantsu. Jehovaqa inshinmanmi “yanapaqninkunata”, Bibliapita tsëraq yachakïkaqkuna alli winayänampaq espiritual kaqcho (1 Cor. 3:6-9). Tsëraq yachakïkaqkunataqa yanapantsik manam reunioncho comentarllatsu, alli portakïnintsikwampismi, tsënömi rikätsikuntsik Diospa espiritun kawënintsikcho kanqanta (Juan 13:35; Gál. 5:22, 23; Efe. 4:22, 23). ¿Imataraq hina rurashwan tsëraq yachakïkaqkunata yanapanapaq?
2 Llapan congregacioncho kaqkunam yanapakunantsik: Llapantsikmi, tsëraq yachakur qallëkaqkunata witipashwan saludarinapaq, shumaq parlapärinapaq manaraq reunión qallaptin y ushariptimpis. Congregacionman tsëraq chanqanta yarpärirmi huk nuna këno nerqan: “Huk hunaqllachömi reqirerqä atska kuyayämaq nunakunata, punta iglesiacho wambra këkaptï reqenqakunapitapis, pëkunataqa manam reqirqätsu. Këchömi käyirerqä rasumpa kaq yachatsiki tarinqäta”. Kë nunaqa bautizakurinaq reunionman ewar qallarenqampita qanchis killallachömi.
3 Espiritual kaqcho alli winëkaqkunata shumaq felicitäri. ¿Allitsuraq tsarakïkan chikikäyaptimpis? ¿Ewëkanku llapan reunionkunaman? ¿Kallpachakuntsuraq reunioncho comentanampaq? ¿Escuela del Ministerio Teocrático nishqanman matriculäkushqanatsuraq o willapäkur yarqur qallashqanatsuraq? Allim Jehovapaq kallpachakïkanki ninëkim. Tsëmi yanapanqa más allita ruranampaq y kallpatapis tarinampaq (Pro. 25:11).
4 Bibliapita yachatsikoqno: Wakin testigokunaqa yanapayashqa tsëraq yachakïkaqkunata, wakin publicadorkunawan yachatseq ewarninmi, tsënöpa congregacioncho kaqkunawan reqinakuyänampaq. Visitar qallarirnenqa estudiantekunata invitanëkim reunionkunaman shayämunampaq. Reunionkunaman shamur qallëkuptin llapanta reqitsï. ¿Cigarro shoqïta haqinampaq kallpachakïkanku? ¿Kantsuraq wayinchö pillapis, yachakïkanqampita chikikoq? Kayanmi wawqi panikuna congregacioncho problema pasashqakuna, pëkunawan parlariptenqa yanaparinmanmi (1 Ped. 5:9).
5 Tsëraq yachakïkaqkunaqa, wanayanmi llapan congregacioncho kaq yanapayänanta. Llapantsikmi yanapakushwan shumaq parlaparnin, tsëraq yachakïkaqkuna espiritual kaqcho alli winayänampaq.