Wambrantsikkunata yachatsishun Jehovata alabayänampaq
1. ¿Jehovata alabayanmanku jovenkuna?
1 Salmo 148:12, 13 textochömi, jovenkunata nin ‘Jehovapa shutinta alabayänampaq’. Bibliachöqa willakunmi allita ruraq atska jovenkunapaq. “Samuelqa wambra kanqampitam servikänaq Jehovapa puntancho” (1 Sam. 2:18). Hina “huk warmi wambram” nerqan Naamanpa warminta, Israelchö Jehovapa profetan kanqanta, qowampa lepra qeshyëninta kachakätsinampaq (2 Rey. 5:1-3). Jesús temploman yëkurir milagrokunata rurëkuptinmi, hina tsëchö këkaq “wambrakuna” qayariyarqan: “¡Salva mañakulläyämi Davidpa tsurinta!” (Mat. 21:15). ¿Imanöraq teyta mamakuna yachatsiyanman wambrankunata Jehovata alabayänampaq?
2. ¿Imanirtaq alli, wambrakuna rikäyänan teyta mamankuna Jehovata kuyayanqanta?
2 Teyta mamakunapa rurënin: Rasumpa kaqta wambrankunata manaraq yachatsirmi, Israelchö kikin teyta kaqkuna, kuyayanman karqan llapan shonqunkunawan Jehová Diosta y leyninkunata (Deu. 6:5-9). Teyta mamakuna willapäkipaq allita parlayaptin y imëpis llapan semanakuna yarquyaptenqa, wambrakuna rikäyanqam willapäki shumaq y alli kanqanta.
3. ¿Imanötan huk panita yanaparqan teytanwan maman rurayanqan?
3 Huk panim kushishqa këta yarpan: “Wambrallaraq këkaptïmi willapäkoq yarquyaq kayä familiäwan llapan semana ushëkuna. Teytä mamäwan alläpa kushishqam kayaq willapäkur. Willapäkïta shumaqta rikarmi winayarqäpis”. Kë paniqa qanchis watayoqllaraq këkarmi publicadora no bautizada këman charqan, kananqa treinta y dos watanam servikan precursorano.
4. ¿Imakunatayanraq rurashwan wambrakunata yachatsinapaq?
4 Imëpis yachatsi: Teyta mamakuna, wambrëkikuna imallachöpis yanapayäshï willapäkoq yarquyaptiki. Itsa punkullatapis takakuyanman o tratadollatapis qarakuyanman o huk textollatapis leirapuyanman. Tsënöpam Reinopita willapäkuyanqa kushishqa mana mantsakushpa. Hina winayanqanmannömi willapäkïnimpis miranman. Tsëmi, yanapë Jehovapa kaqcho más rurëta munanampaq.
5. ¿Imakunataraq huk wambra ruranman publicador no bautizado këman chänampaq?
5 Kikinkuna publicador këta munëkäyanqanta niyäshuptiki y publicadorpaqnöna wambrëkikunata rikarqa, ancianokunawan parlë. Publicador këmi wambrakunata yarpätsenqa Jehovata alabayänampaq. Yarpäye, wambrakunaqa manam yashqa nunakunanöraqtsu yachayänan publicador kayänampaq. ¿Bibliapa más reqishqa kaq yachatsikïninta käyinku? ¿Bibliapa alli leynin nenqannöku kawëkan? ¿Willapäkiman yarqita y Jehovapa testigonno reqishqa këta munanku? Tsënö kaptenqa, ancianokuna käyiyanqam alli këkanqanta publicador no bautizado këman chänampaq (rikäri Organizados para hacer la voluntad de Jehová, págs. 79-82).
6. ¿Imanirtaq alläpa alli teyta mamakuna wambrankunata yachatsiyanqan?
6 Jehovata alabayänampaq wambrakunata yachatsiqa sasaraqmi. Tsënö kaptimpis, wambrankuna espiritual kaqcho qeshpiyaptenqa teyta mamakuna alläpa kushishqam kayanqa. Tsëpitapis masqa Jehovami kushikonqa wambrakuna Pëpita willapäkuyaptin.