“Willapäkunapaqmi huk hatun punku kicharëkan”, ¿yëkushwantsuraq?
1. Willapäkunapaq, ¿ima hatun punkuraq noqantsikpaq kichakäramushqa?
1 Pablo willapäkunampaq ‘huk hatun punku kichakärapuptinmi’, hinan hora kallpachakorqan chikikäyaptimpis Reinopaq willapäkurnin (1 Cor. 16:9). Kanan tiempontsikchöpis 642.000 publicadorkuna Reinopita willapäkurnin hatun punkupa yëkuyashqa precursor regular karnin.
2. ¿Imanir-raq tiempontsikta, kawënintsikta y imanö kanqantsiktapis rikashwan?
2 Kawënintsikkuna hukläyamanmi tumakan: Itsa horaqa Jehovapaq atska rurëta munarpis qeshyapäkuntsik, tiempota tarintsiktsu, pero manam tsënöllatsu llapan tiempochö kawakuntsik. Tsëmi horaqa imanö këkanqantsiktapis alli rikänantsik y manam shuyarashwantsu allilla kawakïtaqa (Ecl. 11:4). ¿Colegiota ushëkaq jovenku kanki? ¿Wambrëkikuna escuelaman ewayanqanaku? ¿Uryanqëkipita jubilakunkinaku? Këkuna pasaptinmi tiempota tarinki precursor regular kanëkipaq. Huk panim, qeshyapäkonqampita alliyärir precursora këman charqan 89 watayoq këkar. ¿Imanir? Huk watana hospitalman manana ewarninnam, pensarerqan precursora kanampaq, qeshyanqampita ichik alliyärishqana karnin.
3. ¿Imakunatayanraq rurayashqa wakin wawqi panikuna precursor kayänampaq?
3 Huk kutim, Pablo Corintocho wawqikunata watukëta munarqan, pero willapäkunanrëkurmi tsë markapa ewarqannatsu. Kanan tiempontsikchöpis atska wawqi panikunam alli arreglokunata rurayashqa precursor kayänampaq. Wakinkunaqa pullan hunaqyaqllam uryayan y gastonkunatam mermätsiyashqa, tsënö këkarnimpis allim kawayan. Kananqa kushishqam Jehovapita willapäkurnin puriyan (1 Tim. 6:6-8). Wakin casadokunanam arreglota rurayashqa huknin kaqlla uryanampaq, tsënöpa warmi kaq precursora kanampaq.
4. ¿Imakunataraq rurashwan precursor regular këta mana puederqa?
4 Ama precursor këtaqa mantsapäshuntsu, mañakuyanqan höramanqa manachi chätsëmantsu nishpa. Hunaqchö ishkë hörapitapis masllatam ruranëki. ¿Precursor regular këta mantsakuntsikku? Tsëpenqa precursor auxiliar këta tïrashun huk o ishkë killallapis, 70 höraman chëta kallpachakur. Tsënöpam musyashun precursorkunapa kushikïninta (Sal. 34:8). Wakin precursorkunawan parlashun; itsa pëkunapapis noqantsikpano sasa kawëninkuna kashqa (Pro. 15:22). Jehovata mañakushun willapäkïnintsikta miratsita munanqantsikcho bendecimänantsikpaq (1 Juan 5:14).
5. ¿Imanirtaq precursor regular kanëkipaq kallpachakunkiman?
5 Kë rurëqa alläpa allim kanqa: Precursor regularqa atska bendiciontam chaskin. Precursor karmi kushishqa kawakun nuna mayinkunata alli yanaparnin (Hech. 20:35). Diospa rasumpa Palabrantam alleq inshïta yachakun (2 Tim. 2:15). Jehovapa atska yanapakïnintam rikan kawëninchö (Hech. 11:21; Fili. 4:11-13). Hinamampis, precursor karmi Jehová Diosman witir alli yachakun, tsëmi sasa kawëchöpis alleq tsarakun (Sant. 4:8). ¿Kë hatun punkupa yëkushwanku, precursor regular karnin?