“Sasa kawëkunacho alleq tsarakïkaqqa kushishqam kanqa”
1 Llapantsik cristianokunam tukïläya sasa kawëkunata pasashun, wakinnintsikmi qeshyapäkushun, o qellëta tarishuntsu, o mana alli rurëkunata munapäshun o chikishqapis kashun (2 Tim. 3:12). Tsë rurëkunawanmi Satanasqa qepätsimënintsikta munan willapäkïnintsikcho, hina Diosnintsikta haqirinantsiktapis munan (Job 1:9-11). Tsëpenqa, ¿imanirtaq sasa kawëkunapeq alleq tsarakï kushitsimantsik? (2 Ped. 2:9.)
2 Sasa kawëkunapaq listo këkäshun. Rasumpa kaqtaqa Biblianchömi Jehová yachatsimarqontsik, tsëchömi Jesuspa yachatsikïninkuna këkan y imanö kawanqampis. Jesús nenqankunata wiyakorqa y rurarqa, ima hipakïkuna chämuptimpis allim tsarakushun (Luc. 6:47-49). Y kapamantsikmi huk yanapakïkunapis: congregacionchö wawqi panintsikkuna, reunionnintsikkuna y esclavo fiel y discreto Bibliapita horqamonqan publicacionkunapis. Hina munanqantsik höram Diosnintsikman mañakurishwan (Mat. 6:13).
3 Jehovaqa, änimanqantsikman markäkunantsiktam munan. Fënintsik alli chachaq kaptenqa, ‘barcota tsaraq anclanömi almantsikta tsaranqa’ (Heb. 6:19). Unë tiempochöqa manash barcokuna yarquyaqtsu anclan mana kaptenqa, mëlaya alli tiempo këkaptimpis. Lamarchö mantsakëpaq shukukï qallëkuptenqa, anclatash hitarkuyaq yakuman, barco qaqakunawan mana chocanampaq. Tsënö kaqllam Diosnintsik änimanqantsikman fënintsik kaptenqa, yanapamäshun sasa kawëkuna chämuptin. Këkunaqa chämun illaqpitam. Tsënömi pasakorqan Listra markachö. Tsë markachö Pablowan Bernabé willapäkur qallëkuyaptinmi, shumaq wiyakuyarqan, tsëpitanam chikikoq judiokuna chäriyaptin wiyakïta munayarqannatsu (Hech. 14:8-19).
4 Sasa kawëcho tsarakorqa kushishqam kashun. Nunakuna chikikämashqapis, wayin wayin willapäkurmi kushikïta tarishun. Kushikuntsikmi Cristorëkur tukïta ruramashqa (Hech. 5:40, 41). Tukïta ruramashqapis alli tsarakushqaqa, yanapamäshun humilde kanapaqmi y wiyakunapaqmi (Deu. 8:16; Heb. 5:8; Sant. 1:2, 3). Hinamampis, Jehovaman y änimanqantsikman markäkïtam yachakuntsik, y pëmanmi ratakuntsik (Pro. 18:10).
5 Musyantsikmi sasa kawëkuna pasareqlla kanqanta (2 Cor. 4:17, 18). Këkunam yanapamantsik Jehovata alläpa kuyanqantsikta rikätsinapaq. Sasa kawëkunacho alli tsarakorqa, ulikoq kanqantam Satanasta rikätsintsik. Tsëmi, ama utishuntsu. “Sasa kawëkunacho alleq tsarakïkaqqa kushishqam kanqa, Diospa kuyënin karqa kawëpaq corönatam chaskenqa.” (Sant. 1:12.)