Jesús ruranqanta qatishun
1. ¿Ima alli yachatsikïtaraq haqerqan Jesús?
1 Willapäkïcho alli yachatsikushqaqa, shumaqmi yachakuyanqa rikämaqnintsikkuna. Jesuswan pureqkunaqa, yachakuyarqanmi nenqankunapita y rurëninkunapitapis. Y rikäyarqanmi alli kallpachakonqanta, nunakunata kuyanqanta, Diospa shutinta alli alabanqanta y Pë munanqanta ruranampaq kallpachakonqantapis (1 Ped. 2:21).
2. ¿Imanöyantaq yanapanman wawqi panintsikkunata willapäkïcho ruranqantsik?
2 Wakinkunawan willapäkurnin: Jesuspa rurëninnöllam, noqantsikpa rurënintsikpis yanapanqa willapäkoq wawqi panintsikkunata. Kushishqa willapäkonqantsikta rikarmi, mushoq publicadorkunapis alli willapäkoq këta yachakuyanqa. Kushishqa kënintsikta y nuna mayintsikta yanapanqantsikta rikäyanqanmi, pëkunata yanapanqa tsënölla willapäkuyänampaq. Bibliata alleq inshishqa, yachakï munaqkunaman kutishqa y Bibliapita alli yachatsikoqta rikämarnintsikmi, noqantsiknölla rurayanqa.
3. ¿Imanöraq rurënintsikwan yachatsishwan tsëraq yachakïkaqkunata, y yachakuyanqatsuraq?
3 Bibliapita yachatsikurnin: Bibliapita tsëraq yachakïkaqkunaqa, rikëkäyanmi imata ruranqantsiktapis. Alli käyirinapaq, itsa nirishwan yachakunapaq puntata alli preparakunampaq, Bibliapa textonkunata ashinampaq y tapukïpa respuestanta marcanampaq, tsënö nishqapis pëkunaqa rikëkäyanqam ruranqantsikta (Rom. 2:21). Nenqantsik hora chashqaqa, pëkunapis Bibliapita yachakïtam puntaman churayanqa. Hinamampis rikäyanqam fënintsik alli chachaq kanqanta, y imëkanöpis willapäkunantsik-rëkur alli kallpachakïkanqantsikta. Huk Testigo Jesusno kaq yachatsikuptenqa, manam ni pï espantanqatsu kë nuna alli yachatsikoqman tikrariptin.
4. Reunionpaq ëllukarnin, ¿imataraq yachatsikuntsik rurënintsikwan?
4 Reunionpaq ëllukanqantsikcho: Llapan wawqi panikunaqa rurëninkunawanmi yachatsikuyan reunionkunachö. Ëllukanqantsikman shamoqkunaqa alli ruranqantsikkunapitam yachakuyanqa: wawqi panikunawan kuyanakonqantsikpita, mana chikinakonqantsikpita, shumaq vestikonqantsikpita y shumaq altsakonqantsikpitapis (Sal. 133:1). Hina pëkunaqa rikëkämantsikmi reunionkunaman mana faltashpa ëwëkanqantsikta y alli comentanqantsiktapis. Huk kuti tsëraq reunionman ëwaq nunash, espantakunaq huk wambra Bibliancho raslla textokunata tariptin y leirnin shumaq qatiptin. Tsë warmi wambrata rikanqanshi yanapanaq pëpis Bibliapita yachakur qallanampaq.
5. ¿Imanir-raq ichikllapaqqa churashwantsu alli ruranqantsikkunata?
5 Wawqi panintsikkuna rurayanqanta rikar yachakunapaqmi, Biblia yanapamantsik (Fili. 3:17; Heb. 13:7). Tsëmi alli yarpashwan, Jesús ruranqanta shumaqpa qatirqa, rurënintsikwanmi rikämaqnintsikkunata yachëkätsintsik. Tsëta musyarmi alleq wiyakïkäshun 1 Timoteo 4:16 nenqanta: “Alli alkäbu kë rurënikipita y yachatsikïnikipitapis”.