Waktsakuna shuyëkäyanqan
1 Jesusqa waktsakunapaq alläpam yarpararqan. Mallaqëkaqkunata qararpis, qeshyëkaqkunata kachakätsirpis, “waktsakunata [...] alli noticiapita” willapëtam puntaman churarqan (Mat. 11:5). Kanan willapäkïnintsikpis, tsënöllam yanapëkan waktsakunata y wakinkunatapis (Mat. 24:14; 28:19, 20).
2 Rasumpa kaqta shuyëkäyanqan: Iglesiachö mandakoqkunaqa, imëkatam mañayan nunakunata alli kayänëkipaq nishpa, tsënam waktsakuna imëkankunatapis qolläyan. Rasumpaqa, waktsa këta y llapan hipakïkunataqa Diospa Reinonllam altsamonqa. Tsëtam nin Bibliaqa (Sal. 9:18; 145:16; Isa. 65:21-23). Tsëmi Biblia nenqanta yachatsikorqa, Jehovata reqiyänampaq y markäkuyänampaqmi nunakunata yanapëkantsik (Mat. 5:3).
3 Jesuspa tiemponchö kawaq fariseokunaqa, mana allipam rikäyaq waktsakunata y chikirmi ‛am ha·’á·rets (“markampita nuna”) niyaq. Tsënö niyaptimpis, Jesuspaqqa waktsakunapa kawënin alläpa shumaqmi karqan (Sal. 72:13, 14). Noqantsikpis Jesús ruranqanta qatishwanmi, waktsakunata kuyarnin y ankuparnin (Pro. 14:31). Paqtaraq mana allipa rikëkashwan o willapëta munashwantsu markantsikchö waktsa nunakunata. Reinopita willapäkïnintsiktaqa pëkunam más wiyakïkäyan.
4 Waktsakunapaq yanapakïkuna: Markantsikchö pillapis Biblia nenqannö rurarqa, yachakunmi mana alläpa waktsa kanampaq imata ruranampaqpis. Alli käyirinapaq, Bibliaqa yachatsikunmi mana machanapaq, qellëpaq mana pukllanapaq, mana qela kanapaq, cigärrota mana shoqunapaq, hina waktsayätsikoq huk rurëkunapita witikurinapaqpis (Pro. 6:10, 11; 23:21; 2 Cor. 7:1; Efe. 5:5). Hina yachatsikunmi, mana suwakunapaq, alli trabajaq kanapaq, kë alli rurëkunawanmi mëchöpis kuyashqa kashun (Col. 3:22, 23; Heb. 13:18). Trabajaqkunapaq encuestata rurarmi tariyashqa, patronkunaqa trabajaqninkuna honrado y mana qela kayänantash munayan.
5 Jehovaqa, alläpam llakin waktsakuna hipayaptin. Tsëmi Tsurin Jesucristo, “mañakoq waktsakunata yanapanqa” (Sal. 72:12). Tsë tiempo chämonqanyaqqa, llapan nunakunata yanapëkäshun, hina waqtsakunatapis yachëkätsishun Biblia änimanqantsikta.