Jehoväta kuyayänampaq yachatsi
1. ¿Imanöpataq nunakuna Jehoväpa sirveqnin këman chäyan?
1 ¿Jehoväpa shutinta wiyanqëki hunaqta yarpankiku? ¿Imanöpataq sirveqnin këman chashqanki? Masqa, kuyakoq y ankupäkoq o llakipäkoq kanqampita yachakurmi niyanmi alli shonquyoq nunakuna (1 Juan 4:8).
2, 3. ¿Imanötaq Yachatsikun librowan yanapashwan yachakïkaqkuna Jehoväta más kuyayänampaq?
2 “Këmi Diosnintsikqa”: Rasumpëpaqa, ¿imatataq Biblia yachatsikun? librom rikätsimantsik Jehová alläpa kuyamanqantsikta, y amïgon këta wananqantsikta. ¿Imanöraq kë librowan nunakunata yanapashwan Jehoväta más kuyayänampaq? Imata pensanqantapis musyanapaqmi, manaraq huk yachatsikïman yëkur kënö tapurinkiman, “¿Imanö Jehová kanqantataq rikätsimantsik kë yachakïkanqantsik?” o “Jehová alli Teyta kanqanta, ¿imanötaq rikätsimantsik?”. Bibliapita yachakïkaqkuna llapan kawëninchö Jehoväta sinchi o jinchi kuyayänantam munantsik.
3 Kawëkaq y rasumpa kaq Diospita yachakï alläpa kushikïpaq kanqanta musyarir, y yanapanampaq kaqta musyarirmi, Bibliapita yachakïkaqkuna profeta Isaiasnöpis kënö niyanqa: “Këmi Diosnintsikqa” (Isa. 25:9). Patsapaq Diospa munëninta Jesucristupa gobiernon tukï bendicionkunata apamunampaq kaqtam alleq yachatsinantsik Bibliapita yachakïkaqkunata (Isa. 9:6, 7).
4, 5. ¿Imanötaq rikätsikuntsik Jehoväta kuyanqantsikta?
4 ¿Imanötaq rikätsikuntsik Jehoväta kuyanqantsikta? Llapan shonquwan, almawan, y yarpëwan Jehoväta kuyëqa, Pë munanqannö kawakï y mandamanqantsikta rurëmi (Sal. 97:10). Diosta kuyëqa, nenqantanölla llapanta rurëmi y ‘munashqanno jutsata manana rurashpa shumaq cawaquïmi’, tukïta pasarpis o chikishqa karpis (2 Ped. 3:11; 2 Juan 6).
5 Diosnintsikta kuyar munëninta rurëqa alläpa kushikïpaqmi (Sal. 40:8). Pero puntataqa Bibliapita yachakïkaqkuna musyayänanmi, Jehová munanqanta rurar imëpis alli kawakuyänampaq kaqta. Y llapan Kamanqampita alläpa agradecikuyanqanta rikätsikuyänampaqqa, Pë mandakonqannömi kawayänan (Deu. 10:12, 13). Jehová nenqannölla kawarqa, mananam unënö llakishqa purenqanatsu ni ardëpa hipanqanatsu, tsëtam rikätsinëki yachakïkaqkunata.
6. ¿Imakunataraq chaskishun Jehoväta kuyarqa?
6 Diosta kuyaqkunapaq bendicionkuna: Pëpaq kaqkunata alläpa kuyarmi, “imapis pensashqantaqa” Jehová musyatsimantsik (1 Cor. 2:9, 10). Nunakunapaq Dios munanqanta yachakurmi, musyayanqa imanö kawayänampaq kaqta, y tsëmi yanapanqa yärakuyänampaq o markäkuyänampaq (Jer. 29:11). Tsënöpam yachakuyanqa, Jehoväta kuyar alläpa alli këninta chaskiyänampaq kaqta (Éxo. 20:6). Y pëkunata Jehová kuyaptenqa, wiñeypaq kawëta shuyaräyanqam (Juan 3:16).
7. ¿Ima ninkitaq Jehoväta kuyayänampaq yachatsikïpita?
7 Ciëlochö Teytantsikpita más yachakorqa, wakin nunakunatapis yachatsita munashunmi (Mat. 13:52). ¡Imanö kushikïpaqmi kë rurëqa! Awmi, yachatsinantsikmi wakin nunakunata y wambrantsikkunatanäqa Jehoväta kuyayänampaq (Deu. 6:5-7). Bibliapita yachakïkaqkuna y noqantsikpis, imëpis kushikushun Jehoväpa Alli kënimpita yachatsikurnin (Sal. 145:7).