Dios Gobernanqan witsanqa, llapan kamanqankunam shumaq karqan.
¿Imanirtaq Diosnintsik Gobernamunanta munantsik?
Nunata kamanqampita patsëmi, kuyakoq Teytantsik Jehoväqa nunakunata gobernanan karqan. Tsëmi juk shumaq huertata kamarqan, nunakuna tsëchö kushishqa y yamë kawayänampaq, y llapan rurayänampaq kaqpis manam sasatsu o ajatsu karqan (Genesis 1:28, 29; 2:8, 15). Teyta Diosnintsik nimanqantsikkunata wiyakushqa karqa imëyaqpis kushishqa y yamëmi kawakushwan karqan.
Adanwan Ëvaqa, manam munayarqantsu Dios gobernananta.
Bibliam nin, juk angel Diosnintsikpaq mana alli gobernaq kanqanta nir ulikunqanta o llullakunqanta, tsë angelqa Satanas Diablum karqan. Pëmi nirqan nunakuna kikinkuna gobernakurnin mas kushishqa y yamë kawayänampaq kaqta. Tsënö Satanas mana rasumpa kaqta ninqanta wiyakurmi, Adanwan Ëvapis Diospa contran churakäyarqan (Genesis 3:1-6; Revelacion 12:9).
Jehovä gobernananta mana munarmi, Adanwan Ëvapis Diospa contran churakäyarqan, y mananam tsë Shumaq Patsacho yamë ni kushishqa kawayänannatsu karqan (Genesis 3:17-19). Mana wiyakoq kayanqampitam wamrankuna yurirpis sufriyänan karqan. Tsëmi Biblia Adanpaq kënö yachatsikun: “Juk nunarëkurllam llapan nunakunaman jutsa yëkurqan, y jutsarëkurnam pëkunaman wanï charqan” (Romänus 5:12). Adanwan Ëva mana cäsukuyanqampitam, ‘nunaqa nuna mayinta sufritsinanllapaq gobernashqa’ (Eclesiastes 8:9). Y tsëqa rasunllam, nunakuna gobernayaptinqa manam ni imëpis kushishqa kawashuntsu.
NUNA GOBERNAR QALLËKUN
Nemrodqa Jehoväpa contranmi churakarqan.
Nemrod jutiyoq nuna, nunakunata gobernar qallanqantam Bibliaqa yachatsikun y pëpis Diospa contranmi churakarqan. Tsë witsampitam mëtsika gobernaqkuna munëninkunallata rurayashqa. Tsëta rikarmi, Bibliata qellqaq rey Salomon kënö nirqan: “Tsëpitam rikarqä kë patsachö mandakuq nunakuna qollmi shonqu nunakunata jipatsiyanqanta [o sufritsiyanqanta]. Pipis mana shoqaptin y mana yanapaptin waqëkäyaqtam rikarqü” (Eclesiastes 4:1).
Kanan witsan gobernaqkunapis mana allillatam rurayan. Tsëmi, nacionkuna yamë kawakuyänampaq yanapaqkuna, 2009 watachö kënö niyarqan: “Mëtsikaq nunakunam niyan, mana alli gobernaqkuna kaptin imëka problëmakuna kanqanta”.
MANA ALLIKUNATAM DIOSNINTSIK ALTSAMUNQA
Llapantsikmi yamë kawakuyta munantsik, y tsënöqa kawashun juk alli gobernaqllawanmi. Tsëtaqa Kamakoq Yayantsik Jehovällam awnimantsik.
Manam mëqan gobiernupis nunakunapa problëmankunataqa altsashqatsu.
Kikin Diosnintsikmi juk Gobiernuta patsätsishqa y tsë gobiernum nunakunapa gobiernunta ushakätsinqa, y ‘pëpa mandakuyninqa manam imëpis ushakanqatsu’ (Daniel 2:44). Kë Gobiernuta mañakuyänampaqmi Jesusqa qateqninkunata nirqan y mëtsikaq nunakunam mañakuyan (Mateu 6:9, 10). Tsë gobiernuchöqa manam Diostsu gobernanqa. Tsëqa, ¿pitataq churashqa Gobiernunchö gobernanampaq?