Yachatsikonqantsikqa Jehoväpa kaqchö alli tsarakunapaqmi yanapamantsik
1. ¿Imatataq tarintsik yachatsikurnin?
1 Alli noticiakunataqa imëpis musyatsikuntsik Jehoväta kushitsinantsikrëkurmi. Tsënö karpis, ‘palabranta willapäcunapaq’ Biblia nenqanta wiyakorqa Diospa bendicionnintam chaskishun, allim tsarakushun, hina más kushi kushim kawakushumpis (2 Tim. 4:2; Isa. 48:17, 18). Wayin wayin yachatsikï, ¿imanötaq yanapamantsik alli tsarakunapaq y kushi kushi kanapaq?
2. ¿Wayin wayin yachatsikonqantsik imakunachötaq yanapamantsik?
2 Allim tsarakushun y bendicionkunatam chaskishun: Yachatsikonqantsikqa yanapamantsik problëmakunaman cada hunaq mana yarparäkushpa Diospa gobiernonman más markäkunapaq o yärakunapämi (2 Cor. 4:18). Hina Biblia yachatsikonqanta nunakunata musyatsishqaqa, Diosnintsik ruramunampaq kaqmanmi más yärakushun y yachakonqantsikkunatapis masmi kuyashun (Isa. 65:13, 14). Hinamampis, Diosta serviyänampaq y kë ‘patsachö nunacunano’ mana kayänampaq nunakunata yanaparqa, kikintsikpis kë mundochö nunakunanö mana kanapaqmi kallpachakuntsik (Juan 17:14, 16; Rom. 12:2).
3. Wayin wayin yachatsikonqantsik, ¿imanötaq yanapamantsik alli cristiano kanapaq?
3 Hina wayin wayin yachatsikonqantsikqa yanapamantsikmi más alli cristiano tikranapaqpis. ¿Imanö? Yachatsikonqantsikta wiyamänantsikrëkur imëkakunata rurarqa o “pecunanolla” karqa, más qollmi shonqum tikrashun (1 Cor. 9:19-23). ‘Mitseqninnaq üsha cuenta pantacashqa puriquicaq’ nunakunata yachatserqa, llakipantsik o ankupantsikmi, tsëmi yanapëtapis munantsik (Mat. 9:36). Y nunakuna chikimashqa o mana wiyamashqapis yachatserqa, alli tsarakïtam yachakuntsik, y wakinkunata imëkanöpapis yanaparqa más kushikïtam tarintsik (Hech. 20:35).
4. ¿Kuyankiku Diospita yachatsikonqëkita?
4 ¡Kë rurënöqa manam imapis kantsu! Jehovällatam adoranantsikqa y yachatsikonqantsikwanqa pëtam alabëkantsik. Hinamampis, yachatsikonqantsikqa yanapamantsik alli tsarakunapaqmi. Awmi, ‘llapanman alli willakïta chätseqkunaqa’ atska bendicionkunatam tariyanqa (Hech. 20:24, NM).