¿Imanötaq publicacionnintsikpita agradecikuntsik?
1. Jehová qonqanta Jesus mana perditsenqampita, ¿imatataq yachakushwan?
1 Milagrokunata rurar atska nunakunata pachan qararirmi, katuyanqankunata ëlluyänampaq o qoriyänampä Jesus mandarqan (Mat. 14:19-21). Jehová qonqanta Jesus mana perditsenqanmi noqantsiktapis yachatsimantsik “mäcoq, mäcoq, cumplidu sirweqnin[wan]” llapan qomanqantsikpita Jehoväta agradecikunapaq. Tsëmi Bibliachöpis “‘Grasias’ nicushun” nimantsik (Col. 3:15; Luc. 12:42; Mat. 24:45-47).
2. ¿Imataraq rurashwan revistakuna wayintsikchö mana ëllukänampaq?
2 Revistakuna: Wakinnintsikpaqa revistakuna wayintsikchö rasllam ëllukärin. Tsëqa, ¿imataraq rurashwan? Killa killa atska revistakuna ëllukäpamashqaqa allichi wallkallatana mañakushwan. ¿Imanashwantaq pasaq killa revistakunata? Pasaq killakunachö yarqamushqa karpis yachatsikïnenqa yanapakunmi, tsëmi markantsikchö kë revistakunawan imanö yachatsikunapaqpis anciänota o superintendente de serviciota tapurishwan.
3, 4. Yachatsikuyänan Wayichö publicacionkunata horqïta munarqa, ¿imakunatataq yarpänantsik?
3 Huk publicacionkuna: Cada killa yachatsikonqantsik publicación hukna kaptenqa, wayikichö kapushonqëkikunataraq ashiri. Masta wanarqa, Yachatsikuyänan Wayichö mañakurinkimanmi. Tsënö karpis, semänachö wananqëkillata horqunëkipaqmi niriyaq, y usharatsirnam mastaqa mañakurinkiman.
4 Ima publicaciontapis kikikipaq munarqa, rasumpa wananqëkillata mañakï. Shutita qellqanapaq kaqman, shutikita churë, tsënöpam qampa kanqanta musyanki. CD-ROM Watchtower Library nishqampita yachakur y watachö ëllukonqëki revistakuna kapushuptikeqa, volümenchö yarqamoq La Atalaya y ¡Despertad! revistakunata allichi mañakunkimannatsu.
5. ¿Imatataq yarpänantsik publicacionkunata haqipukur?
5 Publicacionkunata haqipukur: Publicacionkunataqa haqipuntsik rasumpa leita munaq nunakunallatam. Y yarpänantsikmi kë alläpa väleq publicacionkunapa chanintaqa noqantsik paganapaq kaqta. Tsënö karpis, hinantin Patsapa yachatsikïta ëkallawampis yanapakuyänan alläpa precisanqantam ninëki publicación chaskeqkunata.
6. ¿Imanirtaq alläpa välin publicacionnintsikkuna? Tsëqa, ¿imataraq rurashwan?
6 Milagrokunata rurar nunakunata pachan qararpis, Jesusqa puntaman churarqan Diospita yachatsikïtam. Tsëmi, “manam tantata micurllatsu nunacuna cawayanqa; sinoqa Dios llapan nenqanta cäsucurninmi cawayanqa” nerqan (Mat. 4:4). Imëyaqpis kawakïta tarinapaqmi publicacionnintsikkunaqa Bibliapita yachatsikun (Juan 17:3). Publicacionnintsikkunaqa alläpam välin, ¡tsëmi rikätsikunantsik agradecido kanqantsikta!