Alläpam precisan ollqukunata yachatsinantsik
1. ¿Pikunata yachatsinantsiktaq alläpa precisan Diospa markanta rikäyänampaq?
1 Kanan witsanqa imëpitapis masmi Diospa markan mirakïkan, y tsëta rikäyänampaqmi más ollqukuna pishin (Mar. 4:30-32; Hech. 20:28; 1 Tim. 3:1-13). Tsënö kaptimpis, Diospita yachatsikushqaqa warmikunam höraqa más wiyakuyan. Wakin markakunachönäqa warmikunallam Diospa kaqtapis wambrakunata yachatsiyan. ¿Imataraq rurashwan más ollqukuna Diospa kaqpita yachakïta munayänampaq y noqantsikwan Diosta serviyänampaq?
2. ¿Imanirtaq alli karqan Pablu y Pedru ollqukunata yachatsiyanqan?
2 Asheqmi ëwanantsik: Wayichö ollqu kaq Diospita yachakuriptenqa familiampis tsënöllam rurayan. Carcelarëkarmi Pabluwan Silas carcelta täpaq nunata Diospita yacharatsiyarqan. Tsënam “carsel cuidaqqa wayincho llapan caqcunawan” bautizakuyarqan (Hech. 16:25-34). Corinto markachönam, Pablu yacharatsiptin ‘Crispu jutiyoq nuna Teyta Jesusman creyicorqan y wayincho llapan castancunapis’ (Hech. 18:8). Pëdrutanam Jehová nerqan, ‘Diosta respetaq, y adoraq’ soldädokunapa capitannin Corneliuman yachatseq ëwanampaq. Tsënöpam Corneliu, kastankuna y kuyashqa amïgonkuna bautizakuriyarqan (Hech. 10:1-48).
3. ¿‘Autoridäkunata’ Diospita yachatsinkimantsuraq?
3 ‘Autoridäcunata’ yachatsenqantsikqa alläpa allim kanman (1 Tim. 2:1, 2). Huk ángel mandaptinmi Etíope nacionchö reinapa ‘presisaq tesorërunta’ Felipi parlaparqan. “Diospa profetan Isaias escribishqan libruta leyicaqta” wiyarirmi, Felïpiqa Jesuspita yacharatserqan. Kë nunaqa cristiano tikrarir mëraq yachatsikun yachatsikun markanta kutikorqan. Hinamampis, itsachi reinata, reinapa familiankunata y sirveqninkunatapis Diospita yachatserqan, y pë mana yachatsiptenqa pillaraq pëkunata yachatsinman karqan (Hech. 8:26-39).
4. ¿Imataraq rurashwan ollqukuna Diospita más yachakuyänampaq?
4 Mëchö y imanöraq tarishwan: Hunaqpaqa ollqukunata wayinchö tarintsiktsu trabajaq ewkuyaptinmi, tsëqa, ¿tardepëkunapa, semana ushëkuna, fiesta hunaqkuna yachatsikoq yarqunëkipaq tiempïkita patsätsinkimantsuraq? Negociokunachöpis yachatsikïta tïrarqa, wayinchö mana tarinqëki nunakunata masmi tarinki. Ollqu kaq wawqikunapis kallpachakuyänanmi trabäjonchö ollqu mayinkunata yachatsiyänampaq. Kutin kutin kanqan territoriollachö yachatsikorqa, wayikunachö ollqu kaqpaqmi tapukuriyankiman.
5. ¿Imatataq ruranman huk pani yachakï munaq ollquta tarerqa?
5 Yachatsikonqanchö huk pani yachakï munaq ollquta tarerqa, manam hapallanqa kutinmantsu. Nunanwan kar, huk paninwan o huk wawqiwan kar-raqmi kutinan. Tsë nuna más yachakïta munaptenqa, allichi huk wawqitana ninman yachatsinampaq.
6. ¿Apóstol Pablunöpis, ¿imataraq rurashwan “atsca nunacunata” yachatsinarëkur?
6 ¿Imanöraq yanapashwan Diospita yachakuyänampaq? Apóstol Pabluqa wiyaqninkunamanmi pensaq, tsëmi “atsca nunacuna” yachakuyänampaqnölla yachatsikoq (1 Cor. 9:19-23). Tsaq tsënöllam noqantsikpis ollqukuna imapita yachakïta munayanqanman pensanantsik, tsëqa musyashunmi pëkunata imanö parlapänapaqpis. Qellëpaq, alli gobierno kanampaq y familiankuna imëpis alli kayänampaqmi pëkunaqa más yarpachakuyan. Itsa tapukuyan imapaq kawanqantsikta, warë warätin kë patsa imanö kanampaq kaqta y alläpa hipakïkunata o ñakaykunata Dios imanir rikaräkonqantapis. Këkunapita yachatsishqaqa Diospa kaqta masmi wiyamäshun (Pro. 16:23).
7. ¿Imanöraq congregacionman huk panipa mana creikoq nunan shamuptin yanaparishwan?
7 ¿Imanöraq yanapashwan panikunapa mana creikoq nunankunata? Shumaq portakuyanqanwan panikuna nunankunata yachatsiyaptimpis, congregacionchö kaqkunapis yanapayanmanmi (1 Ped. 3:1-4). Reunionkunaman shayämuptin shumaq chaskirishqaqa, imanö kanqantsiktapis rikar yachakïta munayanmanmi. Yarpë, ichikllapis rasumpa kaqta kuyayanqantam reunionman shamorqa rikätsikïkäyan, tsëpitaqa itsa Bibliapita yachakïtapis munariyanmanna.
8. Panikunapa mana creikoq nunankunata yanapayänampaq, ¿imataraq wawqikuna rurayanman?
8 Wakin nunakunaqa Diospita parlëta manam munayanllatsu, pero tsëpitaqa, itsa Bibliapita parlëta munariyanmanna yachanänakuyanqan wawqikunawanqa. Huk familiachömi ollqu kaqlla Testïgotsu karqan, tsënam congregacionchö wawqikuna parlariyarqan watukapäyänampaq y pëpaqnö kaqkunata parlapäyänampaq. Tsënömi ichikllapa ichikllapa Bibliapita parlarna qallëkuyarqan y kananqa tsë nuna bautizakushqanam. Huk kutinam, huk panipa mana creikoq nunan wayimpaq cercota ruraptin huk wawqi yanaparqan. Tsënö yanapanqampitam Bibliapita yachakur qallëkorqan (Gál. 6:10; Fili. 2:4). Wawqikuna, ¿maslla yanaparkuyankimantsuraq panikunapa mana creikoq nunankunata?
9. Congregacionchö yanapakuyänampaq ollqu kaqkunata yachatsishqaqa, ¿ima këmanraq chäyanman?
9 Yachatsishun: Testigo këman chashqa ollqukunata congregacionchö yanapakuyänampaq yachatsishqaqa, anciano tikrarirmi yachëninkunawan y musyëninkunawan congregacionta yanapayanqa, tsëqa, wawqikunapaq y panikunapaqpis Jehoväpa ‘qarenin’ cuentam kayanqa (Efe. 4:8; Sal. 68:18). Üsha mitsikoq cuentam Diospa markanta shumaq rikäyanqa (1 Ped. 5:2, 3). ¡Llapan wawqi panikunapaqmi pëkunaqa huk bendición kayanqa!
10. Ananias Pabluta yachatsenqan, ¿imanötaq atska nunakunata yanapashqa?
10 Yarpärishun Saulupaq, pëqa apóstol tikrarirmi ‘mana israel caq nunacunata’ yachatserqan, pero puntataqa cristiänokunata paqwë chikirmi qatikacharqan (Rom. 11:13). Tsëmi yachatseq ëwanampaq Ananiasta Jesus mandaptin ëwëta munarqantsu. Tsënö kaptimpis Ananias ëwarqanmi y tsëllanam Sauluqa apóstol Pabluman tikrarerqan. Pablu yachatsikonqanqa atska nunakunatam yanaparqan. Kananyaqmi Diospa Palabranchö këkaq cartankunapita yachakïkantsik (Hech. 9:3-19; 2 Tim. 3:16, 17).
11. ¿Imanirtaq tukïnöpa kallpachakunantsik ollqu kaqkunata yachatsinapaq?
11 Ollqukunata Diospa kaqta yachatsinantsikqa alläpam precisan, tsëmi tukïnöpa y më tsëchöpis yachatsinapaq kallpachakunantsik. Jehová munanqanta rurëta munar y markanta alli rikäyänanta munar kallpachakunqantsiktaqa Jehová bendecinqam.