Telëfonopapis yachatsikushun
1. ¿Imanirtaq telëfonopapis yachatsikushwan?
1 ¿Imanirtaq telëfonopa yachatsikïta tïrashwan? Nunakuna rasumpa kaqta yachakur salvakuyänampaqmi (2 Ped. 3:9). Alli willakïta wayin wayin yachatsikurnimpis, wayinkunachö mana tarenqantsik nunakunata telëfonopa yachatsishwanmi (Mat. 24:14; Luc. 10:1-7; Apo. 14:6).
2. ¿Imatataq rurashwan telëfonopa yachatsikunapaq?
2 ¿Imatataq ruranantsik? Imanömi wayin wayin yachatsikunapaq territoriokunata akrantsik, tsënöllam telëfonopa yachatsikunapaqpis ruranantsik. Telëfonopa yachatsikïta munarqa territoriota mañakunkimanmi, hapallëki o huk o ishkë publicadorkunawan yachatsikunëkipaq. Qayakunëki sitiochöqa manam ima bulla kanantsu. Wakin wawqikuna y panikunaqa librokunata y wayin wayin yachatsikoq ëwayänampaq wanayanqankunatam mësaman o imampis alistayan.
3. ¿Imatataq yarpänantsik telëfonopa yachatsikorqa?
3 ¿Imataraq y imanöraq parlapashwan? Razonamiento librochö, Diospita Yachatsikunapaqchö y ¿Rasumpa kaqta musyëta munankimantsuraq? tratädochömi, imanö parlapänëkipaqpis yachakunki. Puntataqa imapita yachatsinëkipaq kaqtam pensanëki, tsëpitanam imata tapunëkipaq kaqta, nïkurnam mëqan textokunata leipunëkipaq kaqtapis. Tsë killa yachatsikuna publicaciontam ofrecinëki y reqinakushqëkiwannömi parlanëki. Pillapis tsënö manaraq yachatsikushqa karqa, itsa telëfonopa contestamoqta leirlla yachatsita munanman, pero leirlla yachëkätsenqanta mana cuentata qokunampaqnömi parlanan. Mana mantsakushpa shumaqlla parlapänëkipaq kaqta yarpë. Hina respetöso kanqëkita, mana ras piñakonqëkita y kushi kushi parlapanqëkitapis contestashoqnikiqa cuentata qokurenqam. Parlamonqanta shumaq wiyë y nishonqëkita agradecikï.
4. ¿Pikunatataq tarita munantsik telëfonopa yachatsikur?
4 ¿Pikunatataq tarishun telëfonopa yachatsikurnin? Qeshyar wayinkunapita mana yarqamoqkunata o trabajayaptin wayinkunachö mana tarenqantsikkunatam. Täpaqyoq o yëkunata mana haqikuyänan wayikunachömi wakin nunakunaqa yachayan. Pëkunatapis parlapänantsikrëkurmi telëfonopa yachatsikunantsik, tsënömi llapan nunakunaman alli willakïkunata chätsishun.