Imëkanöpapis Bibliapita yachakïkaqkunata yanapashun
1. ¿Imataraq rurashwan Bibliapita yachakïkaqkunata yanapanapaq?
1 Bibliapita yachakïkaqkunata butizakuyanqanyaq yanapanapaqqa, manam imëpis Bibliapita yachatsinanllatsu. Apóstol Pabluqa igualatserqan huk mama wambrankunata kuyar cuidanqantawanmi mushoqllaraq discïpulokunatapis pë kuyanqanta. Noqantsikpis tsënöllam yanapashwan Bibliapita yachakïkaqkuna Jehoväpakaqchö más poquyänanta munarqa, tsëmi imëkanöpapis ‘kaweynintsikta’ o tiempontsikta llapan shonquntsikwan qonantsik (1 Tes. 2:7-9, QKW).
2. ¿Imanötaq Bibliapita yachakïkaqkunata tukïnöpa yanapashwan?
2 Noqantsikmi yanapanantsik: Huk Bibliata estudiëkaq yachakonqannölla rurar qallëkorqa, kikinmi cuentata qokurnin Biblia ninqannö mana kawaqkunapita witikurenqa (1 Ped. 4:4). Itsa kastankunapis chikir qallëkuyanqa (Mat. 10:34-36). Pero noqantsik imëkachöpis yanapar shumaq kuyashqaqa, llakishqa këkäyanqantapis konqariyanqam. Tsëkunata rikarmi unëpitana sirveq misionëro kënö nin: “Bibliapita yachatsir usharerqa, ama rasllaqa ëwakïtsu. Más parlarita munaqta rikarqa, ichik quedari shumaq parlakuriyänëkipaq”. Mäkoqllam këkänëki Bibliapita yachëkatsinqëki imallachöpis yanapanëkita wananqanta. Këman yarpäri, qeshyëkaptenqa, ¿manatsuraq telëfonopa qayarinkiman o watukarinkiman? ¿Reunionkunaman shayämuptenqa manatsuraq pëkunawan täkurinkiman o wambrankunawan yanaparinkiman?
3. ¿Imatataq rurashwan Bibliapita yachakïkaqkunata congregación yanapanampaq?
3 Congregacionpis yanapananmi: Wayin wayin yachatsikoq ëwanqëki markachö Bibliapita yachëkatsinqëki täraptenqa, ¿imanirtaq huk rätollapis watukarinkitsu y qamwan prediquekaqkunata reqiratsinkitsu? Allichi huk, y huk yachatsikoqkunata o anciänokunata pushankiman estudiochö yanaqäyäshunëkipaq. Hinamampis, estudio Biblicota qallarirnenqa reunionkunaman shamunampaqmi shumaq nirinkiman. Tsëmi yanapanqa congregacionchö yachanëpaq cristiänokunawan shumaq parlarinampaq, y pëkunaqa espiritual kastankunam tikrariyanqa (Mar. 10:29, 30; Heb. 10:24, 25).
4. ¿Imëkanöpapis shumaq yachatsikorqa imanöraq karishun?
4 Huk teytaqa alläpam kushikun wambrankunata Jehoväpita imëkanöpapis yachatsishqa kaptin, pëkuna Jehoväta kuyar y servirnin qallëkuyaptenqa (3 Juan 4). Llapantsikmi tsënö kushikushun imëkanöpapis Bibliapita yachakïkaqkunata yanaparqa.