Alli yachatsikunapaqqa Diosmanmi mañakunantsik
1. ¿Imata ruranantsiktaq alli yachatsikunapaq alläpa precisan?
1 Kikintsikllapitaqa manam Diospita yachatsikïta cumplishwantsu. Jehovämi kallpata qomantsik yachatsikur purinapaqqa (Fili. 4:13). Üshanö manshu nunakunata tarinapaqmi angelninkunawan yanapamantsik (Apo. 14:6, 7). Pëmi murunqantsik y parqunqantsik muruta winatseq cuenta nunakuna rasumpa kaqta más yachakuyänampaq yanapan (1 Cor. 3:6, 9). ¡Tsëmi Teytantsik Jehová yachatsikïchö yanapamänapaq imëpis mañakunantsik alläpa precisan!
2. ¿Imakunapaqtaq Diosman mañakushwan?
2 Kikintsikpaq mañakushun. Cada yachatsikoq yarqurmi Diosnintsikman mañakunantsik (Efe. 6:18). ¿Imakunapaqraq mañakushwan? Nunakunata parlapëta mana mantsanapaq y wiyakoqkunata imëpis tarinapaq kaqman pensanapaqmi mañakunantsik (Hech. 4:29). Hina Bibliapita yachakita munaq nunakunata tarinapaqpis Jehoväman mañakunantsikmi. Yachatsikunqantsikchö mana yarpanqantsikta pipis tapumashqa respuestata yanaparinapaqmi shonquntsikchö raslla Jehoväman mañakurinantsik (Neh. 2:4). Y Diospita yachatsikïta puntaman churanapaqmi yachënintsik mañakunantsik (Sant. 1:5). Hinamampis, yachatsikoqnin kanqantsikta mañakïnintsikchö agradecikushqaqa Jehová alläpam kushikun (Col. 3:15).
3. ¿Wakinkunapaq mañakunqantsik imanöraq yachatsikïchö alli yanapakunman?
3 Wakimpaqpis mañakushun. ‘Jucnintsic jucnintsicpagmi Dios Yayaman mañacunantsic’, y höraqa hasta shutimpam cristiano mayintsikkunapaq mañakunantsik (Sant. 5:16, NTCN; Hech. 12:5). ¿Qeshyapäkurku alläpaqa yachatsikoq yarqunkitsu? Tsëqa alli saludyoqkaqkunapaq mañakï. Tsë ruranqëki wakinkunata mana yanapanampaq kaqtaqa ama pensëtsu. Hina allim autoridadkuna Diospita yachatsikunata mana michämänapaq mañakunqantsikpis, tsënöpa “alli pasaquicho imapaqpis mana yarpacachashpa” cristiano mayintsikkuna kawakuyänampaq (1 Tim. 2:1, 2).
4. ¿Imanirtaq imëpis mañakïkänantsik?
4 Llapan nunakunata alli willakïta musyatsinanqa manam fäciltsu. Pero ‘imepis mañaquicashqaqa’ Jehová yanapamäshunmi ruranapaq (Rom. 12:12).