¿Nawiki alli kaqllataku rikëkätsishunki?
1. ¿Imanötaq kantsik alli nawiyoq karqa?
1 Nawintsik rikanqantam höraqa rurëta munarintsik, tsëmi Jesus kënö nirqan: “Nawiquicuna alli captenqa, actsichono[mi] cayanqui” (Mateo 6:22). ‘Nawintsik alli captenqa’, Diospa munëninta rurëllatam imë hörapis tïrantsik. Y manam cösaskuna ni ima rurëkunapis tsapämäntsiktsu Diospa Gobiernonta puntaman churanantsikta.
2. ¿Imataq kapamanqantsikllawan kawakïta haqiratsimashwan, y imaraq yanapamashwan?
2 ¿Alliku nawï këkan? Propagandata o wakinkuna kapoqyoq kayanqanta rikarnin, itsa kapamanqantsikllawan kawakïta munantsiknatsu. Tsëmi alläpa preciso imatapis rantita o tarïta munëwan manaraq trabajarnin, qellëta o kallpantsikta manaraq ushakätsirnin, “llapan gastuta tantiya[nantsic]”, y tsë cösaskuna Jehoväta más servinapaq yanapamänapaq kaqta o mana yanapamänapaq kaqtapis rikänantsikmi (Luc. 14:28; Fili. 1:9-11). Hina imëpis rikëkänantsikmi Jehoväpita más yachatsikunapaq imakunata ruranapaq kaqtapis (2 Cor. 13:5; Efe. 5:10).
3. ¿Imatataq yachatsimantsik huk cristiana wananqanllawan kawakunampaq churapakanqan?
3 Huk cristiänam, precursora këman chärir llapan hunaqkuna trabajar siguerqan pullan hunaqlla trabajanqan kawakunampaq tinkïkaptimpis. Pero tsëpitaqa kënömi nirqan: “Manam pipis ishkë patrontaqa servita puëdentsu. Munanqäkunata haqirïkurmi, wananqäkunallawanna kawanäpaq sinchikurqä. Y cuentata qokurqämi imëkakunapis ushakäreqlla kanqanta, y tsëkunata ashinqärëkur kallpa ushakëkanqanta”. Awmi, wananqanllawan kawanampaq churapakärirmi, huk trabäjota ashirirqan y kananyaqpis precursöram këkan.
4. ¿Imanirtaq alläpa preciso wananqantsikllawan kawakï?
4 Ushanan witsanchöna kawëkanqantsikmi rikätsikun wananqantsikllawan kawakunantsik alläpa precisanqanta. Cada hunaq pasanqanmi rikätsikun llapan mana allipa ushakënin këllachöna kanqanta y mushoq Patsa qallanampaq ichikllana pishinqanta (1 Cor. 7:29, 31). Diosnintsikpita yachatsikunapaq sinchikurninqa, noqantsik y wiyamaqnintsikkunapis salvakushunmi (1 Tim. 4:16).