¿Mastaraqku ruranä?

1. ¿Imanirtaq huk cristiano alläpa llakikunman?

¹ ¿Imëllaqa pensashqankiku Jehoväpaq rurëkanqëki alläpa wallkalla kanqanta? Itsa edäyarnin, qeshyapäkurnin o familiëkita rikänëki kaptin Diospita más yachatsikïta manana puëder, alläpa llakikunki. Kima wambrayoq panim, familianta rikänan kaptin Diospita yachatsikoq yarqunampaq utishqa kar y tiempota mana tarir alläpa llakinaq. Pënö sientekurqa, qampita Jehová imata shuyaranqanmanmi pensanëki.

2. ¿Imatataq Jehová noqantsikpita shuyaran?

² ¿Imatataq Jehová shuyaran? Jehoväpaq masta rurëtaqa llapantsikpis munantsikmi. Tsënö karpis, höraqa manam llapan munanqantsiktatsu rurëta puëdentsik. Pero Diospita yachatsikïchö masta rurëta munanqantsikqa rikätsikun wallkallawan mana kushishqa kanqantsiktam. Y yarpäshun, Jehoväqa allim musyan mëyaqlla rurëta puëdenqantsikta, y rurëta puëdenqantsikpita mastaqa manam mañamantsiktsu (Sal. 103:13, 14). Tsëqa, ¿imatataq noqantsikpita shuyaran? Llapan shonquntsikwan servinata, y përëkur llapan puëdenqantsikta ruranatam (Col. 3:23).

3. ¿Imanötaq musyashwan Diospita yachatsikïchö imanö këkanqantsikta?

³ ¿Imanöraq musyashwan Jehoväpa kaqchö mëyaq rurëta puëdenqantsikta? Imanö këkanqantsiktapis alli rikänapaqmi Jehoväman mañakunantsik (Sal. 26:2). Hina, markäkunqantsik, rasumpa kaqta nimënintsikta mana mantsaq, reqimaqnintsik y Jehoväta unëna sirveq cristiano amïgom; imachö más alliyänapaqpis yanapamënintsikta puëden (Pro. 27:9). Hinamampis, tiempo pasanqanmannömi kawënintsik hukläyana tikran, tsëmi Jehoväpa kaqchö mëyaq rurëta puëdenqantsikta imëpis rikëkänantsik precisan (Efe. 5:10).

4. ¿Imanötaq rikashwan más yachatsikunapaq Bibliawan yarpätsikayämunqankunata?

⁴ ¿Imanötaq rikashwan más yachatsikunapaq yarpätsikïkunata? ¿Rikashqankiku carrërata rurayaptin nunakuna cörreqkunata qayëkachar animayanqanta? Ganayänanrëkur kallpata qoyänampaqmi tsëtaqa rurayan, y manam qelanätsiyänanrëkurtsu. Hina tsënöllam pasan ‘ime öra eque örapis, Diospa palabranta willapäcunapaq’ reunionnintsikkunachö y publicacionkunachö yarpätsikïkunawampis, tsëkunaqa yachatsikïchö kallpata qomänapaqmi, manam alläpa wallkallata rurëkanqantsikta rikätsimänapaqtsu (2 Tim. 4:2). Tsëmi musyantsik Diospa kaqta yachatsikunantsikrëkur alli kallpachakushqaqa, Jehová ‘rureynintsikunata i kuyeynintsikta’ kushishqa yarpänampaq kaqta (Heb. 6:10, QKW).