“Ama mantsëtsu”
1. Jeremïastanöpis, ¿imaraq qelanätsimashwan yachatsikoq yarqunata?
1 Profeta kanampaq Jehová niptinmi, alläpa sasa o aja kanampaq kaqta Jeremias pensarqan. Pero Jehoväqa shumaq kuyëllapam “ama mantsëtsu” nirnin kallpata qorqan. Y profeta këninta alli cumplinampaqmi shumaq yanaparqan (Jer. 1:6-10). Itsa noqantsikpis yachatsikunqantsik mana alli yarqapamänata, nunakuna mana wiyamänata o piñakuyänanta mantsar yachatsikoq yarqïta qelanashwan. ¿Imaraq yanapamäshun yachatsikïta manana mantsanapaq? Y, ¿imakunachöraq yanapamäshun manana mantsanqantsik?
2. ¿Imanirtaq puntallapitana yachakunqantsik mana mantsakunapaq yanapakun?
2 Puntallapitanam yachakunantsik. Puntallapitana alli yachakurqa, nunakuna parlapëta manam mantsashuntsu. Këman pensarishun, wakinkunaqa parlapänata mana munarmi imatapis nimantsik o tapumantsik, tsëmi pëkunata contestanapaq puntallapita yachakurqa, imanö parlapänapaqpis musyashunna (Pro. 15:28). Escuëlachö o Diospita yachatsikïchö pipis imatapis tapukuptin imanö contestayänëkipaqpis, ¿imanirtaq Familiachö Diosta Adorana Hora yachakuriyankitsu? (1 Ped. 3:15.)
3. ¿Imanirtaq Jehoväman markäkunantsik o yärakunantsï precisan?
3 Jehoväman markäkï. Jehoväman markäkunqantsik o yärakungantsïmi hampi cuenta yanapamäshun mana mantsakurnin yachatsikunapaq, y pëqa listom këkan yanapamänapaq (Isa. 41:10-13). ¡Tsëpita más yanapakïtaqa manachi tarishwantsu! Hinamampis, yachatsikunapaq sasa kanqan hörapis, santo espíritu yanapamashqa shumaq yachatsikunapaq kaqtam Jesus nirqan (Mar. 13:11). Tsëmi imëpis Jehoväta santo espïritunta mañakunantsik (Luc. 11:13).
4. ¿Imachöraq yanapamäshun mana mantsakurnin yachatsikunqantsikqa?
4 ¿Imakunachötaq yanapamäshun? Mantsakoq karnimpis mana haqita yachatsikurninqa, kallpata y valortam tsarintsik, y tsënöpam santo espíritu yanapëkämanqantsikta rikätsikuntsik (Hech. 4:31). Tsëkunam yanapamäshun shamoq tiempokunachö imëka pruëbakuna kaptimpis tsarakunapaq. Jehoväpa yanapakïninwanqa manam mantsakushunnatsu y masmi markäkushun pë salvakoq kanqanman (Isa. 33:2). Hinamampis, Kamakoq Yayantsikta kushitsinqantsikta musyarmi, noqantsikpis kushishqa kashun (1 Ped. 4:13, 14). Tsëmi Jehová yanapamänantsikta musyëkarqa, mana mantsakïta Gobiernompita yachatsikunantsik.