Diospa kaqman yarpachakïmi yanapamäshun alli yachatsikunapaq
1. ¿Imataq Jesusta yanaparqan más precisaq rurëta mana qonqanampaq?
1 Inti o Rupay manaraq heqaptin hasta ampinqanyaqmi, Jesusqa qeshyëkaqkunata kachakätsirqan y nunakunapita demoniokunata qarqurqan. Waränin Jesusta mana tarirmi, qateqninkunaqa ashiyarqan, y taririrnam niyarqan: “Tëte, llapan nunacunam ashicayäshunqui”, kënöqa niyarqan milagrokunata rurar siguinanta munarmi. Pero Jesusqa Diospa Gobiernompita yachatsikïta más precisaqpaq churarmi, kënö contestarqan: “Acu ewashun waquin caq amanulla marcacunamanraq. Tsecunachopis yachatsicushaqmi. Tsëpaqmi que patsaman shamushqa cä”. ¿Imataq yanaparqan ruranampaq kaqta mana qonqanampaq? Diospa kaqman yarpachakunampaq y mañakunampaq manaraq patsapis waräptin shärikunqanmi (Mar. 1:32-39). Y noqantsiktaqa, ¿imanötaq yanapamantsik Diospa kaqman yarpachakï?
2. ¿Imakunamanraq yarpachakushwan mana mantsakushpa yachatsikunapaq?
2 ¿Imakunamantaq yarpachakushwan? Jesusqa rikarqanmi nunakuna ‘mitseqninnaq üsha cuenta pantacashqa puriquicayanqanta’ (Mat. 9:36). Noqantsikpis yarpachakushwanmi nunakuna alli willakïta musyayänan alläpa precisanqanman, y ushakë hunaq chämunan witsankunachöna kawëkanqantsikman (1 Cor. 7:29, QKW). Yarpakachashwanmi Jehová imanö kanqanman, ruranqanman y pëpa Testïgon kanqantsikman, hina Bibliachö alläpa shumaq yachatsikïkuna tarinqantsikman, y atskaq nunakuna tsëta mana musyayanqanmampis (Sal. 77:11-13; Isa. 43:10-12; Mat. 13:52).
3. ¿Imë hörakunataq Diospa kaqman yarpachakushwan?
3 ¿Imë höraraq yarpachakushwan? Wakinkunaqa patsapis manaraq waräptinmi Jesusnö shärikuriyan. Wakinkunanam ampipa manaraq patsäkurnin Diospa kaqman yarpachakuyan (Gén. 24:63). Pero imëka rurëyoq karnimpis, Diospa kaqman yarpachakunapaqqa tiempota rakishwanmi. Hina wakinkunaqa cärrochö ëwëkar, y mikuyanqan höram Diospa kaqman yarpachakuyan. Wakin cristiänokunaqa, Bibliapita yachatsikoq manaraq yarqurmi yarpachakuyan, tsënöpa mana mantsakushpa alli yachatsikuyänampaq.
4. ¿Imanirtaq Diospa kaqman yarpachakushwan?
4 Diosta mañakurirnin yarpachakushqaqa, masmi Jehoväpa kaqchö ima rurëtapis munashun, pëpa kaqta puntaman churashun y imëpis yachatsikunapaqmi sinchikushun. Diospa kaqman yarpachakï Jesusta yanapashqa kaptinqa, noqantsiktanäqa masmi yanapamäshun.