Wiyakï munaqkunata yanapashun entiendiyänampaq
1. ¿Imataq yanapamäshun nunakuna alli wiyamänapaq?
1 Yachatsikoq ëwarnin, ¿nunakunata mälas yachatsinqantsiktsuraq o shumaq entiendetsir rasun kaqta yachatsinqantsiktsuraq yanapamäshun? Tesalönicachö judïokunata Pablu parlaparninmi shumaq entiendetsir yachatsirqan. Y ‘tseno cäyitsicuptinmi waquin israel nunacuna creyicuriyarqan’ (Hech. 17:2-4). Pero ¿imanötaq nunakunata entiendetsishwan?
2. ¿Imanötaq apóstol Pablunölla yachatsikushwan?
2 Nunakuna pensayanqanta cuentapaq churashun. Territoriontsikchö nunakunata entiendetsir yanapanapaqqa, imatapis pensayanqantam cuentapaq churanantsik. Areöpagochö këkaq mana creikoq griëgokunata apóstol Pablu parlaparmi pëkuna reqiyanqampita y creiyanqampita yachatsir qallarqan (Hech. 17:22-31). Hina tsënöllam yachatsikoq ëwanapaq preparakurpis, pëkuna imata pensayanqanta y creiyanqanta cuentaman churanantsik (1 Cor. 9:19-22). Nunakuna wiyakïta mana munayaptin o tapukuyaptinqa, pensayanqanmannö o creiyanqanmannömi parlapänantsik.
3. ¿Imanötaq yanapamantsik tapukïkuna nunakunata más entiendetsinapaq?
3 Tapukunapaqqa imata pensayanqantapis musyanantsikran. Pipis mëchö këkanqanta mana musyarqa, telëfonollapaqa mëpa ëwanampaq kaqtapis manam yanapëta puëdeshwantsu. Tsënö kaqllam nunakuna imata pensayanqanta mana musyarqa, manam yanapëta puëdeshuntsu. Jesus nunakunata alli yachatsinampaqqa, imatapis pensayanqanta musyanampaqmi puntata tapupaq. Maslla tantearinapaq, huk kutim “¿imakunata rurartaq wiñey kaweyta eredashaq?” nir kapoqyoq nuna tapurqan, y manaraq contestarmi Jesusqa alleqraq musyëta tïrarqan tsë nuna imata pensanqantapis (Luc. 10:25-28, QKW). Hina huk kuti Pedru parlakïninchö pantariptinmi, Jesusqa shumaq yachëpa tapurqan y ninqan mana alli kanqanta rikätsirqan (Mat. 17:24-26). Tsëmi, wiyamaqnintsikkuna tapuramashqa o creiyanqanta niramashqaqa, imata pensayanqantapis musyanapaq tapupänantsikraq.
4. ¿Imanirtaq nunakuna entiendiyänampaq yanapashwan?
4 Imëpis nunakuna entiendiyänampaq yanaparqa, Jesus Alli Maestrontsik y punta cristiänokuna rurayanqannöllam rurëkantsik. Tsënöpam wiyaqkunatapis respetëkäshun (1 Ped. 3:15). Tsëqa yachatseq kutinapaqpis munariyanqam.