¿Alleqku yachakïkanki Jehová yachatsishunqëkipita?

1. ¿Imanötaq musyantsik Jehová sirveqninkunata yachatsita munanqanta?

¹ “Alli Yachatsikoq” Jehoväpaqqa, alläpam precisan sirveqninkuna alli yachatsikïta chaskiyänan (Isa. 30:20). Mayor Tsurinta kamarllam yachatsir qallarqan (Juan 8:28). Adan Diospa contran churakanqan patsëpitapis, Jehoväqa kuyakïwanmi hutsasapa nunakunata yachatsirqan (Isa. 48:17, 18; 2 Tim. 3:14, 15).

2. ¿Imanötaq hinantin nacionchö Dios yachatsikïkan?

² Kanan witsampis, imëpitapis masmi Jehoväqa hinantin nacionchö sirveqninkunata yachëkätsin. Isaías ninqannömi atska millón nunakuna hinantin Patsapita “Jehoväpa wayin këkaq hirka[man]” ëwëkäyan (Isa. 2:2). ¿Imapaq? Jehoväpa yachatsikïninta chaskiyänampaq (Isa. 2:3). 2010 watam Jehoväpa testïgonkuna 1.600 millones hörapitapis más Diospita y Bibliapita yachatsikuyashqa. Hina llapan semänakunam casi 105.000 congregacionkunachö Diospita yachakïkäyan, y 500 idiömapitapis maschömi mäkoq mäkoq cumplido sirveq publicacionkunata horqëkämun.

3. ¿Imanötaq Jehoväpa yachatsikïnin yanapashurqunki?

³ Paqwë yachakushqallana. ¡Imanömi Diospa yachatsikïninqa yanapëkamashqantsik! Tsënöpam Diospa shutinta y alläpa kuyamanqantsikta musyantsik (Sal. 83:18; 1 Ped. 5:6, 7). Hina musyatsimarquntsikmi kë precisaq tapukïkunapa respuestankunatapis: ¿Imanirtaq hipantsik y wanuntsik? ¿Imanötaq rasumpëpa kushikïtaqa tarintsik? ¿Imapaqraq yurirquntsik? Pero manam tsëllatatsu Jehoväqa yachatsimarquntsik, hina alli kawakunapaqpis Bibliawan yanapamarquntsikmi (Jos. 1:8).

4. ¿Ima yachatsikïkunatataq chaskïta puëdentsik, y imanirtaq Jehová yachatsimanqantsikta alli yachakunantsik?

⁴ Hina nunakunata más alli yachatsinapaqpis Jehoväqa escuëlakunawan yanapamantsikmi. 4-6 päginakunachömi Jehová qomanqantsik escuëlakunapita parlëkan. Pero wakin kaqkunaman mana ëwëta puëderqa, ¿imanirtaq puëdenqëki kaqpita alleq yachakunkitsu? ¿Ima nishwanraq jövenkunapaqqa? Profesorninkuna y wakin reqishqankunapis universidadman ëwayänampaqmi imëpis nikïkäyan. Y noqantsikqa, ¿tsëkunaman ëwayänampaqku nikantsik o Jehoväpa kaqchö masta rurayänampaqku yanapëkantsik? Jehoväpa yachatsikïninta alleq yachakurqa, shumaqmi kanan y shamoq tiempochöpis kawakushun (Sal. 119:105; Juan 17:3).

Jehová qomanqantsik wakin escuëlakuna

Leita y escribita yachakunapaq escuela

• ¿Imapaqtaq tsë escuela? Bibliata leiyänampaq y wakinkunata Diospita yachatsiyänanrëkur leita y escribita yachakuyänampaqmi.

• ¿Ëka tiempotaq kanman? Puëdeyanqanmannömi kanan.

• ¿Mëchötaq kanman? Yachatsikuyänan Wayichö.

• ¿Pikunataq tsëman ëwayan? Llapan munaqkunam.

• ¿Imanöpataq tsëman chäyan? Yachakïta munayanqanmannömi anciänokuna patsätsiyan, y llapan munaqkunatam invitayan.

Yachatsikunapaq Diospa Escuëlan

• ¿Imapaqtaq tsë escuela? Publicadorkuna alli yachatsikoq kayänampaqmi kë escuëlaqa yanapan.

• ¿Ëka tiempotaq kanman? Llapan semänakuna.

• ¿Mëchötaq kanman? Yachatsikuyänan Wayichö.

• ¿Pikunataq tsëman ëwayan? Llapan publicadorkunam. Llapan reunionkunaman shamoqkuna, Bibliapita yachakoqkuna y Biblia ninqannö kawaqkunapis kayanmanmi.

• ¿Imanöpataq tsëman chäyan? Yachatsikunapaq Diospa Escuëlata dirigeqwanmi parlayänan.

Huk idiömata yachakuyänampaq escuela

• ¿Imapaqtaq tsë escuela? Huk idiömachö Diospita yachatsikuyänampaqmi publicadorkunata yanapan.

• ¿Ëka tiempotaq kanman? Chusku o pitsqa killam. Cläseqa huk o ishkë hörakunam sábado qoyakunapa rurakanman.

• ¿Mëchötaq kanman? Yachatsikuyänan Wayichö.

• ¿Pikunataq tsë escuëlachö kayanman? Alli portakoq y huk idiömachö Diospita yachatsikïta munaq publicadorkunam.

• ¿Imanöpataq tsëman chäyan? Sucursalmi wanayanqanmannö patsätsin.

Yachatsikuyänan Wayikunata rurëpaq Escuela

• ¿Imapaqtaq tsë escuela? Yachatsikuyänan Wayikunata rurayänampaq y altsayänampaqmi. Escuëlachönö mana yachakuyaptimpis, tsëchö yanapakoqkunaqa wayikunata o salonkunata rurayänampaqmi tukïta yachakuyan.

• ¿Ëka tiempotaq kanman? Tsëman ëwaqkunapitam.

• ¿Mëchötaq kanman? Comité Regional de Construcción nishqanmi mëchö kanantapis rikan. Hinamampis ima desgraciakuna pasakunqanmanmi wakin yanapakoqkunata invitayan tsëchö yanapakuyänampaq.

• ¿Pikunataq tsëman ëwayan? Bautizädokuna y anciänokunam recomendayänan. Warmipis ollqupis ëwayanmanmi, y manam llapantaraqtsu yachayänan.

• ¿Imanöpataq tsëman chäyan? Cuestionario para trabajadores voluntarios en Salones del Reino (S-82) nishqan formulariota anciänokunata mañarirmi tsëman qellqayan.

Precursorkunapaq Escuela

• ¿Imapaqtaq tsë escuela? Tsëchömi precursorkuna yachakuyan ‘llapan rurayänampaq caqcunata’ alleq cumpliyänampaq (2 Tim. 4:5).

• ¿Ëka tiempotaq kanman? Ishkë semana.

• ¿Mëchötaq kanman? Mëchö kanampaq kaqtapis sucursalmi rikan, pero masqa Yachatsikuyänan Wayichö kanampaqmi patsätsin.

• ¿Pikunataq tsëman ëwayan? Huk watana precursor regular kaqkunam.

• ¿Imanöpataq tsëman chäyan? Tsë escuëlapaqqa superintendente de circuïtom invitan.

Betelman Tsëraq Yëkushqakunapaq Escuela

• ¿Imapaqtaq tsë escuela? Betelchö sirveqkuna trabäjonkunata alli rurayänampaqmi kë escuëlataqa rurayan.

• ¿Ëka tiempotaq kanman? Chusku killam, huk hörayanmi semänachö rurayan.

• ¿Mëchötaq kanman? Betelchö.

• ¿Pikunataq tsëman ëwayan? Betelïtakuna, huk wata o más watakuna betelchö sirveqkunam.

• ¿Imanöpataq tsëman chäyan? Kikin sucursalmi tsë escuëlapaq kaqkunata invitan.

Anciänokunapaq y Siervo Ministerialkunapaq Escuela

• ¿Imapaqtaq tsë escuela? Anciänokuna y siervo ministerialkuna congregacionchö rurayänampaq kaqkunata alli cumpliyänampaqmi (Hech. 20:28). Kë escuela imë kanampaq kaqtaqa Jehoväpa Testïgonkunata Pushaqkunam patsätsiyan.

• ¿Ëka tiempotaq kanman? Pasaq watakunapitanam anciänokunapaq huk hunaq y pullan kashqa, y huk hunaqnam siervo ministerialkunapaq.

• ¿Mëchötaq kanman? Yachatsikuyänan Wayichö o Asamblëata rurayänan Wayichömi imëpis rurayan.

• ¿Pikunataq tsëman ëwayan? Anciänokuna y siervo ministerialkunam.

• ¿Imanöpataq tsëman chäyan? Pikuna ëwayänampaqpis superintendente de circuïtom invitan.

Congregacionchö Anciänokunapaq Escuelaa

• ¿Imapaqtaq tsë escuela? Congregacionchö rurayänampaq kaqkunata anciänokuna alli cumpliyänampaqmi.

• ¿Ëka tiempotaq kanman? Pitsqa hunaqmi.

• ¿Mëchötaq kanman? Mëchö kanampaq kaqtapis sucursalmi rikan, pero masqa Yachatsikuyänan Wayichö o Asamblëata rurayänan Wayichö kanampaqmi patsätsin.

• ¿Pikunataq tsëman ëwayan? Anciänokuna.

• ¿Imanöpataq tsëman chäyan? Sucursalmi invitan.

Superintendente Circuïtokunapaq, Distrïtokunapaq y Warminkunapaq Escuelab

• ¿Imapaqtaq tsë escuela? Kë escuëlaqa superintendente de circuïtokuna y distrïtokuna congregacionkunata alli rikäyänampaq, ‘willapäcur alli yachatsicuyänampaq’ y imëka mitsikoqno congregacionchö kaqkunata alli yanapayänampaqmi yachatsin (1 Tim. 5:17; 1 Ped. 5:2, 3).

• ¿Ëka tiempotaq kanman? Ishkë killa.

• ¿Mëchötaq kanman? Sucursalmi akran.

• ¿Pikunataq tsëman ëwayan? Superintendente de circuïtokuna o distrïtokunam.

• ¿Imanöpataq tsëman chäyan? Sucursalmi warminkunatawan invitan.

Soltërokuna Bibliapita Yachakuyänampaq Escuelac

• ¿Imapaqtaq tsë escuela? Kë escuëlaqa soltero anciänokuna y siervo ministerialkuna congregacionchö más alli yanapakuyänampaqmi yachatsin. Tsë escuëlapita yarqoqkunataqa yachatsikoqkunata wanayanqan markakunamanmi mandayan. Pero kikinkuna munayaptinqa huk nacionkunamampis mandayanmi.

• ¿Ëka tiempotaq kanman? Ishkë killa.

• ¿Mëchötaq kanman? Mëchö kanampaq kaqtapis sucursalmi rikan, pero masqa Yachatsikuyänan Wayichö o Asamblëata rurayänan Wayichö kanampaqmi patsätsin.

• ¿Pikunataq tsëman ëwayan? Kë escuëlamanqa ëwayan alli saludyoq 23 a 62 watayoq soltërokunam, cristiano mayinkunata yanapëta y yachatsikoqkunata wanayanqan markakunaman ëwëta munaqkunam (Mar. 10:29, 30). Hina ishkë watana anciano o siervo ministerial sirveqkunam ëwëta puëdeyan.

• ¿Imanöpataq tsëman chäyan? Ishkë hunaq kaq asamblëachömi tsë escuëlaman ëwëta munaqkunapaq huk reunionta rurayan.

Casakushqakuna Bibliapita Yachakuyänampaq Escuelad

• ¿Imapaqtaq tsë escuela? Jehoväpa markanchö más alli yanapakuyänampaqmi casado cristiänokunata alli yachatsiyan. Casi llapan tsë escuëlapita yarqoqkunataqa yachatsikoqkunata wanayanqan markakunamanmi mandayan. Pero kikinkuna munayaptinqa huk nacionkunamampis mandayanmi.

• ¿Ëka tiempotaq kanman? Ishkë killa.

• ¿Mëchötaq kanman? Kë escuëlaqa qallashqa Centro Educativo de la Watchtower, Patterson (Nueva York) nishqan markachömi. Pero tiempowanqa, sucursal ninqan markakunachömi kë escuela rurakanqa, itsa Yachatsikuyänan Wayichö o Asamblëata rurayänan Wayichöpis.

• ¿Pikunataq tsëman ëwayan? Casädokuna, y ishkankunapis alli saludyoq 25 a 50 watayoqnömi kayänan, ishkë watapanam llapan tiemponkunawan Jehoväta servikäyänan, y Isaiasnömi “¡këchömi noqa këqa! Noqata kachamë” niyänan (Isa. 6:8). Hina ishkë watanam casado kayänan, y yachatsikoqkunata wanayanqan markakunaman ëwayänampaqpis listom këkäyänan.

• ¿Imanöpataq tsëman chäyan? Huk hunaq kaq wakin asamblëakunachömi tsë escuëlaman ëwëta munaqkunapaq huk reunionta rurayan.

Escuela Bíblica de Galaad de la Watchtower

• ¿Imapaqtaq tsë escuela? Kë escuëlaqa precursorkunata y llapan tiemponkunawan Jehoväta sirveqkunatam misionero kayänampaq yachatsin.

• ¿Ëka tiempotaq kanman? Pitsqa killa.

• ¿Mëchötaq kanman? Centro Educativo de la Watchtower, Patterson (Nueva York) nishqanchömi kë escuëlaqa rurakan.

• ¿Pikunataq tsëman ëwayan? Casädokunallam. Ishkë watana llapan tiemponkunawan Jehoväta sirveqkuna, kima watana bautizakushqakuna, ishkë watana casädokuna, y 21 a 38 watayoqnö kaqkunam solicitudtaqa apatsiyan. Ishkampis inglés idiömatam parlayänan y alli saludyoqmi kayänan. Kë llapankunachö alli këkarqa, huk nacionchö precursornö sirveqkuna, superintendente de circuïtokuna y distrïtokuna, Betelchö sirveqkuna, hina Soltërokuna Bibliapita Yachakuyänampaq Escuëlapita y Casakushqakuna Bibliapita Yachakuyänampaq Escuëlapita yarqushqakunapis ëwëta puëdeyanmi.

• ¿Imanöpataq tsëman chäyan? Hatun kaq asamblëachömi wakin nacionkunachöqa tsë escuëlaman ëwëta munaqkunapaq huk reunionta rurayan. Pero nacionnikichö tsë reunionta mana rurayaptin y ëwëta munarqa, masta musyanëkipaq markëkichö sucursalman huk cartata qellqë.

Miembros de Comités de Sucursalpaq y Warminkunapaq Escuela

• ¿Imapaqtaq tsë escuela? Betel wayichö trabäjonkunata alli rurayänampaq, congregacionkunata y circuïtokunatawan distrïtokunata yanapayänampaqmi, hina traduccionchö, publicacionkuna imprimichö, apatsichö y tukï rurëkunachö trabajaqkunata yanapayänampaqmi Comité de Sucursalchö kaqkunata kë escuëlaqa yanapan (Luc. 12:48b).

• ¿Ëka tiempotaq kanman? Ishkë killa.

• ¿Mëchötaq kanman? Centro Educativo de la Watchtower, Patterson (Nueva York) nishqan markachömi.

• ¿Pikunataq tsëman ëwayan? Comité de Sucursalchö o Comité de País nishqanchö sirveq wawqikunam.

• ¿Imanöpataq tsëman chäyan? Jehoväpa Testïgonkunata Pushaqkunam warminkunatawan invitayan.

[Päginapa ura kuchunchö willakïkuna]