Sinchi trabajanqantsikpita kushishqa kashun
1. ¿Imaraq kushishqa yachatsikunantsikta qelanäratsimashwan?
1 Diosqa nunakunata kamarqan ‘alli trabajar lograyanqampita kushikuyänampaqmi’ (Ecl. 2:24). Tsëmi Diospita yachatsikunqantsikchö allinö mana yarqapamashqaqa quizá qelanärishwan y kushishqanatsu yachatsikushwan. ¿Imataq yanapamäshun ganas gänaslla yachatsikunantsikpaq?
2. ¿Imanirtaq Diospita yachatsikï allilla yarqunampaq kaqman yarpëqa yanapamantsik?
2 Ruranqantsik allilla yarqunqanman yarpäshun. Jesusta wallkaqlla wiyakushqa kayaptimpis, yachatsikïninchöqa allillam yarqapakurqan (Juan 17:4). Juk murukoq nunapaq Jesus yachatsikunqanchöqa, Diospa Gobiernompita yachatsikïqa wakin nunakunapa shonqunman mana chänampaq kaqtam nirqan (Mat. 13:3-8, 18-22). Rikärishun kallpachakunqantsik imachö yanapakunqanta.
3. ¿Imanirtaq nintsik nunakuna mana wiyakuyaptimpis imëka alli wayoq cuenta kanqantsikta?
3 ¿Imanirtaq wayoq cuenta kanqantsikta nirqan? Murukoq nunapaq Jesus parlanqanchöqa nirqan, Diospa Gobiernompita yachatsikïta chaskikoqkunaqa ‘wayuyänampaq’ kaqtam (Mat. 13:23). Trigo jeqaramurnin poqurirqa, manam mushoq trigo plantatatsu wayurin, sinöqa, mushoq trigo murutam. Jina tsënöllam cristiänokunapa wayïnimpis o wayuynimpis, manam Jesuspa qateqnin këman chäyänampaq nunakunata yanapayanqantsu, sinöqa, Diospa Gobiernompita kutin kutin yachatsikuyanqanmi. Tsëta rurar ‘logranqantsikqa’, alläpam kushitsimantsik nunakuna mana wiyakuyaptimpis. Yachatsikurninqa Diospa jutin alläpa respëtowan alabashqa kanampaqmi yanapakuntsik (Is. 43:10-12; Mat. 6:9). ‘Diospa mincancuna’ këqa alläpa kushikïpaqmi (1 Cor. 3:9). Y Jehoväqa alläpam kushikun ‘peta alabarnin’ yachatsikunqantsikpita (Heb. 13:15, 16).
4. ¿Imanötaq mana cuentata qokushpa wakinkunata yanapëkashwan?
4 Jina yarpänantsikmi, alli trabajëkashqapis höraqa munanqantsiknö mana yarqunampaq kaqta. Capazchi Jesus Patsachö këkanqan witsanqa, yachatsikunqankunata wiyaq nunakunapis wakinqa qateqnin këman tikrayarqantsu. Jina tsënöllam Diospa Gobiernompita yachatsikunqantsikpis nunakunapa shonqunman rasllaqa chärinqatsu, pero tiempo pasariptinqa quizá mana musyanqantsikyaq Testigo tikrariyanqa. Clärom këkan, yachatsikunqantsikqa alläpam yanapakun. Tsëmi, “imayca alli wayugnö” imëpis yachatsikurnin Jesuspa qateqnin kanqantsikta rikätsikunantsik (Juan 15:8, NTCN).