Llapankunata yachatsishun
1. ¿Ima alli ejemplotataq Pablu yachatsimantsik?
1 “Alli willaquicunata willaquï.” (2 Tim. 4:5.) Alli ejemplo kashqa karninmi apóstol Pablu Timoteuta kë texto ninqanta nirqan. Jinamampis, 47 y 56 watakunachömi kima kuti viajarqan misionëronö. Y Hechos libropis willakunmi atska kuti ‘patsa waranqanpita asta inti jeqanqanyaq Pablu alli willaquicunata yachatsicunqanta’ (Hech. 23:11; 28:23). ¿Imanötaq noqantsikpis pënölla rurashwan?
2. Wayin wayin yachatsikurnin ¿imanötaq llapan nunakunaman chänapaq kallpachakushwan?
2 Wayin wayin yachatsikurnin. Atskaq nunakunam Diospa rasumpa palabranta ni imëpis wiyayashqatsu, pëkunata tarinapaqqa quizá juk hörakuna yachatsikoq yarqushwan. Y tardekunapa o semana ushëkuna yarqushqaqa capaz teyta kaqkunawan parlarita puëdishwan. Wayichö pillawampis parlarinapaqmi kallpachakunantsik, tsëta ruranapaqqa wayichö mana kaqkunata apuntëmi y juk hörakuna watukaq kutinapaq kallpachakunqantsikmi yanapamäshun. Y këkunata rurarnimpis mana tarishqaqa, quizá telëfonopa qayarishwan o cartata dejarapushwan.
3. ¿Ima alli rurëtataq puëdinki nunakuna kayanqanchö o mëchö këkarpis?
3 Cällekunachö o mëchö karpis yachatsikurnin. Jehoväpa testïgonkunaqa ‘rasumpa kaq musyatsikïtam’ wiyëta munaqkunata yachatsintsik. Höraqa yachatsikuntsik ‘cällekunachö’ o ‘nunakuna kayänan plazakunachömi’ (Prov. 1:20, 21). Imëkata ruranqantsikkunachöpis tsënöllam rurëta procurantsik. Tsëkunata rurarninmi ‘cada junaq Diospa palabranta willapäcur’ y llapankunata ‘willapar’ Jesus mandakunqanta cumplikantsik (Hech. 10:42; 17:17; 18:5; 20:20, 21, 24).
4. ¿Imanötaq mañakunqantsik y yarpachakunqantsik yanapamäshun më tsëchö yachatsikunapaq?
4 Capaz höraqa mantsapakur o alli parlëta mana yachar yachatsikïkashwantsu, pero Jehoväqa musyanmi tsëkunarëkur llapanta rurëta mana puëdinqantsikta (Sal. 103:14). Tsënö kaptimpis, këkuna pasamashqaqa, Jehovätam mañakushwan yachatsikunapaq valorta qomänapaq (Hech. 4:29, 31). Jina Bibliata japallantsik estudianqantsik hora, alli willakï alläpa precisanqanman yarpachakunqantsikmi yanapamäshun (Filip. 3:8). Tsënöpam, alli willakïkunata kuyashun y kushishqa pitapis yacharatsishun.
5. ¿Imanötaq yanapakushwan Joelpa profecian cumplikänampaq?
5 Joel Librom willakun manaraq mantsakëpaq Jehoväpa junaqnin chämuptin, markanqa alli willakïta michëkäyaptimpis mana pärëpa yachatsikurnin ocupado këkänampaq kaqta (Joel 2:2, 7-9). Tsëmi, kë rurëkunachö alli yanapakunantsik porque manam imëpis këtaqa yapë rurashunnatsu.