¿Pitaraq kë yachatsikï gustarinman?
1. ¿Imamanraq yarpashwan revistantsikkunata leyirnin y imanir?
1 Täpakoq y ¡Despertad! revistakunaqa entëru Patsachö nunakunapaqmi rurakämun. Tsëmi imëkapaq yachatsikun. Leyirninqa allim kanman revistapa yachatsikïninkunata pikunapaqnö kanqanta yarpanqantsik, y pëkunapaq apapïtam procurashwan.
2. ¿Revistantsikkunapa mëqan yachatsikïninkunaraq wakin nunakunapaqnö kanman?
2 ¿Täpakoq revistachö yachatsikunku trabajaq mayintsikwan Bibliapa juk yachatsikïnimpita parlanqantsikpaq? ¿Kastantsikkunata yanapanapaqnö juk yachatsikï kanku? ¿¡Despertad! revistachö willakunqan nacionpaq pillapis ëwëta munëkaqta musyantsikku? ¿Kanku juk revista negociu kanqan sitiukunapaqnö o gobiernupaq trabajayanqan sitiukunapaqnö? Tantiyarinapaq, itsa edäyashqakunapaqnö yachatsikïkuna kanman edäyashqakunata wätayanqan wayikunapaq. Suwakoqkunapaq, wanutsikoqkunapaq parlaq yachatsikï kaptinqa allim kanman juezkuna y policïakuna kayanqanchö revistata qarakunqantsik.
3. Revistapa yachatsikïnin pikunapaqnö pensë alli kanqanta willakarami.
3 Alli yarqunqan. 2011 wata octubri killapaq “Cómo criar hijos responsables” nishqan tïtuluyoq ¡Despertad! revistata chaskirirninmi, Sudafricachö juk pareja congregacionnimpa territoriunchö 25 escuëlakunaman telëfunupa qayakuyarqan. Tsënam, 22 escuëlakuna alumnunkunata entregayänampaq mañakuyarqan. Jina tsë nacionchö juk parëjapis tsënöllam territoryunkunapa escuëlankunachö atskata qarakuyarqan. Tsënöpam wakin profesorkunaqa alumnunkunata consejayänampaq y leyitsiyänampaq tsë revistakunata utilizäyarqan. Tsë pasakunqantam kë parëjaqa watukakoq anciänuta willariyarqan, tsëmi pëqa wakin congregacionkunatapis tsënö rurayänampaq animarqan. Tsënöpam, tsë revistata sucursalman mañakuyaptin yapëraq masta imprimiyarqan.
4. ¿Imanirtaq revistantsikkunata pï më leyiyänanta munantsik?
4 Revistantsikkunaqa alli clärum rikätsikun entëru Patsachö imëkakuna imanir pasakunqanta, y Bibliaman y Diospa Gobiernunman leyeqkuna markäkuyänampaqmi yanapan. Jina kë revistakunallam ‘salvacionpaq willakoqqa’ kayan (Is. 52:7). Tsëmi pï më nunakuna leyiyänanta munantsik. Y tsëta ruranapaqqa këtam tapukunantsik: “¿Pipaqnöraq kë yachatsikï kanman?”.