Profëtakunapita yachakushun: Miquëas
1. ¿Imatataq profëta Miquëas tapukurqan yachatsikunqan witsan, y imanirtaq yachatsikunqanqa envänu mana kanqanta nintsik?
1 Kë mana alli mundu imë ushakänampaq kaqta itsa imëllapis tapukurquntsik. Quizaschi Miquëaspis tsënölla tapukurqan Israeltawan Judäta Jehovä ushakätsinampaq kaqta willanqan witsankuna. Peru yachatsikunqanqa manam envänutsu karqan. Y 740 watachömi m.J.sh. Jehoväqa palabranta cumplirqan y ninqannöllam Samariata ushakätsirqan (Miq. 1:6, 7). Tsëpita watakuna pasariptinnam, 607 watachö Jerusalenta ushakätsiyarqan. (Miq. 3:12). Y, ¿imanötaq noqantsikqa Miquëasta qatishwan mana allikunata Jehovä ushakätsimunanta shuyanqantsikyaq?
2. ¿Imanirtaq Jehoväpa piñakïnin junaqta pacienciawan shuyarashwan y tsëqa ima ninantaq?
2 Pacienciawan shuyaräshun. Miquëasmi kënö qellqarqan: “Noqaqa Jehovärëkurmi mäkoq mäkoqlla këkäshaq. Salvamaqnï Diosllatam shuyäshaq” (Miq. 7:7). Tsënö nirqa makin choqpakushqalla shuyaranqantatsu manam nikan. Sinöqa, profëta këninta cumplirmi ocupädu këkarqan. Tsënöllam noqantsikpis ‘Diosnintsic munashqanno jutsata manana rurashpa shumaq cawacur’ Jehoväpa piñakïnin junaqta shuyarar këkänantsik (2 Pëd. 3:11, 12). Yarpäshun Jehovä pacienciayoq kaptinmi mana alli rurëninkunata nunakuna jaqiyänampaq tiempu këkanraq (2 Pëd. 3:9). Tsëmi Biblia mandamanqantsiknölla, profëtakunanö pacienciayoq kanantsik (Sant. 5:10).
3. ¿Imanirtaq santu espïritunta Jehoväta mañakïta imëpis qonqashwantsu?
3 Jehovämi kallpataqa qomäshun. Miquëas ruranampaq chaskinqanqa manam fäciltsu karqan, tsëmi yanapanampaq Jehoväta mañakurqan (Miq. 3:8). Jehoväqa musyanmi yanapakïninta noqantsikpis wananqantsikta y tsëmi Bibliaqa mañakunantsikpaq nimantsik. Mañakushqaqa Diospa kaqchö ruranapaq kaqkunata cumplinapaqmi kallpata qomäshun (Sal. 84:5, 7; Is. 40:28-31). Diosta sirwir qallanqantsikpita patsë kallpata qomarnintsik Jehovä yanapamanqantsiktaqa musyantsikmi. Tsëmi santu espïritunta mañakïta imëpis mana qonqanantsiktsu (Lüc. 11:13).
4. ¿Imatataq Miquëas ruranqampita yachakuntsik?
4 Jehoväpa munëninta rurëmi Miquëaspaqqa alläpa precisarqan. Tsë witsan nunakuna mana allikunata rurar kawayaptimpis, Jehovä munanqannöllam pëqa kawakurqan. Y kanampis llapan junaqkunam imëka mana alli rurëkuna kan. Tsëmi ‘Diosnintsikpa jutinchö imëkamayaqpis purinapaq’ listu këkänantsik (Miq. 4:5).