Profëtakunapita yachakushun: Sofonïas
1. ¿Imanö tiempukunachötaq Sofonïasqa profëta karqan, y imanirtaq noqantsikpaq juk alli ejemplu?
1 Manaraq Jesus shamuptin 700 watakuna witsanmi, Judä markachöqa uli (llulla) dios Baalta adorayaq. Mana alli rey Amontaqa tsëllaraqmi wanutsishqa kayarqan y jövin Josïasmi rey tikrarirqan (2 Crön. 33:21–34:1). Tsë witsankunam, Sofonïasta Jehovä akrarqan juiciunta willakunampaq. Itsachi Sofonïasqa Judächö reqishqa kastapita karqan, tsënö karpis nacionnimpa pushaqninkunatam ima pasanampaq kaqta Jehovä ninqannölla willarqan (Sof. 1:1; 3:1-4). Tsë profëtanöllam noqantsikpis mana mantsakushpa yachatsikunapaq kallpachakunantsik, y manam permitishwantsu Jehoväta sirwinata familiantsikkuna michämänata (Mat. 10:34-37). ¿Ima willakïtataq Sofonïas musyatsikurqan, y imataq pasakurqan?
2. ¿Imakunatataq rurashwan piñakïnin junaq Jehovä tsapämänapaq?
2 “Jehoväta ashiyë.” Juiciun junaqqa Jehovällam nunakunata salvëta puëdin. Tsëmi, Sofonïasqa Judä marka nunakunata willaparqan tiempu këkaptinraqqa, Jehoväta, alli rurëta y humildi këta ashiyänampaq (Sof. 2:2, 3). Kanan witsampis tsënöllam pasakun. Sofonïasnöllam nunakunata animantsik Diosta ashiyänampaq, peru noqantsikpis ashinantsikmi y Jehoväta mana jaqinapaqmi churapakänantsik (Sof. 1:6). Jehovätaqa ashintsik Palabranta estudiarnin y pushamänantsikpaq mañakurmi. Alli rurëtaqa ashintsik llapan kawënintsikchö limpiu karmi. Y humildi këtaqa ashintsik mandamanqantsikkunata wiyakur y Jehoväpa markan pushamänata jaqirmi.
3. ¿Imanirtaq kushi kushilla Diospita yachatsikushwan?
3 Alli yarqunqankuna. Sofonïas willakunqanqa Judäpita wakin nunakunata yanaparqanmi, peru masqa Josïastam, tsëmi pëqa wamrallaraq këkar Jehoväta ashir qallëkurqan. Tiempuwannam, Judä markachö uli dioskunata ushakätsirqan (2 Crön. 34:2-5). Kanan witsampis, muru cuentam Diospa yachatsikïninkunaqa entëruman chëkan, nänikunaman, ranraman o kasha rurinkunaman muru shikwaq cuenta y wakinnam alli allpaman shikwar alli wayun (Mat. 13:18-23). Segürum këkantsik Diospa Gobiernumpita muru cuenta yachatsikïkunata musyatsikur kallpachakïkanqantsikta, Jehovä bendicimänapaq kaqta (Sal. 126:6).
4. ¿Imanirtaq ‘altantulla këkashwan’ Jehoväpa piñakïnin junaq chämunqanyaq’?
4 Judäpita wakin nunakunaqa pensayarqan Jehovä mana ushakätsinampaq kaqtam. Peru Jehoväqa willatsikurqanmi piñakïnin junaqpaqqa ichikllana pishinqanta (Sof. 1:12, 14). Pëpa tsapäkïninta asheqkunallam salvakuyänan karqan (Sof. 3:12, 17). Piñakïnin junaq chämunqanyaq ‘altantulla këkäshun’ y wakin sirweqninkunawan juntu pëta kushishqa sirwikäshun (Sof. 3:8, 9).