Wiskukunata yanapashun Jehoväpita yachakuyänampaq
1. ¿Imanötaq Jesus rikätsikurqan wisku nunakunapaq yarpachakunqanta?
1 Jericö markapita yarqunampaqnam Jesusqa këkarqan. Tsëchömi, ishkaq wisku limushnakoqkuna qayëkachar kënö niyarqan: ‘¡Señor, llaquipaycäyällämayri!’ Wanunampaq ichikllana pishikaptinchi Jesusqa alläpa yarpachakur këkarqan. Tsënö kaptimpis, pëqa ëwëkanqampita shäkurirmi, qayarirnin kachakätsirqan (Mat. 20:29-34, NTCN). ¿Imanötaq Jesuspa llakipäkoq këninta qatishwan?
2. ¿Imanötaq wiskukunawan tinkurnin Diospita yacharatsishwan?
2 Yanapashun. Mëchö këkarpis juk wiskuwan tinkurninqa, pï kanqantsikta willarishun y yanapëta munanqantsikta nirishun. Qallananllachöqa itsa markäkamäshuntsu, porqui höraqa pëkunapitam provechakuyan y mana allitam rurayan. Peru yachanëllapaq kashqa y pëman yarpachakunqantsikta rikätsishqaqa, itsa mas tranquïlu sientikunqa. Jina, wakinkunaqa ichiklla rikäyanqanta y wakinqa pasëpa mana rikäyanqanta cuentachö katsinqantsikmi yanapamäshun pëkunata imanö yanapanapaqpis. Yanaparirnam willarishwan Bibliapita yachatsikïchö yanapakïkanqantsikta. Juk textullatapis leyirapushun, itsa Salmus 146:8 o Isaïas 35:5, 6 textukunata. Brailli qellqashqachö leyita puëdiptinqa, tapurishwanmi tsënö qellqashqachö publicacionkunata munanqanta o mana munanqanta. Jina wiyanapaq archïvukunata jw.org päginapita imanö jorqanapaq kaqtam rikäratsishwan. Tsë nunapa computadöran qellqashqata leyita puëdiptinqa, itsa yanapakïta chaskinman jw.org päginachö yachatsikïkunata y publicacionkunata jorqurnin formätu RTF nishqanchö. (Rikäri, “Juk wiskuta yanapar ruranapaq kaq. . .” recuadruta.)
3. ¿Imanötaq tarita puëdishun territoriuntsikchö wiskukunata?
3 ¿Imanötaq wiskukunata tarishun? Wayin wayin yachatsikurninqa cäsi manam imëpis wiskukunawan tinkuntsiktsu, porqui pëkunaqa mana reqiyanqankunawanqa cäsi manam parlëta munayanllatsu. Tsëmi kallpachakunantsik pëkunata tarinapaq y Diospita yachatsinapaq (Mat. 10:11). ¿Kanku wiskukuna trabäjuntsikchö o escuëlachö? Tsëqa Diospita parlapäshun. Territoriuntsikchö wiskukunapaq escuëla kaptinqa, directorninta tapurishun bibliotëkampaq braillichö publicacionkunata apapunata munanqanta o mana munanqanta. ¿Reqintsikku pillatapis wisku familiayoqta? ¿Kanku territoriuntsikchö wiskukunata yanapayänampaq alli patsätsishqa nunakuna? O ¿kanku invälidukunata cuidayänan wayikunachö wiskukuna? Tsënö kaptinqa, familianta, directorta o tsëchö trabajaqta willarishun Jehoväpa testïgunkunaqa, pëkunata yanapëta munanqantsikta. Jina willarishun braillichö y wiyayänampaq formätuchö publicacionnintsikkuna kanqanta. Bibliachö rikäratsishun wiskukunapaq Dios änikunqanta. Jina jw.org päginachö këkaq “No sé qué haría sin ella” neq vidëutam rikäratsishwan. Kë vidëuqa willakun juk wisku wawqi braillichö Bibliapa yanapakïninta tarinqantam. Imapaq watukëkanqantsikta alleq willashqaqa, itsa mas fäcil-lla pëkunawan parlakurishun.
4. ¿Imatataq yachatsimantsik Janet jutiyoq panintsikta pasanqan?
4 Wiskuyashqa Janet jutiyoq panintsikmi, wiskukuna yachayanqan wayiman ëwarqan, y tsëchömi juk shipashwan parlarqan. Kënömi nirirqan: “Jesusqa shamoq tiempuchö wiskukunapaq imata ruranampaq kaqta rikätsikunanrëkurmi, Patsachö këkar wiskukunata kachakätsirqan”. Tsëpitanam, Janetqa Apocalipsis 21:3, 4 textupita yacharatsirqan, y Diospa Gobiernun tsë änikïta imanö cumplinampaq kaqtapis. Tsë shipashqa upälla këkanqampitam kënö nirqan: “Manam ni imëpis juk wiskuqa këta nimashqatsu. Rikëta puëdeq mëtsikaq nunakunam pensayan, wisku këqa kikintsik o kastantsikkuna imatapis mana allita rurayanqampita juk castïgu kanqanta”. Corrëu electrönicu nishqampam Janetqa Yachatsikun libruta aparatsirqan, y kananqa semänachö ishkë kutim Bibliapita yachakuyan.
5. Wiskukunata kachakätsita mana puëdirpis, ¿imanötaq kawëninkuna mas alliyanqa pëkunaman interesäkushqaqa?
5 Manam Jesusnötsu wiskukunata kachakätsita puëdintsik. Kë mundupa diosninmi mëtsikaq nunakunapa pensëninta pantatsishqa, jina wiskukunatapis. Peru rasumpa kaqta entiendiyänampaqqa, Diospa Palabranwanmi llapankunata yanapëta puëdintsik (2 Cor. 4:4, NM). Jericö markachö këkarmi, Jesusqa wiskukunata alläpa llakiparnin kachakätsirqan (Mat. 20:34). Wiskukunaman interesäkurqa Jehoväta reqiyänampaqmi yanapashun, porqui pëmi kachakätsita puëdinqa y imëyaqpis kawëninkuna qonqa.