Profëtakunapita yachakushun: Habacuc
1. ¿Imanirtaq alleq entiendintsik Habacuc profëtataqa?
1 Kanan witsan mana allikuna miraqta rikarqa, fäcil-llam Habacucnö sientikushwan, pëqa Jehovätam tapurqan mana allikunata imanir rikaranqanta (Hab. 1:3; 2 Tim. 3:1, 13). Habacuc willakunqanman y mana jaqikoq kanqanman yarpachakunqantsikqa, Jehovä ushakë junaqta apamunqanyaq tsarakunapaqmi yanapamäshun (2 Pëd. 3:7).
2. ¿Imanötaq Habacucnö mana jaqikoq kashwan?
2 Jehovällapaq kashun. Pasëkanqankunapita llakikur kakunampa rantinmi, Habacucqa mäkoq mäkoqlla y Diospa kaqta rurar këkarqan (Hab. 2:1). Jehoväqa willarqan, parlanqanqa tiempunchö cumplikänampaq kaqta y mana jaqipa sirweqninkuna kawar sïguiyänampaq kaqtam (Hab. 2:2-4). ¿Imatataq këpita yachakuyan kanan cristiänukuna? Mas precïsuqa manam imë chämunampaq kaqta musyëtsu, sinöqa ushakë chämunampaq kaqta següru kanqantsikmi. Mäkoq mäkoqlla kanapaq y Diospita yachatsikïta puntaman churanapaqqa markäkïmi (yärakuymi) yanapamäshun (Heb. 10:38, 39).
3. ¿Imanirtaq Jehoväta kushishqa sirwir sïguishwan?
3 Jehoväta kushishqa sirwinqantsik. Magogpita Gog, Jehoväpa markanta qatikachar qallëkuptinqa, markäkïnintsikmi pruëbaman churakärinqa (Ezeq. 38:2, 10-12). Guërra kaptinqa imëpis mana allichömi ushan, hasta venceq kaqkunapaqpis. Imëkankunatam nunakuna oqrayan, mikïpis wallkanmi y shumaq kawë manam kannatsu. ¿Tsënö pasakuptin imanöraq sientikushun? Habacucqa shuyararqan problëmakunatam, tsëmi Jehoväta kushishqa sirwinampaq churapakarqan (Hab. 3:16-19). “Jehoväpa kushikïninqa” noqantsiktapis yanapamäshunmi pruëbakunachö tsarakunapaq (Neh. 8:10; Heb. 12:2).
4. ¿Imapitataq kanan y shamoq tiempuchö kushikushun?
4 Juiciu junaqchö tsapanqankunataqa, Jehoväqa sïguinqallam yachatsirnin (Hab. 2:14). Kawarimoqkunapis Jehoväpitam yachakuyanqa. Kanampita churapakäshun llapan puëdinqantsikmannö pëpaq y alläpa shumaq rurëninkunapita parlanapaq (Sal. 34:1; 71:17).