Imapis rasumpa kanqanta alli mana musyarqa, ama pï mëta willar purishuntsu

Kanan tiempuqa radiupa kar, televisionpa kar o Internetpa karpis rasllam imatapis musyarintsik. Tsënö kaptimpis Jehovä Diosnintsikqa rasumpa kaqllata parlanantsiktam munan. Tsëmi imatapis alleqlla mana musyarqa rasllaqa pï mëta cuentarinantsiktsu (Sl 31:5; Ex 23:1). Imapis rasumpa kanqanta mana musyëkar pitapis willarinqantsikqa allipachi llakiratsinman. Wiyanqantsikkuna rasumpa o mana rasumpa kanqanta musyanapaqqa, këkunamanmi yarpachakunantsik:

• “Willëkamaqqa, ¿rasumpa kaqtaku imëpis parlakun?”. Capazchi imatapis willakoqkunaqa llapan imanö kanqanta o imanö pasakunqanta allillaqa musyayantsu. Imatapis wiyarirlla cuentakoqkunaqa yapa yapëkurnam cuentakuyan. Tsëqa pillapis imata cuentamashqaqa rasllaqa manam creikurkunantsiktsu, sinöqa tapurinantsik tsëta mëpita jorqanqanta o pï nishqa kanqantam. Y congregacionta dirigeq wawqikunaqa masran cuidakuyänan. Pëkuna niyanqanmanmi wawqi panikunaqa mas creiyan, tsëmi imatapis willakurqa rasumpa kaqllata willakuyänan.

• “¿Cuentakunqantsik mana allichöku pitapis quedatsinqa?”. Tsënö kaptinqa ama pitapis cuentashuntsu (Pr 18:8; Flp 4:8).

• “¿Willamanqantsikkunaqa mana creipaqnöku?”. Wakinkunaqa yapa yapëkurmi imatapis mana creipaqtanö willakuyan, tsëkunapitam cuidakunantsik.

AMA JUKKUNAPAQ WASAN RIMAR PURISHUNTSU, NEQ VIDEUTA RIKÄRIR, KËKUNATA CONTESTARI:

• 

  Proverbius 12:18 ninqannö, ¿imatan pasakun wakinkunapaq mana allita parlashqa?

• 

  Jukkunapaq imatapis manaraq parlar, ¿imata ruranapaqtaq Filipensis 2:4 nimantsik?

• 

  Jukkunawan parlëkashqa, pillapis burlakoqnö o mana allita pipaqpis parlar qallëkuptinqa, ¿imataraq rurashwan?

• 

  Jukkunapaq imatapis manaraq parlar, ¿imakunatatan yarpänantsik?