“Diosman witiyë, y pëqa qamkunamanmi witimunqa” (Santiägu 4:8).

¿Mañakunqantsikta Teyta Diosqa wiyanku?

Mañakunqëkikunata Teyta Dios wiyanqanta, ¿imëllapis tapukurqunkiku? Tsënöqa mëtsikaq nunakunam tapukuyan. Imëka problëmakunapa pasarmi Teyta Dios yanapanampaq mañakuyashqa, tsënö karpis problëmankunaqa këkanllam. Tsëqa, ¿mañakunqantsikkunata manatsuraq Diosnintsik wiyan? Manam. Bibliachöqa nin, Teyta Dios munanqannö mañakushqaqa pë wiyamanqantsiktam. Tsëpaq Biblia ima ninqanta yachakurishun.

MAÑAKUNQANTSIKTA TEYTA DIOSQA WIYANMI

“Pipis mañakushuptiki qam wiyankim. Llapan nunakunapis adorayäshunëkipaq qammanmi shayämunqa” (Salmus 65:2).

Wakin nunakunaqa mañakuyan alli kayänanllapaqmi. Peru Diosman mañakuyqa manam alli kanantsikllapaqtsu. Bibliachömi kënö nin: “Llapan shonqunkunawan mañakuqkunapa nöpanchömi TEYTA DIOSa këkan [...]. Ausiliuta mañakuyaptinpis rasllam salvan” (Salmus 145:18, 19).

Awmi, Jehovä Diosqa mañakunqantsikta wiyanmi. Tsëmi kënö nimantsik: “Rowakur mañakayämaptikiqa wiyayashqëkim” (Jeremïas 29:12).

TEYTA DIOSQA PËMAN MAÑAKUNËKITAM MUNAN

“Mana jaqita Diosman mañakuyë” (Romänus 12:12).

Imëpis Teyta Diosman mañakunapaqmi Bibliachöqa nimantsik. Tsëmi rikätsimantsik Teyta Diosqa pëman mañakunata munanqanta (Mateu 26:41; Efesius 6:18).

¿Imanirtan Teyta Diosqa pëman mañakunëkita munan? Juk teytaqa wamran imata wananqanta musyanmi, tsënö karpis kikin wamran mañariptinqa kushikunmi pëman markäkunqampita o yärakunqampita. Tsënö kaqllam Teyta Diosman mañakurqa pëman markäkunqantsikta o yärakunqantsikta rikätsikuntsik, tsëmi Teyta Diosnintsikqa alläpa kushikun (Proverbius 15:8; Santiägu 4:8).

TEYTA DIOSQA NOQANTSIKPAQ YARPACHAKUNMI

Oficïnachö trabajaq nunam grädakunachö llakishqa tärëkan. Y cösasninkunatam juk cäjachö këkätsin.

“Llapan yarpakachënikikunata pëman churarkuyë, [...] pëqa alläpam qamkunapaq yarpachakun” (1 Pëdru 5:7).

Kuyamarnintsik y noqantsikpaq yarpachakurninmi Teyta Diosqa pëman mañakunata munan. Musyanmi ima problëmakunapa pasanqantsikta y yanapamënintsiktam munan.

Rey Davidqa Teyta Dios yanapananta munarmi pëman mañakurqan, y imanö sientikunqanta y imata pensanqantam willarqan (Salmus 23:1-6). Tsëmi Teyta Diosqa, kuyarnin mañakunqankunata wiyaq (Hëchus 13:22). Tsënö kaqllam noqantsiktapis kuyamarnintsik mañakunqantsikkunata wiyamantsik.

“ROGAKUSHQÄTA WIYAMAPTINMI TEYTA DIOSTA ALLÄPA KUYÄ”

Kë palabrakunaqa Bibliachömi këkan. Y tsëta qellqaq Diospa unë sirweqninqa, mañakunqanta Jehovä Dios wiyanampaq kaqtaqa segürum karqan. Tsëqa Teyta Diosman mas markäkunampaq o yärakunampaqmi yanaparqan, y imëka problëmakunapa pasar alli tsarakunampaqpis yanaparqanmi (Salmus 116:1-9).

Teyta Dios mañakunqantsikta wiyanqanta musyarninqa, manam mañakuyta dejashuntsu. Espäña nacionchö täraq Pëdruta ima pasanqanta rikärishun. Pëpa wamranqa 19 watayoqllam cärruwan juk accidentichö wanukïkurqan. Tsë llakikuykunapa pasëkarmi Pëdruqa Teyta Diosta kutin kutin rogakurqan yanapëkunampaq. ¿Teyta Diosqa mañakunqanta wiyarqanku? Pëdrum kënö willakun: “Warmïtawan noqataqa cristiänu mayïkunam shoqayämarqan, tsënömi Teyta Dios mañakunqäta wiyanqanta rikarqä”.

Juk nunan juk fötuta llakishqa rikarëkan y amïgunkunam shoqëkäyan. — Höraqa amïguntsikkuna yanapamashqam rikantsik Teyta Diosqa mañakunqantsikta wiyanqanta.

Mañakunqanqa manam wamranta kutitsirqantsu, tsënö kaptimpis, mañakuyanqanqa pëta y familiantam alläpa yanaparqan. Warmin Marïanam kënö nin: “Teyta Diosman mañakunqäqa yamë kanäpaq y alläpa mana llakikunäpaqmi yanapamarqan. Y musyarqämi imanö sientikunqäta, Teyta Dios musyanqanta”.

Bibliachö ninqan y wakin nunakuna willakuyanqanmi rikätsimantsik Teyta Diosqa mañakunqantsikta wiyanqanta. Peru Jehoväqa manam llapan mañakuyanqantatsu wiyan. Tsëqa, ¿imanirtan llapan mañakoqkunatatsu wiyan?

a Jehoväqa Diospa jutinmi (Salmus 83:18).