¿Musyarqëkiku?
Kullkukunata y palumakunata ofrendapaq apayänanta Jehovä permitinqanqa, ¿imanirtan israelïtakunapaq alli karqan?
MOISES Qellqanqan Leychöqa, kullkukunata y palumakunata ofrendapaq apayänampaq Jehovä permitinqantam neq. Ofrendakunapaq parlaq leykunachöqa, tsë ishkan animalkunapaqqa juntum imëpis parlan. Y israelïtakunaqa, mëqantapis apëta puëdiyaqmi (Lev. 1:14; 12:8; 14:30). Kullkukunata tarinan fäcil mana kaptinmi, tsë leyqa alläpa alli kaq. ¿Imanirtan tsëta nintsik?
Kullku
Kullkukunaqa usya witsankunallam Israelchö kayaq. Octubri killachö alalar qallëkuptinmi, qoñuyta ashir juk nacionkunata ëwakuyan, y tamya pasar qallëkuptinmi, Israel nacionman kutiyan (Cant. 2:11, 12; Jer. 8:7). Tsëmi tamya witsankunaqa, ofrendapaq kullkukunata tariqa fäciltsu kaq.
Bräva paluma
Peru palumakunaqa, manam kullkukunanötsu juk lädukunata ëwakuyan. Tsëmi palumakunaqa, Israelchö watampi kan (Juan 2:14, 16 ninqantawan igualaratsi). Tsë kinrë caserïukunachö y markakunachöqa, juk libru ninqannöpis, ‘palumakunatash nunakunaqa wätayaq. Llapan wayikunapa perqanchöshi palumakuna täräyänampaq uchkukuna kaq’ (Isaïas 60:8 ninqantawan igualaratsi).
Perqachö këkaq qeshunchö paluma këkan
Këqa, ¿imatataq Jehoväpita yachatsimantsik? Kuyakoq y pensëninllachö mana tsarakoq kanqantam. Pëqa palumata kar o kullkuta karpis, israelïtakuna tarita puëdiyanqantam chaskeq.