Kawënïchö Jehovä dirigimänantam dejarqö

INGLATËRRAPITA AFRICAMAN ËWÄ

1935 watachömi, Inglatërra nacionpa Darlaston markanchö Black Country niyanqan sitiuchö yurikurqä. Tsëqa, “yana nacion” ninanmi. Mëtsika fabricakunapita yana qoyë o qoshniwan junta kaptinmi, tsë sitiutaqa tsënö reqiyaq. Chusku watayoqnö këkaptïmi, teytäkunaqa Jehoväpa testïgunkunawan Bibliapita yachakur qallëkuyarqan. 14 o 15 watayoqna këkaptïmi, Diospita yachakuykanqä rasumpa kanqanta cuentata qokurirqä. Tsëmi 1952 watachö, 16 watayoq këkarnin bautizakurirqä.

Tsë witsampaqqa, cärrukunapaq repuestukunata y altsayänampaq herramientakunata rurayanqan fabricachömi trabajar qallëkurqä. Tsë fabricachö secretariu kanäpaq yachatsiyämar qallëkuyaptinmi, alläpa kushikurqä.

Juk kutim, congregacionkunata watukaq wawqi, “¿Willenhall congregacionnikichö Bibliapita yachakunapaq libru neq reunionchö yachatsikuyta puëdinkimantsuraq?” nir tapumarqan. Tsë witsanqa, ishkë congregacionmanmi reunionkunaman ëwëkarqä. Tsëmi imanö këta puëdirqätsu. Trabäjüpita mas amänu kaptinmi, semäna kaq reunionmanqa Bromsgrove këkaq sitiuchö congregacionman ëwaq kä. Tsëqa karqan, wayïpita 32 kilömetruchöran. Y semäna ushë kaq reunionmanqa, papänïkunawan karmi Willenhall congregacionman ëwaq kä.

Gustëkämaptimpis, trabäjüta dejarirmi Jehoväta sirwinqächö masta rurëta munar, congregacionkunata watukaq wawqi nimanqanta rurarqä. Tsëta decidinäpaq Jehovä yanapamanqampitaqa, manam arrepentikütsu, imëkachö yanapakunäpaq punku kichakäreq cuentam karqan.

Bromsgrove congregacionman ëwarmi, Anne jutiyoq panita reqirirqä. Pëqa alläpa shumaqllan panim karqan y Jehoväta sirwinqanchömi imëkata rurarnin këkarqan. 1957 watachömi casakuriyarqä. Tsëpitaqa, precursor regular kar, tsëpita precursor especial kar, tsëpitana congregacionkunata watukarnin y Betelchö trabajarnin llapan tiempükunawan Diosta juntu sirwiyarqö. Warmï Annewanqa, kananyaqmi alläpa kushishqa kawakuyä.

1966 watam, Galaad escuëlapa 42 kaq cläsiman ëwayarqä. ¡Alläpa kushikuypaqmi karqan! Maläui nacionmanmi mandayämarqan. Tsëchö täraq nunakuna alläpa kuyakoq y yachanëllapaq kayaptinmi, Africapa qoñoq shonqun nir tsë nacionta reqiyan. Tsëchö wallka tiempulla quedakuyänäpaq kaqtaqa, manam ichikllapis pensayarqätsu.

MALÄUI NACIONCHÖ IMËKA MANA ALLIKUNA PASAKUN

1967 wata 1 de febrëru killam, Maläui nacionman chäriyarqä. Tsë nacionchö parlayanqan idiömata yachakuyänäpaqmi juk killapa yachatsiyämarqan. Tsëpitanam, congregacionkunata watukaq wawqikunata rikaq kanäpaq mandayämarqan. Më tsëpa ëwëta puëdeq cärruwanmi viajayaq kayä. Tsë cärruqa, mayukunatapis tsimpëta puëdinqantam niyämarqan. Peru manam tsënötsu karqan. Tsë cärruqa, wallka yakukunallapam pasëta puëdirqan. Höraqa, tsuklla wayikunallachömi posadakuyaq kayä. Tsë wayikunapa tëchun oqshapita kaptinmi, tamya witsanqa hüle plasticukunata churayaq kayä mana shutumunampaq. Misionërunö yanapakuyanqä witsanqa, qallananchöqa manam fäciltsu karqan. Tsënö kaptimpis, ¡alläpa kushishqam yanapakuyarqä!

Abril killachömi cuentata qokurirqä, tsë nacionchö problëmakuna qallëkanqanta. Maläui nacionpa presidentin doctor Hastings Banda ninqantam radiuchö wiyarqä. Pëmi nirqan Jehoväpa testïgunkuna impuestukunata mana pagakunqantsikta y polïticaman mëtikunqantsikta. Peru tsë ninqankunaqa manam rasumpatsu karqan. Llapäkunam musyayarqä, polïticaman mana mëtikuyaptï y presidentipa partïdunman inscribikuyta mana munayaptï cölerakuyanqanta.

Septiembri killapaqqa, wawqi panintsikkuna më tsëchö problëmata rurëkäyanqanta presidenti nishqa kanqantam periödicukunachö willakuykäyarqan. Juk mitinta rurayanqanchömi, Jehoväpa testïgunkunata michäyänampaq kaqta presidenti willakurqan. Y 1967 wata 20 de octubri killachömi, tsë leyta patsätsirqan. Tsëpita ichik tiempullatam, policïakuna y juk nacionpita yëkamoqkunata controlaq autoridäkuna, sucursalman chäriyarqan Betel wayita wichqayänampaq y juk nacionpita tsëchö yanapakuykaq wawqi panikunata tsë nacionpita qarquyänampaq.

Kima junaqmi carcelchö llawirayarqä. Tsëpitaqa, Inglatërra nacion dominanqan Mauriciu nacionmanmi qarqarayämarqan. Peru tsë nacionchö autoridäkunaqa Diospita yachatsikuyänäta manam munayarqantsu. Tsëmi, Diosta sirweqkunata dirigeq wawqikunaqa, Rodesia nacionman ëwakuyänäpaq niyämarqan. Kananqa, Zimbäbue nirmi reqiyan. Tsëman chäriyaptïqa, juk nacionpita chaqkunata controlaq policïa tsë nacionman yëkuyänäta mana munarmi, kënö niyämarqan: “Maläui nacionpitaqa qarquyäshurqunkim. Y Mauriciu nacionchöpis quedakuyänëkita manam dejayäshurqunkitsu. Y këmanqa, mëchöpis mana chaskiyäshuptikillam shayämurqunki”. Tsëmi Anneqa waqar qallëkurqan. ¡Mëchöpis chaskiyämëta mana munayaqnömi karqan! Tsë höraqa, Inglatërraman kutikuyllatam munarqä. Tsënö këkäyaptïmi, autoridäkunaqa Rodesiachö këkaq Betelchö quedakuyänäpaq permitiyämarqan. Peru cuartelninkunaman waränin ëwayänäpaq kaqtam niyämarqan. Chipyëpa utishqam këkäyarqä, tsënö kaptimpis, llapantam Jehoväpa makinchö dejariyarqä. Peru waränin tardiqa, mana pensayanqämi pasakurqan: Zimbäbue nacionchö turistanö quedakuyänäpaqmi permitiyämarqan. Tsë junaq imanö sientikunqätaqa, manam imëpis qonqashaqtsu. Jehovä dirigikäyämanqantam cuentata qokurqä.

ZIMBÄBUE NACIONPITA MALÄUI NACIONCHÖ YANAPAKUYÄNÄPAQ NIYÄMAN

Zimbäbue nacion Betelchömi, Maläui nacion y Mozambïqui nacionchö Diospita yachatsikuyanqanta rikänäpaq niyämarqan. Maläui nacionchöqa, gobiernum wawqi panintsikkunata chikir sufrikätsirqan. Tsë nacionchö congregacionkuna imanö këkäyanqanta congregacionkunata watukaqkuna willakayämunqantam, juk idiömaman traduceq kä. Juk kutim, willakayämunqanta traducirnin paqasyaq quedakurqä. Congregacionkunachö këkaq wawqi panikunata imanö sufrikätsiyanqanta leyirmi, waqar qallëkurqä.a Tsënö kaptimpis, Jehoväta sirwir mana dejayanqampita, pëman markäkuyanqampita o yärakuyanqampita y alli tsarakurnin këkäyanqampitam alläpa kushikurqä (2 Cor. 6:4, 5).

Maläui nacionchö imëka mana allikuna pasakuptinmi, Mozambïqui nacionta ëwakoq wawqi panikunapaq y Maläui nacionchö quedaq wawqi panikunapaq publicacionninkuna mana pishinampaq, imëkata rurayarqä. Chichëwa idiömaman publicacionkunata tumatseq wawqi panikunatam, Zimbäbue nacionchö juk wawqi qarakunqan chakraman apakuyarqan. Tsë wawqiqa, tsë chakrachömi oficïnakunata y tsë idiömaman tumatseqkunapaq wayikunata ruratsishqa karqan. Tsënöpam pëkunaqa publicacionkunata traducirnin sïguiyarqan. Maläui nacionchöqa, Chichëwa idiömatam masqa parlayan.

Maläui nacionchö këkaq congregacionkunata watukaqkuna, Zimbäbue nacionman kima junaq kaq asamblëaman cada wata shayämunampaqmi patsätsipakuyarqä. Tsë asamblëaqa, Chichëwa idiömachö rurakaq. Tsëchömi, tsë asamblëachö yachatsikuyanqankunapita bosquëjukunata entregayaq. Y pëkunanam, Maläui nacionman kutirnin tsë asamblëachö wiyayanqanta wawqi panikunata willayaq. Congregacionkunata watukaq tsë valienti wawqikunata yanapayänäpaqmi, juk kutichö tsë watakuna witsan, Cristiänukunata Dirigeq Anciänukunapaq y Cristiänukunata Yanapaq Siervu Ministerialkunapaq Escuëlata rurayarqä.

1975 wata febrëru killachömi, Mozambïquichö këkaq markankunapita qeshpir ëwakoqkunapaq campamentuchö këkaq wawqi panikunata watukaq ëwarqä. Tsëchö këkaq wawqikunaqa, Jehoväta sirweqkunata dirigeqkuna niyanqannömi imatapis rurëkäyarqan. Tsënö karmi, cristiänukunata dirigeq anciänukunatapis churashqana kayarqan. Y tsë mushoq anciänukunaqa, Diosta sirwir sïguiyänampaqmi imëkata patsätsipakushqa kayarqan. Wakin patsätsipakuyanqanqa llapan nunakunapaq yachatsikuyanqan discursukuna, cada junaqpaq textukunapita yachakuyanqan y Täpakoq revistapita yachakuyanqanmi karqan. Hasta asamblëakunatapis rurëkäyarqannam. Tsë campamentukunachöqa, asamblëakunachönömi kayaq. Kayaqmi: pitsapakoq kaqkuna, mikuyta rakipakoqkuna y campamentukunachö wawqi panikunata cuidaqkuna. Jehovä yanapaptin tsë wawqi panikuna imëkata rurëkäyanqanqa, mana creipaqnömi karqan. Tsë campamentupitaqa, ¡alläpa kushishqam ëwakurqä!

1979 wata witsanmi, Maläui nacionchö Testïgukunata Zambia nacionchö sucursal dirigir qallëkurqan. Peru Maläuichö wawqi panikunataqa, wakin wawqikunanöllam kuyëkarqä y pëkunapa mañakuykarqä. Zimbäbue nacionchö Sucursalta Rikaqkunachö yanapakurmi, principal oficïnapita shamoq watukakoqkunawan atska kuti juntakarqä. Tsë reunionkunachöqa, Maläuichö, Sudafricachö y Zambia nacionchö Diospita yachatsikuyta dirigeq wawqikunapis kayaqmi. Tsë reunionkunachömi, “¿ima mastataq rurashwan Maläui nacionchö wawqi panintsikkunapaq?” nir pensayaq kayä.

Mas tiempuwanqa, wawqi panintsikkunata alläpa manana chikiyaptinmi, wakin wawqi panikunaqa Maläui nacionman kutir qallëkuyarqan. Tsë nacionchö quedakushqa kaqkunaqa, mananam alläpaqa sufriyaqnatsu. Jina tsë kinrë nacionkunachönöllam, Jehoväpa testïgunkunapa religionninta legalizäyarqan y manana michäyarqannatsu. Tsënöllam 1991 watachö Mozambïqui nacionchöpis pasakurqan. Tsënö kaptimpis, “Maläui nacionchö Testïgukunataqa, ¿imëraq micharnin dejayanqa?” nirmi pensayaq kayä.

MALÄUITA KUTIYÄ

Peru 1993 watachöqa, mananam Jehoväpa testïgunkunata gobiernu micharqannatsu. Tsëpita ichik tiempu pasariptinmi, “¿Maläuita kutinkiku?” nir juk misionëru tapumarqan. 59 watayoqna karmi, “¡Manam, alläpa awkinnam kä!” nirqä. Tsënö kaptimpis, Maläuita kutiyänäpaq niyämarnïmi, Testïgukunata Pushaqkunapita tsë junaqlla juk carta chäramurqan.

Zimbäbue nacionchö yanapakuyqa alläpam gustayämaq. Tsëmi Maläuiman kutiyänäpaq decidiqa fäciltsu karqan. Zimbäbuechö atska watakuna kashqa karmi, yachakashqana y mëtsika alli amïgukunayoq kayarqä. Testïgukunata Pushaqkunaqa, munayaptïqa Zimbäbuechö quedakuyänäpaq kaqtam niyämarqan. Fäcilchi kanman karqan quedakuyänäpaq decidiyanqäqa. Peru edäna këkarpis, Abrahanwan Sära Jehoväta wiyakurnin imëkankunata dejarir ëwakuyanqanmanmi pensar qallëkurqä (Gen. 12:1-5).

Jehoväta sirweqkunata dirigeqkunata wiyakuyänäpaqmi decidiyarqä. Qallananchö ëwayanqäpita 28 watakunana pasanqanchömi, 1995 wata 1 de febrëru killa Maläui nacionta kutiyarqä. Sucursalta Rikaq kayänäpaqmi, ishkaq wawqikunata y noqata churayämarqan, y tsëpita wallka tiempullatam Maläui nacionchö testïgukuna Diosta sirwir sïguiyänampaq patsätsipakuyarqä.

JEHOVÄMI WINATSIRNIN SÏGUIRQAN

Alläpa espantakuypaqmi karqan Jehoväpa testïgunkuna mas mirayanqanqa. 1993 watapita 1998 watayaqqa, ¡30 milpitam 42 milpitapis masman Diospita yachatsikoqkuna mirayarqä!b Diosta sirwiyanqächö mëtsika rurapakuy-yoq kayaptïmi, juk mushoq sucursalta rurayänäpaq Testïgukunata Pushaqkuna permitiyämarqan. Lilongüe markachömi, 12 hectarea chakrata rantiyarqä. Tsëchömi, Obrakunata Rikaq kanäpaq churayämarqan.

2001 wata mäyu killachömi, Testïgukunata Pushaqkunapita Guy Pierce wawqi, Jehoväpaq kanampaq tsë wayikunata ushatsirqan. Tsë nacionpitam, 2 milpitapis mas wawqi panikuna ëwayarqan. Cäsi llapan tsëchö këkaqkunam, 40 watapitapis masna Testïgu kayarqan. Gobiernu michäkunqan witsanmi, kë wawqi panikunaqa imëka sufrimientukunata mëtsika watakunapa aguantashqa kayarqan. Wallka qellëyoqllam kayaq, peru Jehovämanqa alläpam markäkuyaq y pëwanmi alli amïgu kayaq. Y mushoq Betel wayita rikapakurmi, reunionkunachö cantanqantsik cancionkunata shumaq cantarnin ëwayaq. Tsëta rikanqätaqa, kananyaqmi yarparëkä. Diosman confiakurnin tsarakoqkunata Jehovä bendicinqantam pëkunaqa rikätsikuyaq.

Betel wayita rurar ushariyaptïmi, Diospita Yachatsikuna Wayikunata ushatsinäpaq mandayämanqampita alläpa kushikurqä. Wallka qellëyoqlla congregacionkunapaq raslla rurayanqan Diospita Yachatsikuna Wayikunatam, Maläui nacionchö congregacionkunapaq rurëkäyarqan. Puntataqa, eucaliptu qerupa rämankunawan rurashqa ramädakunallachömi reunionninkunata rurayaq. Totörawanmi tëchunkunata rurayaq y bancankunaqa mitupitam kayaq. Peru tsëpitaqa, kikinkuna rurayanqan hornukunachö ladrïllukunata rurarmi trabajayaq, y tsëkunawanmi reunionninkunapaq shumaq wayikunata rurayaq. Tsënö kaptimpis, sïllakunapitapis masqa bancakunatam yachanäyaq. Pëkuna niyanqannöpis, “bancachöqa juk maspis täkuyta puëdinmi”.

Jina mëtsikaq nunakuna pëpita yachakuyänampaq Jehovä yanapanqanta rikanqäpitapis alläpam kushikurqö. Masqa, yanapakuyta munaq jövinkuna kayanqampita y yachatsiyanqanta raslla yachakuriyanqampitam alläpa kushikoq kä. Tsënö yachatsiyanqampitam, Betelchö y congregacionkunachö mas cargukunata chaskiyarqan. Jina Maläui nacionpita congregacionkunata watukaq mushoq wawqikunaqa, alläpam congregacionkunata yanapayarqan. Pëkunapita mëtsikaqqa, casädum kayarqan. Familiankuna y vecïnunkuna wamrayoq kayänampaq nikäyaptimpis, Jehoväta sirwiyanqanchö mas yanapakuyta munarmi, wamrankuna mana kanampaq decidiyarqan.

DECIDINQÄKUNAPITAM ALLÄPA KUSHIKÜ

Africachö 52 watapa yanapakuykarmi, qeshyapäkur qallëkurqä. Sucursalta Rikaqkunam Gran Bretäña nacion Betelman ëwayänäpaq Testïgukunata Pushaqkunata niyarqan. Y pëkunaqa, alli kanqantam niyarqan. Maläui nacionchö Betelpita ëwakurqa, alläpam llakikuyarqä. Peru Gran Bretäña nacion Betelchöqa, shumaqmi cuidëkäyäman.

Kawënïchö Jehovä dirigimänanta permitinqäpitam, alläpa kushikü. Kikïlla imatapis decidishqa karqa, mëchöraq trabäjürëkur këkäman karqan. Shumaq imanö kawakunäpaq kaqtaqa, Jehovällam musyarqan (Prov. 3:5, 6). Jövin kaptïqa, juk jatun emprësa imanö kanqanta rikë yachakuymi gustamaq. Peru Jehoväqa, kananyaqmi pëta sirwirnin mas kushishqa kawakunäpaq yanapamashqa.