1 | Diosman mañakushun ‘Llapan yarpachakunqantsikta’ pëta willashun

BIBLIACHÖMI KËNÖ NIN: “Llapan yarpachakuyanqëkita pëman [Diosman] churarkuyë. Pëqa qamkunapaqmi alläpa yarpachakun” (1 PËDRU 5:7).

¿Ima ninantan tsëqa?

Llapan llakikunqantsikta y yarpachakunqantsikta willanantsiktam Jehovä Diosqa munan (Salmus 55:22). Teyta Diospaqqa manam ima problëmata willanqantsikpis alläpa jatuntsu o alläpa ichiktsu. Problëmantsikkuna kaptin yarpachakushqaqa Jehoväpis yarpachakunmi. Tsëmi, Diosman mañakunantsik yamë kanapaq (Filipensis 4:6, 7).

¿Imanötan yanapamantsik?

Alläpa llakikurnin qeshyarqa, höraqa pïninnaqmi sientikuntsik. Manam wakinkunaqa imakunapa pasanqantsikta llapantaqa entiendiyantsu (Proverbius 14:10). Peru, Teyta Diosqa imapa pasanqantsikta entiendinmi y shumaqmi wiyamantsik, tsëmi imanö sientikunqantsikta mana mantsakushpa willëta puëdintsik. Jehoväqa imanir llakikunqantsikta y yarpachakunqantsikta musyanmi, tsëmi imakunapaq yarpachakunqantsikta willanata munan (2 Crönicas 6:29, 30).

Jehoväman mañakurninqa pë cuidamänapaq kaqmanmi mas confiakushun. Teyta Diospa unë sirweqninnömi següru kar kënö nishun: “Qamqa sufrinqä y llakikunqä höram yanapamanki” (Salmus 31:7). Imanö sientikunqantsikta Jehovä musyanqanmi yanapamäshun mana alläpa llakikunapaq. Pëqa manam sufrinqantsikllatatsu rikan, sinöqa pipitapis masmi imapa pasëkanqantsikta musyan, tsëmi Palabran Bibliachö consëjukunawan shoqamantsik y animamantsik.

Bibliachö këkaq consëjukunaqa, ¿imanötan Julianta yanapashqa?

Imapa pasanqan

Kënömi nin: “Alläpa yarpachakur y mana controlakuyta puëdirmi kallpachakunä (tsëqa trastorno obsesivo compulsivu qeshyam). Mana pensanqä höram imëkapaq alläpa yarpachakur qallëkü. Alli këkanqä höram illaqpita alläpa yarpachakuy chäramun. Masqa tsënö pasaman jukkunawan juntu këkaptïmi, tsëmi ‘¿ima niyanqaraq noqapaq?’ nir yarpachakü.

Imapa pasëkanqäta musyaqkunaqa imëkanöpam yanapayäman. Tsënö karpis, höraqa manam niyämanqan alläpa yanapamantsu, peru agradecikümi alli sientikunäta munar imëkata rurayanqampita.

Höraqa alläpa yarpachakurnin y mana controlakuyta puëdirmi Diosman mañakuytapis puëdïtsu. Tsëmi Teyta Jehoväman mañakunäpaq alliraq kallpachakü. Imamampis pensëkarmi raslla o saslla jukmanna pensar qallëkü. Alläpa yarpachakurmi imatapis cläruqa pensänatsu y imanö sientikunqätapis manam Jehoväta willëta puëdïtsu”.

Bibliachö consëjukunam yanapaman

“Bibliachömi yachakurqö, Diosman mañakurqa manam mëtsika palabrakunataraqtsu utilizäna. Höraqa imanö sientikunqäta willëta mana puëdirmi kënölla nï: ‘Jehovä, yanapëkallämë’. Tsënölla mañakuptïpis, Jehovä Dios entiendimanqanta y tsë höra yanapamanqantam musyä. Diosman mañakurpis, doctorkunamanmi yanapayämänampaq ëwarqö. Diosman mañakur y doctorkuna yanapayämaptinmi kananqa mas allina këkä. Teyta Diosman mañakuyqa manam noqapaq fäciltsu, tsënö kaptimpis pë kuyamanqanta y yanapamëta munanqantam següru këkä”.