¿Allitsuraq kanman noqantsikpaq alli kanqanmannö imatapis decidinqantsik?
¿Imatataq wakinkunaqa rurayan?
Wakin rurëkuna alli o mana alli kanqantaqa, cäsi llapan nunakunam cuentata qokuyan. Violacionta, pitapis wanutsiyanqanta y wamrakunata abusayanqantaqa mana allitanömi rikäyan. Tsënö kaptimpis, jukkunata alli tratayanqanta, llakipäkoq kayanqanta y justiciata rurayanqantaqa allitanömi rikäyan. Peru, ¿imatataq pensayan piwampis oqllanakuypaq, rasumpa kaqta parlëpaq y wamrakunata imanö wätëpaq? Atskaqmi niyan tsë asuntukunachöqa imata rurayanqampis allilla kanqanta. Tsëmi wakinkunaqa pëkunapaq alli kanqanmannö o wakinkuna pensayanqannö imatapis decidiyan. Peru, ¿tsënö decidiyanqanqa alliku?
PËKUNAPAQ ALLI KANQANMANNÖ IMATAPIS DECIDIYANQAN
Imatapis decidirqa concienciantsik nimanqantsiktam rurantsik. Concienciantsikqa imapis alli o mana alli kanqanta musyanapaqmi yanapamantsik (Romänus 2:14, 15). Ima alli o mana alli kanqantaqa wamrakunapis cuentata qokuyanmi, tsëmi mana allita rurarqa llakikuyan. Piwan juntakunqantsikrëkur, ima religionchö kanqantsikrëkur y mëpita kanqantsikrëkurmi concienciantsikqa winanqantsikmannö cambiarëkan. Decidinqantsik höraqa llapan yachakunqantsikta yarparmi, concienciantsik willamantsik decidinqantsik alli o mana alli kanqanta.
Concienciantsikmi yanapamantsik jukkunata entiendinapaq, agradecikoq kanapaq, alli kaqta ruranapaq y llakipäkoq kanapaqpis. Tsënöllam yanapamantsik kuyanqantsik kaqkunata mana llakitsinapaq, y penqakatsimänapaq o llakitsimänapaq kaqta mana ruranapaq.
¿Allitsuraq kanman noqantsikpaq alli kanqanmannö imatapis decidinqantsik? Garrick jutiyoq jövinqa kikin munanqannö kawanampaqmi decidirqan. Tsënö kaptimpis, tiempu pasanqanmannömi cuentata qokurqan pëpaq alli kanqanmannö imatapis ruranqanqa mana alli kanqanta. Pëmi willakun decidinqankunaqa, “jukwan jukwan kakuyman, drogakuyman, machakuyman y mana allikunaman” chätsinqanta.
WAKINKUNA PENSAYANQANMANNÖ IMATAPIS DECIDIYANQAN
Concienciantsik nimanqantsikta rurarpis, höraqa jukkuna imata niyänampaq kaqtam cuentaman churantsik. Jukkuna niyanqanta cuentaman churarqa pëkunapitam yachakushun. Pëkuna allitanö rikäyanqanta rurashqaqa, familiantsikkuna, amïguntsikkuna y marka mayintsikkunapis respetamäshunmi.
¿Allitsuraq kanman wakinkuna pensayanqanmannö imatapis decidinqantsik? Priscïla jutiyoq shipashqa amïgunkuna rurayanqantam rurarqan. Amïgunkunaqa manaraq casakur jukwan jukwan oqllanakuytam allitanö rikäyaq. Peru Priscïlaqa cuentatam qokurqan wakinkuna pensayanqanta rurarpis mana kushishqa kanqanta. Pëmi kënö willakun: “Wakinkuna rurayanqanta rurarqa manam allitsu sientikurqä. Mana allikunata decidirmi upakuna rurayanqanta rurarqä y vïdätam peligruman churarqä”.
¿IMATAN MASQA YANAPAMÄSHUN ALLI DECIDINAPAQ?
Ima alli o mana alli kanqanta decidinantsik kaptinqa, allim kanman pensanqantsikta y jukkuna pensayanqanta cuentaman churanqantsik. Tsënö kaptimpis, tsëkunallata cuentaman churarqa höraqa manam allitsu decidishun. Kikintsikllaqa manam cuentata qokuntsiktsu imatapis decidinqantsik kikintsikta o jukkunata imaman chätsimänapaq kaqta (Proverbius 14:12). Noqantsik y wakinkuna alli kanqanta pensayaptimpis capazchi allitsu kanman. Jukkuna allitanö rikäyanqampis tiempuwanqa cambiarëkanmi. Unë mana allitanö rikäyanqantapis kananqa allitanönam rikäyan. Y unë witsan imanö portakuyanqanta allitanö rikäyaptimpis kananqa mana allitanönam rikäyan.
¿Allitsuraq kanman wakinkuna pensayanqanmannö imatapis decidinqantsik?
Ima alli o mana alli kanqanta musyanapaqqa, ¿imaraq masqa yanapamäshun? ¿Imatan yanapamäshun imatapis alli decidinapaq y shamoq tiempuchö mana llakikunapaq?
Mëchö kawarpis llapantsikmi alli decidinapaq consëjuta tarita puëdintsik. Qateqnin kaqchömi yachakunki vïdëkichö alli decidinëkipaq ima yanapashunëkipaq kaqta.