¿Imanötan alli majata tarinkiman?

1, 2. (1) Juk wawqi o pani casakuyta munarqa, ¿imatataq cuentachö katsinan imatapis manaraq rurar? (2) Noviu këpaq parlarqa, ¿ima nitataq munëkantsik? (Leyiri “Maslla entiendinapaq” neqta).

¿CASAKUYTA munankiku? Kushishqa kawakurpis, atskaq wawqi panikunam casakuyta munayan. Peru casakuyta munarqa këkunatam cuentachö katsinëki: ¿Alliku Diospa kaqchö këkanki? ¿Qellëniki kanku? ¿Ima problëmapis kaptin altsëta yachankiku? (1 Cor. 7:36).a Tsënö karqa, casakurnimpis kushishqam kawakunki.

² Casakuyta munarpis, alli majata tarinanqa manam fäciltsu (Prov. 31:10). Hasta majëkipaqtanö tariptikipis, höraqa manam fäciltsu kanqa noviu kayänëkipaq ninëki.b Këchömi yachakushun juk jövin alli majata tarinampaq imata ruranampaq kaqta y noviu kanqan witsan imakunata ruranampaq kaqkunata. Y rikäshunmi casakuyta munaqkunata wawqi panikuna imanö yanapayänampaq kaqta.

¿IMANÖTAN ALLI MAJATA TARINKIMAN?

3. Juk soltëru cristiänuqa pitapis manaraq ashir, ¿imamantan pensanan?

³ Piwampis manaraq noviu karmi, puntataqa alliraq pensanëki imanö warmita o imanö ollquta munanqëkita. Tsëta mana rurarqa, manam qampaqnö kaqta akrëta yachankitsu, y llutallam piwampis noviu tikrarinki. Peru yarpänëkim bautizakushqa Testïgullawan noviu këta puëdinqëkita (1 Cor. 7:39). Tsënö nirqa manam nikantsiktsu bautizakushqa kaqkunaqa llapampis majëkipaq allilla kayanqanta. Tsëmi kë tapukuykunaman alli pensanëki: “Noqaqa, ¿imatataq vïdäwan rurëta munä? ¿Imanö ollqutataq o imanö warmitataq casakunäpaq ashikä? ¿Munanqätanöqa tarishaqtsuraq o alläpatatsuraq shuyarëkä?”.

4. Wakin soltërukunaqa, ¿imakunapaqtan Diosman mañakuyan?

⁴ Casakuyta munarqa, capazchi Jehoväta tsë asuntupaq mañakurqunkina (Filip. 4:6). Jehoväqa manam pitapis majanta ashipunampaq änishqatsu. Peru imanö sientikunqantsikta y imata wananqantsikkunataqa cuentachömi katsin. Tsëmi imata wananqëkita y imanö sientikunqëkitaqa willanëki (Sal. 62:8). Pacienciayoq y yachëyoq kanëkipaq mañakuy (Sant. 1:5). Estädus Unïduspita Johnc jutiyoq soltëru wawqim Jehoväman imanö mañakunqanta kënö willakun: “Jehovätam kënö nir mañakü: ‘casakunäpaq juk alli portakoq panita tarinäpaq yanapëkamë’. Y kënöpis nïmi: ‘Alli qowa o alli runa kanäpaq imanö kënïchö mas alliyänäpaq yanapëkamë’”. Sri Lanka nacionpita Tanya jutiyoq panipis kënömi cuentakun: “Jehovätam imëpis kënö mañakü: ‘Mana dejakoq kanäpaq, allita ruranäpaq y manaraq casakurpis kushishqa kanäpaq yanapëkamë’”. ¿Llakikunkiku majëkipaqtanö pitapis mana tarirnin? Yarpë, Teytantsik Jehoväqa, kushishqa kanëkipaqmi llapan wananqëkiwan yanapashunki (Sal. 55:22).

5. ¿Imatan soltërukunata yanapanqa Jehoväta kuyaqkunawan reqinakuyänampaq? (1 Corintius 15:58; rikäri fötuta).

⁵ Bibliachömi kënö nimantsik: “Señorpa kaqchö imëpis ocupädu këkäyë” (leyi 1 Corintius 15:58). Kë consëjuta cäsukurqa, atskaq wawqi panikunawanmi tiemputa pasanki. Y manam alli amïgukunayoq kanqëkillapitatsu kushishqa kanki, sinöqa qamnö llapan tiempunkunawan Jehoväta sirweq soltërukunawan y soltërakunawanmi reqinakunki. Y llapan tiempuykiwan Jehoväta sirwinqëkipitam kushikunki.

6. Noviuta o noviata ashikaqkunaqa, ¿imatataq yarpäyänan?

⁶ Peru noviu o novia ashillamanqa ama yarparäkuytsu (Filip. 1:10). Rasumpa kaqchöqa, juk cristiänuqa manam soltëru o casädu kanqampitatsu kushishqa kawakun, sinöqa Jehoväwan amïgu kanqampitam (Mat. 5:3). Soltëru kaptikiqa, masmi tiempuyki kanqa Jehoväpita yachatsikunëkipaq (1 Cor. 7:32, 33). Tsëmi soltëru kanqëkita alli provechanëki. Estädus Unïduspita pani Jëssicaqa cäsi 40 watayoq këkarmi casakurqan, y kënömi cuentakun: “Casakuyta munaptïpis, kushishqa kanäpaqqa yanapamarqan Diospita yachatsikurnin ocupädu kanqämi”.

IMANÖ KANQANTARAQ ALLI REQI

7. ¿Imanirtan noviu kayänëkipaq manaraq nirnin mas alliraq reqinkiman? (Proverbius 13:16).

⁷ Pitapis qampaqtanö tarishqa kanqëkita pensarqa, ¿jinan höratsuraq noviu kayänëkipaq ninkiman? Bibliachöqa yachatsikun, yachaq nunaqa alli pensëkur-raq imatapis ruranqantam (leyi Proverbius 13:16). Tsëmi mas alliqa kanqa mana musyatsïllapa, imanö kanqanta juk tiempupa maslla reqipärinqëki. Païses Bäjos nacionpita wawqi Albertmi kënö cuentakun: “Pitapis kuyanqëkiqa rasllam pasarinman o ushakärinman. Tsëmi tiemputaraq wananki imanö kanqanta maslla musyanëkipaq y manam allitsu kanman noviu kayänëkipaq jinan höra ninqëkiqa”. Pacienciawan reqirninqa itsa cuentata qokunki majëkipaqnö mana kanqanta.

8. Pitapis reqita munarqa, ¿imakunatataq juk soltëru cuentachö katsinan? (Rikäri fötuta).

⁸ Këman pensë: “¿Imanötan mana musyatsïllapa tsë gustamaq jövinta o shipashta reqïman?”. Capaz Diosta adoranantsik wayichö o juk reunionkunachö imanö kanqanta o imanö portakunqanta alkäbu kankiman, y masqa cuentatam qokunëki Diospa kaqchö imanö këkanqanta. ¿Pikunatan amïgunkuna kayan? ¿Imakunapaqtan parlayan? (Lüc. 6:45). ¿Qam pensanqëkinöku pëpis vïdanchö imata ruranampaq kaqta cläru musyan? Capaz anciänunkunata o poqu cristiänukunata tapupärinkiman (Prov. 20:18). Pëkunam niyäshunki imanö kanqampita wakinkuna reqiyanqanta o imakunachö alli kanqanta (Rut 2:11). Peru tsëkunata rurarqa manam alläpa rikaränëkitsu o lädun lädunllachö kanëkitsu o imatapis rurar penqakatsinëkitsu. Imanö sientikunqantam respetanëki.

9. Pitapis gustashunqëkita manaraq nirninqa, ¿imapitataq següru kanëki?

⁹ Tsëqa, ¿ëka tiempupatan mana musyatsïllapa gustashunqëki jövinta o shipashta reqipankiman? Gustashunqëkita saslla o raslla niriptikiqa, capaz pensanqa imatapis apurädu munanqëkita (Prov. 29:20). Peru kuyanqëkita cuentata qokuykaptin mana niptikiqa, capaz pensanqa dejädu kanqëkita (Ecl. 11:4). Peru pitapis noviu kayänëkipaq ninëkipaqqa, ¿imapitataq següru kanëki? Manam pëwan casakunëkipaqna kaqtatsu, sinöqa kikikim següru kanëki casakunëkipaq listu këkanqëkita y puëdikaptinqa pëwan casakunëkipaq kaqta.

10. Pipis kuyashurniki qamllaman yarparäkunqanta cuentata qokurqa, ¿imatataq rurankiman?

¹⁰ Peru pipis kuyashurniki qamllaman yarparanqanta cuentata qokurqa, ¿imatataq rurankiman? Tsë jövin o tsë shipash mana gustashuptikiqa, qamman mana yarparäkunampaqmi ruranqëkikunawan cläru rikätsinëki. Tsëta mana rurarqa manam kuyakoqtsu kanki (1 Cor. 10:24; Efes. 4:25).

11. Familiantsikpaq o amïguntsikpaq majan ashipurqa, ¿imatataq cuentachö katsinantsik?

¹¹ Wakin sitiuchöqa, papäninkunam o juk mayor kaq familiankunam soltërukunapaq majan ashirapur casatsiyan. Wakin sitiukunachönam familiankuna o amïgunkuna ashiyan, y tsëpitanam reqinakuyänampaq patsätsiyan, y tsënöpam rikäyan alli parëja kayanqanta o mana kayanqanta. Tsënö yanapanapaq nimashqaqa, ishkampis imata munayanqantam cuentachö katsinantsik. Amïguntsikpaqtanö o familiantsikpaqtanö pitapis tarishqa karqa imanö këninta, imanö portakunqanta, y masqa Diospa kaqchö imanö kanqantam alli rikänantsik. Qellëyoq, estudiashqa y imëkayoq kanqampitaqa, Jehoväwan amïgu kanqanmi masqa välin. Ashipuyaptimpis, kikinkunam casakuyänampaq o mana casakuyänampaqpis decidiyänan (Gäl. 6:5).

¿IMANÖTAN NOVIU KËTA QALLAYANMAN?

12. Piwampis noviu këta munarqa, ¿imatataq rurankiman?

¹² Piwampis mas reqinakuyta munarqa, ¿imanötan gustashunqëkita ninkiman?d Capazchi tinkuyanqëki höra o telëfunupa o videullamädapa parlayanqëki höra ninkiman. Peru clärum ninëki pë gustashunqëkita y maslla reqita munanqëkita (1 Cor. 14:9). “Pensamushaqraq” nishuptikiqa, shuyäri (Prov. 15:28). Peru “manam puëdïtsu” nishuptikiqa, decidinqantam respetanëki.

13. ¿Imatataq rurankiman noviu kayänëkipaq pipis nishuptiki? (Colosensis 4:6).

¹³ ¿Imatataq rurankiman noviu kayänëkipaq pipis nishuptiki? Mantsakuykarpis nishunqëkitam cuentachö katsinëki y respëtuwanmi parlapänëki (leyi Colosensis 4:6). Jinan höra contestëta mana puëdirqa, shuyäshunëkipaq niri. Peru ama alläpaqa shuyarätsitsu (Prov. 13:12). Tsë jövinwan o tsë shipashwan reqinakuyta mana munarqa, mana munanqëkita y mana puëdinëkipaq kaqtam respëtuwan cläru ninëki. Austriapita Hans jutiyoq wawqim, juk pani pëwan mas reqinakuyta munaptin ima ninqanta kënö willakun: “Noqaman mana yarparäkunampaqmi, mana munanqäta respëtuwan jinan höra nirqä. Y imanö tratanqächömi maslla cuidakurqä”. Peru pëwan noviu këta munarqa, qampis pëman yarparanqëkita y noviu kënikikunachö imanö portakuyänëkita munanqëkita cläru willë. Capaz imanö wätashqa kayanqëkipita o juk costumbriyoq kayanqëkipita jukniki juknikipis jukläya pensayanki.

¿IMANÖTAN SOLTËRUKUNATA YANAPASHWAN?

14. Soltëru wawqi panikunata yanapëta munarqa, ¿imatataq ruranantsik?

¹⁴ ¿Imanötan yanapashwan juk soltëru casakuyta munaptin? Puntataqa, imatapis lluta mana parlanapaqmi cuidakunantsik (Efes. 4:29). Kënömi pensanantsik: “¿Brömaparku imatapis lluta parlä? Juk soltëruwan soltëra parlëkaqta rikarqa, ¿gustanakuyanqantaku pensä?” (1 Tim. 5:13). Y ama kënöpis nishuntsu: “Kushishqa kanëkipaqqa casakunëkillanam faltan”. Tsënö nishqaqa mana allim sientikuyanqa. Qepa kaq pärrafuchö parlanqantsik Hans jutiyoq wawqim kënö nin: “Wakin wawqi panikunaqa kënömi niyäman: ‘¿Imanirtan casakunkitsu? Manam jövinnatsu kanki, edäyärinkinam’. Tsënö niyanqanqa jövinkunata mana allim sientikatsin y obliguëkaq cuentam tsënöqa niyan”. Tsënö ninantsikpa rantinqa, shumaq animarinapaqmi imë parlapärinapaq kaqman pensanantsik (1 Tes. 5:11).

15. (1) Romänus 15:2 ninqannö pitapis majampaq ashipurninqa, ¿imatataq cuentachö katsinantsik? (Rikäri fötuta). (2) Videuta rikärirqa, ¿imakunata mana ruranëkipaqtan yachakunki? (Leyi nötata).

¹⁵ Juk paniwan juk wawqi alli parëja kayänampaq kaqta pensarnin parlanqantsikqa, ¿allitsuraq kanman? Bibliaqa yachatsikun wakinkuna imanö sientikuyanqanta cuentachö katsinapaqmi (leyi Romänus 15:2). Wakin soltërukunaqa manam munayantsu jukkuna majan ashipuyänanta, tsëtaqa respetanantsikmi (2 Tes. 3:11). Wakinkunaqa capazchi yanapayaptin agradecikuyanqa, peru pëkuna nimashqallam yanapashwanqa (Prov. 3:27).e Wakinkunaqa yachëllapa yanapayänantam munayan. Tsëmi Alemaniapita Lydia jutiyoq pani kënö nin: “Atskaq nanakuna o ñañakuna y turikuna juntakäyanqanmanmi, tsë turita y nanata invitëta puëdiyan, tsënöpam tinkurnin kikinkunana reqinakuyanqa”.

16. ¿Imatataq soltërukuna cuentachö katsiyänan?

¹⁶ Casädu kar o soltëru karpis, llapantsikmi kushishqa këtaqa puëdintsik (Sal. 128:1). Tsëmi casakuyta munarpis, pitapis qampaqtanö manaraq tarishqa karqa, llapan puëdinqëkimannö Jehoväta sirwi. Macau markapita Sin Yi jutiyoq panim kënö nin: “Qowëkiwanqa o runëkiwanqa Shumaq Patsachömi imëyaqpis kawakunki, peru soltëru këqa ichik tiempullapam. Tsëmi soltëru këtaqa alli provechanëki”. Peru pitapis majëkipaqtanö tarishqana karqa y noviuna këkarqa, ¿imatataq rurankiman noviu kayanqëki alli kanampaq? Tsëtam qateqnin kaqchö yachakushun.