Leyeqkuna tapukuyanqan

Señorpa Cënanta Jesus patsätsinqan paqasqa, ¿mëchötan këkäyarqan yachatsikuyänampaq mandanqan 70 qateqninkuna? ¿Mananaku Jesuspa qateqnin kayarqan?

Jesuswan tsë paqas 70 qateqninkuna mana kayanqampitaqa, manam pensanantsiktsu Jesusta dejarishqa kayanqanta o qateqninkuna kayänanta Jesus manana munanqantaqa. Tsë paqasqa, Jesusqa apostolninkunallawanmi juntu këta munarqan.

Jesusqa 12 apostolninkunatanöllam 70 qateqninkunatapis kuyarqan. Llapan qateqninkunapitam 12 ollqukunata akrarqan, y pëkunatam “apostolkuna” nir qayarqan (Lüc. 6:12-16). Galilëachö këkarmi “döci apostolninkunata qayëkatsir” “Diospa Gobiernumpita willakuyänampaq y qeshyëkaqkunata alliyätsiyänampaq mandarqan” (Lüc. 9:1-6). Y tsëpitanam Judëachö këkar, “qateqninkunapita setenta masta akrëkur, [...] pëpa puntanta ëwayänampaq ishkë ishkë mandarqan” (Lüc. 9:51; 10:1). Rikärinqantsiknömi, mëchöpis yachatsikuyanqanchöqa Jesuspa qateqninkuna kayarqan.

Jesuspa qateqnin tikraq judïukunaqa, cada watam Pascua Fiestata celebrayaq, capazchi familiankunawan juntu rurayaq (Ex. 12:6-11, 17-20). Jesusqa, wanutsiyänampaq ichikllana pishikaptinmi apostolninkunawan Jerusalenta ëwarqan. Peru manam Judëachö, Galilëachö y Perëachö këkaq qateqninkunataqa nirqantsu pëwan juntu Pascua Fiestata rurayänampaq. Capazchi tsë kutichöqa apostolninkunallawan juntu këta munarqan. Tsëchi kënö nirqan: “Manaraq sufrirmi, kë Pascua Fiestachö qamkunawan mikuyta alläpa munarqö” (Lüc. 22:15).

Peru ¿imanirtan 12 apostolninkunallawan juntu këta munarqan? Tsë kutiqa manam wakin watakunanötsu kanan karqan. Ichikllachönam “nunakunapa jutsanta ushakätsinampaq” Orqu Üshanö wanunan karqan (Juan 1:29). Jerusalenchömi wanunan karqan, tsëchömi unëpitana qarëkunata Diospaq rupatsiyaq. Egiptuchö esclävu kayanqampita libri yarqayämunampaq israelïtakuna üshata mikuyanqampitapis masmi, Jesus wanunqanwanqa mëtsikaq nunakuna libri kayänan karqan (1 Cor. 5:7, 8). Jesus wanunqanrëkurmi 12 apostolkunaqa wayipa cimientun cuenta congregacionchö kayänan karqan (Efes. 2:20-22). Bibliachöqa nin sagrädu markapa o Jerusalenpa ‘cimientunchöqa döci rumikuna’ kanqantam y tsë rumikunachö döci apostolkunapa jutinkuna qellqarëkanqantam (Apo. 21:10-14). Diosnintsikpa voluntänin cumplikänampaqmi apostolkunaqa yanapakuyänan karqan. Tsëchi Jesusqa ultimu kaq Pascua Fiestata celebrayänampaq y Señorpa Cënanta patsätsinampaq 12 apostolninkunallawan juntu këta munarqan.

Manam 70 qateqninkuna ni wakin qateqninkunapis Señorpa Cënanta Jesus patsätsinqan paqasqa kayarqantsu. Peru Jesusta imëpis mana dejayaptinqa, Señorpa Cënanta patsätsinqanqa llapankunatam yanapanan karqan. ¿Imanirtan tsënö nintsik? Tsë paqasmi Jesusqa apostolninkunawan juk gobiernupaq acuerduta rurarqan, y tsë gobiernuchömi Jesuspa qateqnin tikraqkunapis kayänan karqan (Lüc. 22:29, 30).