¿Musyarqëkiku?

Unë israelïtakunataqa alläpam müsica gustaq

UNË israelïtakunaqa alläpam müsicata gustayaq. Bibliachömi willakun unë nunakunaqa ima instrumentutapis toquëta yachayanqanta o cantayanqanta. Y Bibliachöqa atska cancionkunatam tarintsik. Salmus, Cantar de los Cantäres y Lamentaciönes librukunapis cancionkunam kayan. Unë israelïtakuna imanö kawayanqampaq willakurmi juk libru kënö nin: “Bibliachöqa clärum willakun unë israelïtakunaqa imata rurarnimpis müsicata tocayanqanta y cantayanqanta”.

Imatapis müsicawanran rurayaq. Israelïtakunaqa imanö sientikuyanqanta rikätsikuyänampaqmi müsicata tocayaq o cantayaq (Is. 30:29). Gobernantikunata churayaptin, fiestakunata rurayaptin o guërrachö ganayaptinqa warmikunam kushishqa cantayaq, tushuyaq y panderëtakunata tocayaq (Juëc. 11:34; 1 Sam. 18:6, 7; 1 Rëy. 1:39, 40). Tsënöllam juk israelïta wanuptinqa, llakishqa këkäyanqanta rikätsikur cantayaq (2 Crön. 35:25). Juk librum kënö willakun: “Hebreu nunakunaqa imatapis müsicawanran rurayaq” (Cyclopedia, de McClintock y Strong).

Gobernanti mandakunqan palaciuchöpis müsicataqa tocayaqmi y cantayaqmi. Israelchö gobernantikunataqa alläpam müsica gustaq. Tsëmi Saulqa, Davidta qayatsirqan arpata tocapänampaq (1 Sam. 16:18, 23). Y Davidnam gobernanti yëkurir, mushoq instrumentukunata rurarqan, cancionkunata qellqarqan y Jehoväpa templunchö tocayänampaq juk grüputa patsätsirqan (2 Crön. 7:6; Amos 6:5). Gobernanti Salomonpis ollqukunata y warmikunatam akrarqan palaciuchö cantayänampaq (Ecl. 2:8).

Jehoväta adorarpis müsicataqa tocayaqmi y cantayaqmi. Templuchöqa cimbaluta, arpata y trompëtata alli toquëta yachaq 4 mil nunakunam kayarqan (1 Crön. 23:5; 2 Crön. 5:12). Peru manam pëkunallatsu Jehoväta adorarninqa müsicata tocayaq. Mëtsikaq israelïtakunam Jerusalenman Jehoväta adoraq ëwarnin, “Jerusalenman witsëkar cantayanqan” neq cancionkunata cantayaq (Sal. 120-134). Y judïukunapaq willakoq librum nin, israelïtakunaqa Pascuata celebrarnin Hallela neq cancionta cantayanqanta.

Kanan witsampis, Jehoväpa sirweqninkunataqa alläpam müsica gustamantsik (Sant. 5:13). Tsëmi Jehoväta alabanapaq cantantsik (Efes. 5:19). Wawqi panikunawan mas unïdu kanapaq y mana allikunapa pasarnin alli tsarakunapaqmi yanapamantsik (Hëch. 16:25; Col. 3:16). Tsënöllam yanapamantsik Jehoväman markäkunqantsikta o yärakunqantsikta rikätsikunapaq y pëta alläpa kuyanqantsikta rikätsikunapaq.