7 KAQ
15 KAQ CANCION Jehoväpa punta kaq Tsurinta alabashun
¿Imanötan yanapashunki Jehovä perdonakoq kanqan?
“Qamqa rasumpa perdonakoqmi kanki” (SAL. 130:4).
¿IMATATAQ YACHAKUSHUN?
Kuyakoq karnin Jehovä perdonamanqantsikqa manam imawampis igualantsu. Tsëta maslla entiendinapaq y valoranapaqmi Bibliachöqa ejemplukunawan entienditsimantsik. Tsëtam këchö yachakurishun.
1. Pipis “perdonëkushqëki” nimashqaqa, ¿imanirtan entiendinanqa fäciltsu?
PITAPIS ofendirishqa, “perdonëkushqëki” nimashqaqa, ¡alläpam kushikuntsik! Peru “perdonëkushqëki” nimarnintsikqa, ¿puntatanölla amïgu sïguinapaqtsuraq nikämantsik o ofendinqantsikta qonqëkunanllapaqtsuraq nikämantsik? Tsëta musyananqa manam fäciltsu. ¿Imanir? Wakin nunakunaqa pitapis perdonarqa, puntatanölla amïgu sïguiyänampaqmi nikäyan. Peru wakinkunaqa ofendiyanqanta qonqëkuyänanllapaqmi nikäyan y manam puntatanö amïgu kayänampaqtsu.
2. ¿Imanötan Bibliachöqa entienditsimantsik Jehovä perdonakoq kanqampaq? (Leyi nötata).
2 Peru Jehoväqa, ¡alläpa jukläyam! Pënöqa manam ni pï nunapis perdonakuyta yachantsu. Tsëmi salmus qellqaq kënö nirqan: “Qamqa rasumpa perdonakoqmi kanki, tsëmi qamtaqa respetayaq” (Sal. 130:4).a Jehovä perdonakoq kanqanwanqa manam imapis igualantsu, pëqa “rasumpa perdonakoqmi”. Y pënö perdonakoq këta munarqa, pëpitam yachakunantsik. Hebreu idiömachö perdonakoq nirqa, höraqa Jehovällapaqmi nikan y manam nunakunapaqqa.
3. ¿Imanirtan Jehovä perdonamanqantsikqa nunakuna perdonakuyanqampita jukläya? (Isaïas 55:6, 7).
3 Jehoväqa alläpa allim, tsëmi perdonamarnintsikqa llapan jutsantsikta qonqëkun y yapëmi alli amïgun këta puëdintsik. Tsënö kanqanta musyarqa, ¡alläpam kushikuntsik! (Leyi Isaïas 55:6, 7).
4. ¿Imanötan Jehoväqa yanapamantsik rasumpa perdonakoq kanqanta entiendinapaq?
4 Jutsasapa karmi kikintsikllapitaqa Jehovänö perdonakoq këta puëdishwantsu. Tsëta musyarmi Jehoväqa perdonakoq kanqanta maslla entiendinapaq ejemplukunawan entienditsimantsik. Tsëmi këchöqa yachakushun, jutsata ruranqantsikta qonqëkunampaq y amïgun sïguinapaq Jehovä imata ruranqanta. Ejemplukunawanmi yachakurishun Jehovä perdonakoq kanqanta entiendinapaq, tsëmi yanapamäshun Teytantsik Jehovä imanö kanqanta maslla musyanapaq y kuyanapaq.
JEHOVÄQA JUTSANTSIKKUNATAM KARUTA APAKUN
5. Jehovä perdonamarnintsikqa, ¿imatataq jutsantsikwan ruran?
5 Bibliachöqa jutsata igualatsin lasaq qepitawanmi. Gobernanti Davidmi kënö nirqan: “Mëtsika jutsatam rurarqö, tsëmi lasaq qepinö nitiräman” (Sal. 38:4). Y Salmus 25:18 y 32:5 textukunachö Jehoväpaq ‘perdonakoq’ nirqa, hebreu idiömachöqa “pallari” o “apë” ninantam entienditsikun. Tsëwanqa, ¿imatataq entiendintsik? Juk kallpasapa nuna, hombruntsikchö këkaq lasaq qepita pallarkur apakoqnömi, Diosnintsik perdonamarnintsikqa jutsantsikta karuta apakun.
‘Perdonakoq [“pallarkun”, “apakun”]’ (Sal. 25:18).
6. ¿Mëtataq Jehoväqa jutsantsikkunata apakun?
6 Y ¿mëtataq Jehoväqa jutsantsikta apakun? Tsëtam Salmus 103:12 entienditsimantsik. Kënömi nin: “Imanömi inti o rupay yarqamunan lädupita, jeqanan lädu alläpa karuchö këkan, tsënöllam Teyta Diosqa jutsantsiktapis karuman churan”. Kë textu ninqannöpis, inti o rupay yarqamunan läduqa jeqanan lädupita alläpa karuchömi këkan. Tsënömi kë versïculuqa entienditsimantsik Jehovä perdonamarnintsikqa jutsantsikta alläpa karuman apakunqanta. Tsëta entiendinqantsikqa, ¡alläpa kushikuypaqmi!
“Inti o rupay yarqamunan lädupita, jeqanan lädu alläpa karuchö këkan” (Sal. 103:12).
7. ¿Imatataq Jehoväqa jutsantsikkunawan ruran? (Miquëas 7:18, 19).
7 Jutsantsikkunata Jehovä karuta apakurqa, ¿churëkoq cuentaku yarparäkun? Manam. Gobernanti Ezequïasmi kënö nirqan: “Llapan ruranqä jutsäkunatapis, mana ni pï rikanqanmanmi churarqunki” (Is. 38:9, 17). Rasumpa arrepentikushqaqa, Jehoväqa jutsantsikkunata mana ni pï rikanqanmanmi jitarkun. Kë versïculutaqa kënö nirpis traduciyanmanmi: “Imëpis jutsata mana rurashqatanömi rikämanki”. Tsënö kanqantam Miquëas 7:18 y 19 (leyi) textu entienditsimantsik. Kë textuchömi nimantsik jutsantsikkunata lamar rurinman Jehovä jitarkunqanta. Unë witsanchöqa lamar rurinman imatapis jitarkurqa mananam tarita puëdiyaqnatsu.
“Llapan ruranqä jutsäkunatapis, mana ni pï rikanqanmanmi churarqunki” (Is. 38:17).
“Llapan jutsankunatam lamar rurinman jitarkunki” (Miq. 7:19).
8. ¿Imatataq yachakurquntsik?
8 Kë igualatsikuykunawanmi Jehoväqa entienditsimantsik perdonamarnintsikqa, ruranqantsik jutsakunata karuta apakunqanta y noqantsikqa librina y kushishqana quedarinqantsikta. Tsëmi gobernanti David kënö nirqan: “Mana allita ruranqampita y jutsata ruranqampita, Teyta Dios perdonanqan nunaqa kushishqam kawakun; Teyta Jehovä jutsannaqtana rikanqan nunaqa kushishqam kawakun” (Rom. 4:6-8). Jehovä tsënö perdonamanqantsikwanqa, ¡manam imapis igualantsu!
JEHOVÄQA RURANQANTSIK JUTSATAM USHAKÄRATSIN
9. ¿Ima ejempluwantan entiendintsik Jehovä chipyëpa perdonamanqantsikta?
9 Kananqa juk ejemplu masta rikärishun. Jehovä Diosnintsikqa Jesus wanunqanwanmi nunapa jutsanta chipyëpa ushakäratsin. Bibliachöqa clärum nimantsik jutsantsikkunata Jehovä limpianqanta y jutsa ruraq nuna limpiu quedarinqanta (Sal. 51:7; Is. 4:4; Jer. 33:8). Jutsata ushakäratsiptin, jutsa ruraq nuna imanö quedanqanta entienditsikurmi Jehovä kënö nirqan: “Jutsëkikuna yawarnö puka kaptimpis, rashtanömi yuraq tikranqa, puka tëlanö kaptimpis, yuraq millwanömi tikranqa” (Is. 1:18). Yuraq tëlata yawar o puka pintüra pintanqanta yuraqätsinanqa manam fäciltsu. Peru Jehoväqa nikämantsik perdonamashqaqa, millwa limpiu y yuraq quedanqannö limpiu quedarinapaq kaqtam.
“Jutsëkikuna yawarnö puka kaptimpis, rashtanömi yuraq tikranqa” (Is. 1:18).
10. ¿Ima ejempluwantan Jehovä entienditsimantsik perdonamanqantsikta alli entiendinapaq?
10 Punta kaq yachatsikuychömi yachakurqantsik jutsata rurarninqa, pipapis jaqannöna këkanqantsikta (Mat. 18:32-35). Tsëmi jutsata cada rurarninqa, masraq Jehoväpa jaqan kantsik. Peru Jehovä Diosnintsik perdonamarnintsikqa, “mananam debimanqëkita pagamankinatsu” nikaq cuentam perdonëkamantsik y mananam imëpis cobramäshunnatsu. Jehovä tsënö perdonamanqantsikta musyarqa, ¡alläpam kushikuntsik!
“Rogamaptikim debimanqëkita cobrarqoqtsu” (Mat. 18:32-35).
11. Jutsantsikta Jehovä borranqampaq Bibliachö parlarqa, ¿ima nitataq munëkan? (Hëchus 3:19).
11 Jutsantsikpita Jehovä perdonamarnintsikqa manam “perdonaqmi” nimantsikllatsu, sinöqa chipyëpam borrarin (leyi Hëchus 3:19). Tsëta maslla entiendinapaq këman pensarishun: ¿imatataq juk nuna ruran debinqëkita pagariptiki? Debinqëkita manana yarpänampaqmi apuntanqan cuadernuman X letrata jatunta churarin. Peru tsëta ruraptimpis, nümerukunaqa rikakuykanllam. Y ¿imataraq ruranman tsë nümerukuna mana rikakunampaq? Chipyëpam borrarinan. Tsënömi Jehoväpis perdonamarnintsikqa llapan jutsantsikta chipyëpa borrarin. Bibliata qellqayanqan tiempuchöqa, tintata utilizäyaq carbonwan, gömawan y yakuwan takushqatam. Tsëmi oqu träpuwan borrariyaptinqa, tintaqa chipyëpa borrakäreq y manam ni imapis rikakoqnatsu, y debikoq nunaqa imëpis mana debikushqanömi quedareq. Jehovä Diosnintsik perdonamarnintsik jutsantsikta tsënö borrarinqanta musyarqa, ¡alläpam kushikuntsik! (Sal. 51:9).
“Jutsëkikunapita perdonashqa [borrashqa] kayänëkipaq” (Hëch. 3:19).
12. ¿Imatataq Jehovä yana pukutëpaq parlar entienditsimantsik?
12 Isaïas 44:22 textuchönam Jehovä nimantsik perdonamarnintsik imata ruranqanta. Kënömi nin: “Mana allikunata rurayanqëkitaqa pukutë imatapis tsapar kanqannömi illakäratsishaq. Y jutsata rurayanqëkitaqa yana pukutënömi tsaparkushaq”. Jehovä Diosnintsikqa yana pukutëwan tsaparkoq cuentam perdonamantsik y mananam ni pï rikëta puëdinnatsu.
“Mana allikunata rurayanqëkitaqa pukutë imatapis tsapar kanqannömi illakäratsishaq” (Is. 44:22).
13. ¿Imanötan sientikunki jutsata ruranqëkikunapita Jehovä perdonashunqëkita musyar?
13 Këchö yachakurinqantsiknöpis, jutsata rurashqa karqa manam pensanantsiktsu tsë jutsata ruranqantsik ni imëpis mana borrakänampaq kaqta. Teytantsik Jehoväqa tsë jutsapitam Tsurin Jesuspa yawarninwan pagakushqa, y mananam kikintsikqa pagakunantsiknatsu. Llapan shonquntsikwan arrepentikushqaqa, pëqa llapan jutsantsiktam chipyëpa borrarin. Awmi, ¡rasumpam perdonamantsik!
JEHOVÄQA YAPËMI AMÏGUNTANÖ CHASKIMANTSIK
Jehovä perdonamashqaqa, yapëmi amïgun këta puëdintsik. (Leyi 14 kaq pärrafuta).
14. ¿Imanirtan Jehovä perdonamanqantsiktaqa següru këkantsik? (Fötuta rikäri).
14 Jehovä perdonamashqaqa, yapëmi amïgun këta puëdintsik. Tsëta musyarmi jutsata ruranqantsikpita penqakurtsu kawakuntsik ni castigamänata mantsapakurtsu këkantsik. ¡Jehoväqa manam chikimäshuntsu! ¿Imanirtan tsënö kanqanta següru këkantsik? Kikinmi kënö nin: “Noqaqa mana allikunata rurayanqantam perdonashaq y jutsankunataqa mananam mas yarpäshaqnatsu” (Jer. 31:34). Tsë textu ninqantam apostol Pablupis kënö nirqan: “Jutsankunataqa mananam mas yarpäshaqnatsu” (Heb. 8:12). Tsënö nirqa, ¿ima nitataq munëkarqan?
“Jutsankunataqa mananam mas yarpäshaqnatsu” (Jer. 31:34).
15. Jutsantsikkunata Jehovä manana yarpänampaq kaqta nimarnintsikqa, ¿imatataq änïkämantsik?
15 Bibliachö, yarpë nirqa, manam imatapis yarpänanllapaqtsu parlëkan, sinöqa ruranampaqmi. Këllaman pensarishun: Jesuspa lädunchö warkurëkaq suwakoq nunam Jesusta kënö nirqan: “Gobernar qallëkur noqata yarpäramanki” (Lüc. 23:42, 43). ¿Yarpänanllapaqku mañakuykarqan? Manam. Y Jesuspis manam yarpänanllapaqtsu nirqan, tsëpa rantinqa kawaritsimunampaqmi änirqan. Tsënöllam Jehoväpis jutsantsikkunata manana yarpänampaq änimarnintsikqa, tsë jutsapita manana castigamänapaq y manana yarpätsimänapaq änïkämantsik y manam qonqëkunanllapaqtsu. Pëqa chipyëpam perdonamarquntsik.
16. Biblia ninqannöpis, ¿imanötan sientikuntsik Jehovä perdonamashqa?
16 Kananqa juk ejemplu masta rikärishun jutsapita Jehovä libramashqa imanö sientikunqantsikta entiendinapaq. Jutsasapa karmi llapantsikpis “jutsapa esclävun” kantsik. Peru Jehovä Diosnintsikqa, watarätsimaqnintsik cadënata rachireq cuentam perdonamantsik, tsëmi ‘jutsapita salvakushqana’ kantsik (Rom. 6:17, 18; Apo. 1:5). Jehovä perdonamashqaqa, juk esclävu libri y kushishqa sientikunqannömi libri sientikuntsik.
“Jutsapita salvakushqa” (Rom. 6:18).
17. ¿Imanirtan nintsik Jehovä perdonamanqantsikqa qeshyanqantsikpita alliyäreqnö kanqanta? (Isaïas 53:5).
17 (Leyi Isaïas 53:5). Kananqa usharinantsikpaq juk ejemplu masta rikärishun. Bibliachöqa nimantsik, jutsaqa alläpa grävi qeshyanö kanqantam. Peru Jehoväqa tsë qeshyapitam Tsurin Jesuspa vïdanwan alliyätsimarquntsik, tsënöpam jutsata rurarpis pëwan amïgu këta puëdintsik (1 Pëd. 2:24). Juk nuna alläpa grävi qeshyanqampita alliyärirqa, alläpa kushishqam sientikun. Tsënömi noqantsikpis Jehovä perdonamashqa y pëwan amïgu sïguinata permitimashqa alläpa kushishqa sientikuntsik.
“Castïgutaqa sufrirqan [...] herïdantsikkuna alliyätsishqa kanampaqmi” (Is. 53:5).
¿IMANÖTAN YANAPAMANTSIK JEHOVÄ PERDONAKOQ KANQAN?
18. ¿Imatataq Jehovä perdonakoq kanqampita yachakurquntsik? (Leyi “¿Imanötan Jehovä perdonamantsik?” neq recuadruta).
18 Këchömi ejemplukunawan yachakurquntsik Jehovä perdonamanqantsikpita. Y këkunatam entiendirquntsik: Jehovä perdonamarnintsikqa llapan jutsantsiktam borrarin y manam ni imëpis yarpannatsu. Tsënöpam Jehoväpa amïgun sïguita puëdintsik. Tsënö kaptimpis, manam pensanantsiktsu derëchuntsik kaptin Jehovä perdonamänapaq kaqta. Tsëpa rantinqa, Jehoväqa kuyakoq y alli karmi perdonamantsik (Rom. 3:24).
19. (1) ¿Imapitataq agradecikuntsik? (Romänus 4:8). (2) ¿Imatataq qateqninchö yachakushun?
19 (Leyi Romänus 4:8). ¡Alläpam agradecikuntsik Salmus 130:4 ninqannöpis Jehovä Diosnintsik ‘rasumpa perdonakoq’ kanqampita! Peru Diosnintsik perdonamänata munarqa, Jesus kënö ninqantam cäsukunantsik: “Mana allita rurayäshoqnikikunata mana perdonayaptikiqa, manam Teytëkikunapis mana allikunata rurayanqëkipita perdonayäshunkitsu” (Mat. 6:14, 15). Jehovä Diosnintsiknö perdonakoq kanantsikpaqmi kallpachakunantsik. Peru ¿imanötan rurashwan? Tsëtam qateqninchö yachakurishun.
46 KAQ CANCION “Gracias” niyaqmi Jehovä
a Hebreu idiömachö “perdonakoq” nirqa, Jehovälla rasumpa perdonakunqampaqmi parlëkan. Juk asuntukunapaq perdonakoq niptimpis, kë versïculuchöqa Jehovällapaqmi rasumpa perdonakoq kanqanta nikan. Tsënö kanqantaqa entienditsikun Mushoq Patsachö Kawaqkunapaq Bibliallam. Peru wakin Bibliakunachöqa Salmus 130:4 textuta traducirqa, manam cuentata qokuyashqatsu Jehovälla rasumpa perdonakoq kanqampaq parlëkanqanta.