Jehovänö y Jesusnö pensëta yachakushun

1, 2. (1) ¿Imanötan Jehoväta kuyashwan? (2) ¿Imanötan Jesusqa rikätsikurqan Teytanta llapan pensëninwan kuyanqanta?

MOISES qellqanqan Leychöqa, ¿mëqan kaq mandamientutan mas väleq y mas punta kaq karqan? Jesusmi kënö nirqan: “Jehovä Diostam llapan shonquykikunawan, llapan kawënikikunawan, llapan pensënikikunawan y llapan kallpëkikunawan kuyayänëki” (Mar. 12:30). Tsënö nirqa, Jehovä munanqannö kawakunapaqmi nikämantsik. Imata munanqantsik y imata ruranqantsikpis pë munanqannömi kanan, kallpantsiktapis pëllata sirwinapaqmi utilizänantsik y hasta pë munanqannö pensanapaqmi kallpachakunantsik. Jehoväta kuyanqantsikmi pë pensanqannö pensanapaq yanapamäshun. Awmi, manam Jehovä pensanqankunataqa llapantaqa entiendita puëdishuntsu. Peru ¿imatan yanapamäshun Jehovänö pensëta yachakunapaq? Jesucristupita yachakunqantsikmi, pëqa Teytan pensanqannömi imëpis pensaq (1 Cor. 2:16).

² Jesusqa llapan pensëninwanmi Jehoväta kuyaq y allim musyaq imata rurananta Teytan munanqanta. Tsëmi sufritsiyänan kaptin o imëka mana allikunapa pasanan kaptimpis, Teytan munanqanta rurar ocupädu karqan.

3. ¿Imatataq apostol Pëdru Jesuspita yachakurqan, y imata rurayänampaqtan cristiänu mayinkunata nirqan? (1 Pëdru 4:1).

³ Pëdruwan wakin apostolkunaqa Jesuswan juntu kashqa karmi yachakuyarqan pënö pensëta. Tsëmi Pëdruqa punta kaq cartanchö cristiänu mayinkunata kënö nirqan: “Pënölla [Jesusnölla] rurayänëkipaq listu këkäyë” (leyi 1 Pëdru 4:1). “Pënölla rurayänëkipaq listu këkäyë” ninqampaqqa griëgu idiömachö entienditsikun juk soldädu alistakurnin armankunata churakunqampaqmi. Y ¿imatan noqantsiktaqa arma cuenta yanapamäshun mana alli munënintsikkunata vencinapaq o tentacionkunaman mana ishkinapaq? Apostol Pëdrum nirqan Jesus pensanqannö pensanqantsik yanapamänapaq kaqta (2 Cor. 10:3-5; Efes. 6:12).

4. ¿Imakunatataq këchö yachakushun?

⁴ Këchömi Jehovä pensanqannö pensanapaq, humildi kanapaq y alli juiciuyoq kanapaq Jesuspita yachakushun.

JEHOVÄNÖ PENSANAPAQ YACHAKUSHUN

5. ¿Imëtan apostol Pëdru rikätsikurqan Jehovänö mana pensanqanta?

⁵ Rikärishun juk kutichö apostol Pëdru Jehovä pensanqannö mana pensanqanta. Jesusmi apostolninkunata willarqan Jerusalenta ëwanampaq kaqta y tsëchö mandakoq religiösukuna prësuyänampaq kaqta, y tsëpitana sufritsir wanutsiyänampaq kaqta (Mat. 16:21). Pëdruqa musyarqanmi Dios mandamunqan akrashqa nunaqa Diospa sirweqninkunata salvanampaq kaqta, tsëchi capaz entiendirqantsu Jesusta wanutsiyänanta Diosnintsik imanir permitinampaq kaqta (Mat. 16:16). Tsëmi Pëdruqa Jesusta juk läduman apëkur kënö nirqan: “¡Teytë, ama tsënöqa parlëtsu! Qamtaqa manam tsëqa pasashunkitsu” (Mat. 16:22). Apostol Pëdruqa manam Jehovänötsu pensëkarqan, tsëmi ninqankunaqa Jesus ninqanwan igualarqantsu.

6. ¿Imanötan Jesusqa rikätsikurqan Jehovänö pensanqanta?

⁶ Peru Jesusqa Teytan Jehovänömi pensarqan. Tsëmi apostol Pëdruta kënö corregirqan: “¡Qepäman churakë Satanas! Qamqa ishkitsikoq rumim noqapaq kanki, qamqa manam Dios pensanqannötsu pensëkanki, sinöqa nunakuna pensayanqannömi” (Mat. 16:23). Jesusqa allim musyarqan Jehovä munanqanta cumplinanqa mana fäcil kanampaq kaqta y musyarqanmi hasta sufrirnin wanunampaq kaqtapis. Tsëmi Pëdru consejanqan allinö kaptimpis cäsurqantsu. Tsënömi Jesusqa apostolninkunata yachatsirqan Jehovänö pensayänampaq. Tsëtam noqantsikpis yachakuyta puëdintsik.

7. ¿Imanötan apostol Pëdruqa tiempuwan rikätsikurqan Jehovä pensanqannö pensëkanqanta? (Rikäri dibüjuta).

⁷ Peru tiempuwanqa apostol Pëdruqa Jehovänö pensëtam yachakurqan. Jehovämi decidishqa karqan juk nacionkunapita nunakuna cristiänu tikrayänampaq, tsëmi Pëdruta mandarqan Corneliuta yachatsinampaq. Cornelium mana judïu kaq nunakunapitaqa puntata cristiänu tikranan karqan. Judïukunaqa manam juk nacion nunakunawanqa juntakäyaqllatsu, tsëchi Pëdrupaqqa Corneliuta yachatsinanqa fäciltsu karqan. Peru Jehovä imata munanqanta entiendirirqa, pë pensanqannönam pensarqan. Tsëmi Corneliuta yachatsinampaq Jehovä mandaptinqa upälla ëwarqan (Hëch. 10:28, 29). Y Corneliuta y wayinchö llapan kaqkunatam yachatsirqan, y pëkunaqa bautizakuriyarqanmi (Hëch. 10:21-23, 34, 35, 44-48).

8. ¿Imanötan rikätsikushwan Jehovänö pensëkanqantsikta? (1 Pëdru 3:8).

⁸ Tiempuwannam apostol Pëdruqa cristiänu mayinkunata kënö consejarqan: “Llapëkipis juk pensëyoqlla kayë” (leyi 1 Pëdru 3:8). Llapantsikpis juk pensëyoqlla kanapaqqa Jehovänömi pensanantsik, y Jehovä pensanqankunaqa Palabran Bibliachömi qellqarëkan. ¿Imanötan Jehovänö pensashwan? Këllaman pensarishun: Jesusmi llapan qateqninkunata nirqan Diospa Gobiernunta puntaman churayänampaq (Mat. 6:33). ¿Imataraq rurashwan o nishwan congregacionnintsikpita juk wawqi o juk pani llapan tiempunwan yanapakuyta munaptin? ¿Jesusta Pëdru ninqannötsuraq consejashwan? Manachi. Tsëpa rantinqa, yanapakuyta munanqampitam felicitänantsik y yanapanantsik.

HUMILDI KASHUN

9, 10. ¿Imanötan Jesusqa apostolninkunata humildi kayänampaq yachatsirqan?

⁹ Prësuyänan paqasmi Jesusqa apostolninkunata yachatsirqan humildi kayänampaq. Jesusqa manaraq wanukurmi apostolninkunawan juntu mikurita munarqan, tsëmi Pëdrutawan Juanta mandarqan alistapakuyänampaq. Y pëkunaqa capazchi yakutawan toällatapis alistayarqan. ¿Peru piraq chaqkunapa chakinkunataqa awipunman karqan?

¹⁰ Tsëtaqa esclävukunallam rurayaq. Peru kë kutichöqa, Jesusmi janan kaq röpanta jipiskir, tseqllanman toällata churarkur, llapan apostolninkunapa chakinkunata yakuwan awipur qallëkurqan. Tsëta rikarqa, ¡apostolninkunaqa manachi creiriyarqantsu! (Juan 13:4, 5). Jesusqa 12 apostolninkunapa chakinkunatam awipurqan, hasta Jüdaspa chakintapis. Llapankunapa chakinkunata awinanqa manachi fäciltsu karqan. Jesusqa, ¡rasumpam humildi karqan! Tsëpitanam apostolninkunata pacienciawan kënö entienditsirqan: “¿Musyayankiku imanir chakikikunata awimunqäta? Qamkunaqa, Maestru y Señor nirmi reqiyämanki, y rasuntam niyanki, noqaqa tsëmi qamkunapaq kä. Tsëmi Señor y Maestru këkar chakikikunata yakuwan awimushqa këkaptïqa, qamkunapis jukniki juknikikuna chakikikunata awipänakuyänëki” (Juan 13:12-14).

11. ¿Imanötan Pëdruqa rikätsikurqan humildi këta yachakushqa kanqanta? (1 Pëdru 5:5; dibüjuta rikäri).

¹¹ Pëdruqa Jesuspitam humildi këta yachakurqan. Jesus ciëluta kutiriptinmi Pëdruqa yurikunqampita cöju nunata alliyäratsirqan (Hëch. 1:8, 9; 3:2, 6-8). Y nunakunaqa maslla musyëta munarmi atskaq juntakäyarqan (Hëch. 3:11). Pëdru kawanqan tiempuchöqa, nunakunaqa mas reqishqa y alabashqa këtam munayaq. Y Pëdruqa, ¿imatataq rurarqan? ¿Alabayänantaku munarqan? Manam. Pëqa humildim karqan. Tsëmi Jehoväwan Jesus yanapashqa kayaptin tsë cöju nunata alliyätsishqa kanqanta nirqan. Y Jesuspaq parlarmi kënö nirqan: “Pëpa jutinrëkur y jutinman markäkuyanqärëkurmi o yärakuyanqärëkurmi, kë rikëkäyanqëki y reqiyanqëki nunaqa alliyärishqa” (Hëch. 3:12-16). Y tiempuwannam, apostol Pëdruqa cristiänukunata consejarqan humildi kayänampaq. Griëgu idiömachö humildi këpaq parlarninqa entienditsikun imëka röpatanö humildi këta vistikuypaqmi. Tsëtaqa capaz nirqan apostolninkunapa chakinkunata yakuwan awipunampaq Jesus tseqllanman toällata churanqanta yarparnin (leyi 1 Pëdru 5:5 y nötata).

12. ¿Imanötan apostol Pëdrunöpis humildi këta yachakushwan?

¹² Y noqantsikqa, ¿imanötan Pëdrunöpis humildi këta yachakushwan? Manam wakinkunapita mas alli kanqantsiktaqa pensanantsiktsu. Tsënö pensanqantsikta cambiarmi rasumpa humildiqa kashun. Tsëtam griëgu idiömachö entienditsikun 1 Pëdru 5:5 textuchö “humildi” këpaq parlarnin. Jehoväta y nuna mayintsiktaqa sirwintsik rasumpa kuyarmi y manam pipis alabamänata munartsu. Tsëqa, ¿imanötan humildi kanqantsikta rikätsikushwan? Ruranqantsikkunata jukkuna mana rikäyaptin o mana musyayaptimpis, Jehovä Diosnintsikta y wawqi panintsikkunata kushishqa sirwirmi (Mat. 6:1-4).

“ALLI JUICIUYOQ” KASHUN

13. ¿Imanötan yanapamantsik “alli juiciuyoq” kanqantsik?

¹³ ¿Imanötan yanapamantsik “alli juiciuyoq” kanqantsik? (1 Pëd. 4:7). Alli juiciuyoq karqa imatapis Jehovä munanqannömi decidishun, Jehoväwan amïgu kanqantsiktam mas valorashun, manam llapantapis musyanqantsiktaqa pensashuntsu y imata rurëta munarpis Jehovämanran puntata mañakushun.a

14. ¿Imëtan apostol Pëdruqa Jehoväman confiakurqantsu?

¹⁴ Jesusqa prësuyänan paqasmi, discïpulunkunata kënö nirqan: “Kanan paqasqa llapëki[m] dejarayämanki”. Y Pëdruqa kikinman confiakurmi kënö nirqan: “Pasashunqëkita rikar llapankuna dejayäshuptikipis, ¡noqaqa mana[m] imëpis dejashqëkitsu!”. Y Jesusqa llapan discïpulunkunatam kënö consejarqan: “Alkäbu alkäbu y mañakur këkäyë” (Mat. 26:31, 33, 41). Tsë consëjuta cäsukushqa karqa, Pëdruqa valientim kanman karqan y Jesuspa discïpulun kanqantam ninman karqan. Peru mana cäsukushqa karmi Jesusta negarirqan, y tsëpitam alläpa llakikurqan (Mat. 26:69-75).

15. ¿Imatan Jesusta yanaparqan wanutsiyänan paqas alli juiciuyoq kanampaq?

¹⁵ Peru Jesusqa llapan shonqunwanmi Jehoväman confiakurqan. Tsëmi jutsannaq nuna këkarpis, wanutsiyänan paqasqa kutin kutin Teytanman mañakurqan. Tsënöpam Teytampa voluntäninta cumplirqan (Mat. 26:39, 42, 44; Juan 18:4, 5). Y Pëdruqa, Jesustam rikarqan Teytanman alläpa mañakunqanta, tsëtaqa manachi imëpis qonqarqantsu.

16. ¿Imanötan apostol Pëdruqa rikätsikurqan alli juiciuyoq këta yachakushqa kanqanta? (1 Pëdru 4:7).

¹⁶ Y tiempuwanqa apostol Pëdruqa Jehoväman confiakuytam yachakurqan, tsëmi pëman imëpis mañakoq. Jesus kawariramurqa, Pëdruta y wakin apostolkunatam nirqan yachatsikuyänampaq santu espïrituwan yanapanampaq kaqta. Peru nirqanmi santu espïrituta manaraq chaskirqa, Jerusalenchö kayänampaq (Lüc. 24:49; Hëch. 1:4, 5). ¿Imatataq apostol Pëdru Jerusalenchö rurarqan? Bibliachömi nin, Pëdruwan wakin cristiänukuna Teyta Diosman ‘mañakur këkäyanqanta’ (Hëch. 1:13, 14). Y apostol Pëdruqa punta kaq cartanchömi cristiänu mayinkunata animarqan alli juiciuyoq kayänampaq y Teyta Diosnintsikman confiakur imëpis mañakuyänampaq (leyi 1 Pëdru 4:7). Apostol Pëdruqa, Jehoväman confiakuytam yachakurqan y congregacionchömi allipa yanapakurqan (Gäl. 2:9).

17. Ruranantsikpaq kaqkuna fäcil-lla ruranapaq kaptimpis, ¿imatataq puntata rurashwan? (Fötuta rikäri).

¹⁷ Alli juiciuyoq kanapaqqa, Jehovämanmi imëpis mañakunantsik. Imata rurarpis o ruranantsikpaq kaqkuna fäcil-lla ruranapaq kaptimpis, puntataqa Jehovämanraqmi yanapamänapaq mañakunantsik. Jehoväqa allim musyan noqantsikpaq ima alli kanqanta, tsëmi imata decidinantsik kaptimpis pëmanraq imëpis mañakunantsik.

18. ¿Imatataq apostol Pëdrunöpis yachakuyta puëdintsik?

¹⁸ Alläpam kushikuntsik Jehovä imanö kanqampita yachakurir, pënö këta puëdinqantsikta (Gen. 1:26). Peru manam Jehovänöqa llapanta musyëta puëdishuntsu (Is. 55:9). Tsënö kaptimpis apostol Pëdrunömi humildi këta, alli juiciuyoq këta y Jehovänö pensëta yachakuyta puëdintsik.