Jehovä ninqankunaman confiakushun, ama kikintsikllamanqa

1. ¿Imanirtan Pabluqa kushishqa sientikurqan?

APOSTOL PABLUQA, wanutsiyänampaq kaqtam musyarqan. Peru vïdanchö ruranqankunaman pensarmi alläpa kushikurqan. Kënömi nirqan: “Carrërachömi ushananyaq cörrirqö y creinqächömi firmi tsarakurqö” (2 Tim. 4:6-8). Pabluqa Jehoväta sirwirmi allikunata decidirqan y decidinqankunawan Jehovä kushishqa këkanqantam següru karqan. Noqantsikpis Pablunömi, Jehovä kushishqa kananta munar allikunata decidita munantsik. Peru ¿imatan yanapamäshun allikunata decidinapaq?

2. ¿Ima nitataq apostol Pablu munëkarqan “markäkoq o yärakoq kanqantsikmi pushamantsik” nirqa?

² Apostol Pablum kënö nirqan: “Markäkoq o yärakoq kanqantsikmi pushamantsik manam rikanqantsiktsu” (2 Cor. 5:7). ¿Ima nitataq Pablu munëkarqan “markäkoq o yärakoq kanqantsikmi pushamantsik” nirqa? Jehoväman markäkoq nunaqa imatapis pë munanqannömi decidin, y segürum këkan Diosnintsik consejakunqankunata rurarninqa kanan tiempu alli kawakunampaq kaqta y shamoq tiempuchö Diosnintsik bendicinampaq kaqta (Sal. 119:66; Heb. 11:6). Peru Jehoväman mana markäkoq nunaqa, imatapis rikanqanllawan, wiyanqanllawan o imanö sientikunqanllawanmi decidin.

3. ¿Imanötan yanapamantsik Jehovä munanqannö imatapis decidinqantsik? (2 Corintius 4:18).

³ Tsënö kaptimpis imatapis decidinapaqqa, höraqa yanapamantsik wiyanqantsik, rikanqantsik o imanö sientikunqantsikmi. Peru tsënölla imëpis decidirqa, mana allitam decidishun. ¿Imanirtan tsënö nintsik? Höraqa wiyanqantsik, rikanqantsik o imanö sientikunqantsikqa manam confiakuypaqtsu. Tsënöllam wiyanqantsikllawan, rikanqantsikllawan o imanö sientikunqantsikllawan decidirqa, manam Jehovä munanqannöqa imatapis decidita puëdishuntsu (Ecl. 11:9; Mat. 24:37-39). Peru Jehoväpa consëjunkunaman confiakurqa, pë munanqannömi imatapis decidita puëdishun (Efes. 5:10). Y tsë consëjukunata imëpis cäsukurqa, tranquïlu y kushishqam sientikushun (Sal. 16:8, 9; Is. 48:17, 18). Y manam tsëllatsu, hasta manana wanuypam kawakuyta puëdishun (leyi 2 Corintius 4:18).

4. ¿Imanötan musyashwan Jehoväpa consëjunkuna ninqannö kawëkanqantsikta o kikintsikllaman confiakuykanqantsikta?

⁴ ¿Imanötan musyashwan Jehoväpa consëjunkuna ninqannö kawëkanqantsikta o kikintsikllaman confiakuykanqantsikta? Tsëta musyanapaqqa, kënömi pensanantsik: “Imatapis decidinä kaptinqa, ¿Jehoväpa consëjunkunamanku confiakü o kikï pensanqänöllaku imatapis decidï?”. ¿Imanötan Jehoväpa consëjunkunata cuentachö katsishwan ima trabäjumampis yëkunantsik kaptin, casakunapaq decidirnin o dirigimaqnintsikkuna imata ruranapaqpis nimashqa? Tsëkunachö Jehoväpa consëjunkuna imanö yanapamanqantsikta këchö yachakurishun.

IMA TRABÄJUMAN YËKUNANTSIK KAPTIMPIS JEHOVÄPA CONSËJUNKUNATA CÄSUKUSHUN

5. Ima trabäjumampis yëkuyta munarqa ¿ëkata gananapaq kaqllamanku pensanantsik?

⁵ Wananqantsikkunata y familiantsik wananqankunata tarinapaq alli trabäjuyoq këta munëqa allillam (Ecl. 7:12; 1 Tim. 5:8). Wakin nunakunaqa alli trabäjuyoqmi kayan, tsëmi pägunkunaqa wanayanqan gastukunapaq tinkun, y sobraq qellëtaqa churakuytaraqmi puëdiyan. Peru wakinkunaqa manam alläpatsu ganayan; qellëninkunaqa cada junaq kawayänanllapaqmi tinkun. Tsëmi ima trabäjumampis yëkuyta munarqa, capaz puntataqa pensantsik ëkata gananapaq kaqtaraq. Peru ëkata gananapaq kaqman pensëkurlla ima trabäjumampis yëkurqa, manam Jehoväman confiakuykashwantsu.

6. ¿Imanötan Jehoväpa consëjunkunaman markäkunqantsikta rikätsikushwan ima trabäjumampis manaraq yëkurnin? (Hebrëus 13:5).

⁶ Jehoväpa consëjunkunaman markäkurqa, manam ëkata gananapaq kaqllamantsu pensashun, sinöqa Jehoväwan amïgu kënintsikmampis pensashunmi. Kënömi pensanantsik: “Tsë trabäjuchöqa, ¿Jehovä chikinqan rurëkunatatsuraq ruratsiyämanqa? Tsë trabäjuman yëkurqa, ¿allitsuraq Jehovä Diosnïta sirwishaq o familiäta dejëkurtsuraq atska killakunapa o atska watakunapa juk markakunachö kakushaq?” (Prov. 6:16-19; Filip. 1:10). Tsënö kanan kaptinqa, juk trabäjukunata tarinan mana fäcil kaptimpis, manam tsë trabäjumanqa yëkunantsiktsu. Noqantsikqa llapan shonquntsikwanmi Jehoväpa consëjunkunaman confiakuntsik. Tsëmi següru këkantsik, imata wananqantsiktapis Jehovä Diosnintsik mana faltatsimunampaq kaqta (Mat. 6:33; leyi Hebrëus 13:5).

7, 8. ¿Imanötan Javierqa rikätsikurqan Jehoväman confiakunqanta? (Fötuta rikäri).

⁷ Wawqi Javierqaa imëpis Jehoväpa consëjunkuna ninqannö kawakuytam kallpachakoq. Kënömi nin: “Trabajanqä emprësachömi, juk trabäju mas karqan y tsë trabäjuman yëkuytaqa alläpam munarqä y mastam pagayämänan karqan, tsëmi tsë trabäjuta mañakurqä”. Peru Javierqa precursor këtam munarqan. Kënömi nin: “Encargäduwan parlaq ëwanäpaqmi niyämarqan. Tsëmi parlaq manaraq ëwarnin noqapaq ima mas alli kanqanta Jehovä munanqanta musyarnin puntata pëman mañakurqä. Trabäjüchöqa mas carguyoq këtam munarqä, peru Jehoväta maslla sirwinäta mana yanapamaptinqa manam tsë trabäjuman yëkunätsu karqan”.

⁸ Javiermi kënö nin: “Encargäduwan parlaptïnam, pëqa nimarqan wakin junaqkuna mas hörakuna trabajanäta munanqanta. Tsënam nirqä Testïgu kanqäta y juk rurëkunapis kapamanqanta, y trabajar quedakuyta mana puëdinäpaq kaqta”. Javierqa manam tsë trabäjuman yëkurqantsu, y tsëpita ishkë semäna pasariptinllam precursor tikrarirqan. Y tsë watallam, semänachö juk ishkë junaqkunalla trabajanampaq juk trabäjuta tarirqan. Javiermi kënö nin: “Jehovämi mañakunqäta wiyamarqan, tsëmi precursor kanäta permitimaq trabäjuta tarinäpaq yanapamashqa. Kananqa Jehoväta maslla sirwinäpaq y wawqi panikunata yanapanäpaqpis tiempü tinkunnam”.

9. ¿Imatataq yachakuntsik wawqi Trësor ruranqampita?

⁹ Y trabäjuntsikchö Jehoväpa consëjunkunata cäsukunan mana fäcil kaptinqa, ¿imatataq rurashwan? Republica del Congo nacionchö täkoq Trësor jutiyoq wawqi pasanqanta rikärishun. Pëmi kënö cuentakun: “Alläpa gustamanqan trabäjuchömi trabajarqä. Tsë trabäjuchöqa puntata pagayämanqampitapis kima kuti mastam pagayämaq y nunakunaqa alläpam respetayämaq”. Peru Trësorqa mas hörakuna trabajarmi reunionkunaman seguïdu faltaq. Y emprësachömi obligayaq imëka mana allikunata ruranampaq y ulikunampaq o llullakunampaq. Trësorqa tsë trabäjupitam yarqukuyta munarqan, peru juk trabäjuta mana tarinampaq kaqta pensarmi yarqoqtsu. Peru ¿imatan yanaparqan? Kënömi nin: “Habacuc 3:17 a 19 ninqanmi yanapamarqan qellënï mana kaptimpis, Jehovä cuidamänampaq kaqman confiakunäpaq. Tsëmi tsë trabäjuta dejarirqä”. Y kënömi nin: “Wakin patronkunaqa pensayan alli pägu kaptinqa, familiankunatapis y Diostapis dejëkur tsë trabäjuman nunakuna yëkuyänampaq kaqtam. Alläpam kushikü Jehoväwan amïgu kanqäta y familiätapis mas puntaman churanqäpita. Tsëpita juk wata pasariptinmi, Jehovä yanapamarqan juk trabäjuta tarinäpaq. Tsëchöqa manam alläpatsu pagayämaq, peru wananqäkunata tarinäpaqqa tinkoqmi y Diosta sirwinäpaqpis tiempü kaqnam. Jehoväpa kaqta puntaman churar decidinqantsikpitaqa, capazchi höra höraqa wananqantsikkunapaq qellëta tinkupakushuntsu, peru Jehoväqa manam wananqantsikkunata faltatsimunqatsu”. Noqantsikpis Trësornömi Jehoväpa consëjunkunaman y änikunqankunaman confiakunantsik. Tsëta rurashqaqa, bendicimäshunmi.

CASAKUNAPAQ MAJATA ASHIRQA JEHOVÄPA CONSËJUNKUNATA CÄSUKUSHUN

10. ¿Imanöraq juk pani rikätsikunman Dios ninqankunaman mana confiakunqanta?

¹⁰ Casädu vïdaqa Jehoväpa qarëninmi, tsëmi casakuyta munanqantsikqa allilla. Peru ¿majantsik imanö kanantaraq munashwan? Capazchi juk paniqa munanman yachanëpaq kananta, buenmözu kananta, pëpaq allita parlayänanta, qellëyoq kananta, familiankunata alli cuidananta y shumaq tratananta.b Peru tsënö kananllata munarqa, manam Dios munanqannötsu rurëkanman.

11. ¿Imanötan Jehoväpa consëjunkunaman confiakunqantsikta rikätsikushwan casakunapaq majata ashirqa? (1 Corintius 7:39).

¹¹ Jehovä Diosnintsikqa alläpam kushikun, consëjunkunata wawqi panikuna cäsukuyaptin. Casakuy asuntuchöqa, ¿ima consëjukunatataq wawqi panikuna cäsukuyanman? Piwampis noviu këta munarqa, “wëta cuenta jövin” këninkuna pasanantaraqmi shuyäyänan (1 Cor. 7:36). Casakuyänampaqqa, Jehovä munanqannö portakoq ollqutam o warmitam ashiyänan (Prov. 31:10-13, 26-28; Efes. 5:33; 1 Tim. 5:8). Y mana Testïgu kaqkuna, pëkunawan casakuyta munayaptinqa, 1 Corintius 7:39 (leyi) textuchö “Señorta sirweqllawan” casakuyänampaq mandakunqantam cäsukuyan. Wawqi panikunaqa imanö sientikuyanqanta Jehovä musyanqanta següru karmi consëjunkunata imëpis cäsukuyan (Sal. 55:22).

12. ¿Imatataq yachakuntsik panintsik Rösapita?

¹² Colombia nacionpita precursöra panintsik Rösata pasanqanta rikärishun. Pëqa trabäjunchömi juk mana Testïgu nunawan reqinakurqan, y tsë nunaqa pëwan casakuyta munanqantam nirqan. Y Rösatapis tsë nunaqa gustaqmi. Rösam kënö nin: “Alli nunam karqan. Markanchöpis imëkachömi yanapakoq, manam cigärruta shoqoqtsu ni upyaqtsu y allim portakoq. Alläpa shumaqmi tratamaq. Tsënö qowatam noqaqa munaq kä, peru pëqa manam Testïgutsu karqan. Tsë witsankunaqa, japallä sientikurmi casakuyta munaq kä, peru Jehoväta sirweq nunataqa manam tarishqatsu karqä. Tsëmi tsë nuna casakuyänäpaq nimaptinqa, ‘manam’ ninanqa fäciltsu karqan”. Tsënö kaptimpis, Rösaqa manam tsë nuna imanö kanqanllamantsu pensarqan, sinöqa Jehoväwan amïgu kanqanmanmi. Tsëmi tsë nunawan manana parlanampaq decidirqan y Jehoväta sirwirmi ocupädu karqan. Tsëpita ichik tiempullatanam Diospa Gobiernumpita Yachatsikoqkunapaq Escuëlaman invitayarqan, y kananqa precursöra especialmi. Rösam kënö nin: “Jehoväqa kushishqa kanäta munarmi imëkawan bendicimashqa”. Casakuyta munashqa y pipis gustamashqaqa, manam fäciltsu kanman Jehoväpa consëjunkunata cäsukunan; peru cäsukurqa, atska bendicionkunatam chaskishun.

DIRIGIMAQNINTSIKKUNA IMATA RURANAPAQPIS NIMASHQA

13. Dirigimaqnintsikkuna imata ruranapaqpis nimashqaqa, ¿höraqa imanötan sientikushwan?

¹³ Jehoväpa Testïgunkunata Pushaqkunaqa, seguïdum willarëkämantsik Jehoväta sirwinqantsikchö imakunata ruranantsikpaq. Tsëkunataqa willamantsik anciänukunawan, congregacionkunata watukaqkunawan y sucursalta rikaqkunawanmi. Peru capazchi höraqa imanir tsënö ruranantsikta munayanqanta entiendishuntsu. Tsëqa capazchi pensashwan niyämunqankunata rurashqaqa, mana alli yarqunampaq kaqta. O capazchi imachöpis pantaq kayanqanta pensarnin cäsukuyta munashuntsu. Tsëta rurarqa, manam Jehoväpa consëjunkunaman confiakuykashwantsu.

14. ¿Imaraq yanapamäshun dirigimaqnintsikkuna niyämunqankunata cäsukunapaq? (Hebrëus 13:17).

¹⁴ Jehoväman confiakurqa, segürum këkäshun Jehovä llapanta musyanqanta y noqantsikpaq mas alli kaqta munanqanta. Tsëmi dirigimaqnintsikkuna imata ruranapaqpis nimashqaqa, empëñu empëñu cäsukunantsik (leyi Hebrëus 13:17). Cäsukoq karqa, congregacionchö wawqi panikunawan mas unïdu kanapaqmi yanapakuntsik (Efes. 4:2, 3). Tsënöllam yarpänantsik, dirigimaqnintsikkuna jutsasapa kayaptimpis cäsukushqaqa Jehovä bendicimänapaq kaqta (1 Sam. 15:22). Y imatapis correginan kaptinqa, tiempunchö correginampaq kaqta (Miq. 7:7).

15, 16. ¿Imatan Këvinta yanaparqan Jehovä ninqankunaman markäkunampaq? (Fötuta rikäri).

¹⁵ Dirigimaqnintsikkuna niyämunqankunata cäsukuy imanir alli kanqanta rikärishun. Perü nacionchöqa nunakunaqa españoltam masqa parlayan, peru wakin nunakunaqa quechuata y juk idiömakunatapis parlayanmi. Quechua idiömachö pasakunqanta rikärishun. Wawqi panikunaqa, atska watapam quechua idiömata parlaqkunata ashir seguïdu puriyaq. Y Perü nacionchöqa leykunam cambiarirqan (Rom. 13:1). Tsëmi dirigimaqnintsikkuna niyämurqan tsënö manana rurayänampaq, tsëta musyarirmi wawqi panikunaqa yarpachakuyarqan, y kënömi niyarqan: “Kananqa, ¿imanöraq quechua parlaqkunata tarishun?”. Peru tsëpitam cuentata qokuyarqan dirigimaqnintsikkuna niyämunqankunata cäsukuyaptinqa, quechua parlaqkunata tariyänampaq Jehovä yanapanampaq kaqta.

¹⁶ Wawqi Këvinqa quechua congregacionchömi anciänu. Pëqa manam acuerdutsu karqan dirigimaqnintsikkuna juknöpana rurayänampaq niyaptin. Kënömi nin: “‘Kananqa, ¿imanöraq quechua parlaqkunata tariyäshaq?’ nirmi yarpachakurqä”. Tsënö yarpachakurpis, ¿imatataq rurarqan? Kikinmi kënö nin: “Proverbius 3:5 ninqanmanmi alli pensarqä. Tsënöllam pensarqä Moises ruranqanmampis. Moisestam Jehovä nirqan israelïtakunata Egiptupita Puka lamarman pushanampaq, peru tsëpa ëwayaptinqa egipciukunapita mana salvakuyänampaqnömi karqan. Tsënö kaptimpis, Moisesqa cäsukurqanmi, tsënöpam milagruta rurarnin Jehovä salvanqanta rikarqan” (Ex. 14:1, 2, 9-11, 21, 22). Tsëmi Këvinqa dirigimaqnintsikkuna niyämunqannö rurar qallëkurqan, peru ¿alliku karqan? Kikinmi kënö nin: “Jehoväqa bendiciyämarqanmi. Puntataqa quechua parlaqkunata ashirmi alläpa puriyaq kayä y juk ishkëllatam tariyaq kayä. Peru kananqa quechua parlaqkuna mas kayanqan sitiukunamanmi ëwayä. Tsëchömi pëkunawan shumaq parlakuyta puëdiyä, watukaqnin kutiyä y wakinkunaqa Bibliapitam yachakur qallayashqa. Y reunionkunamampis mas atskaqmi shayämun”. Tsëwanmi cläru rikantsik Jehovä ninqankunaman markäkushqaqa bendicimanqantsikta.

17. ¿Imatataq këchö yachakurquntsik?

¹⁷ ¿Imakunatataq këchö yachakurquntsik? Ima trabäjumampis yëkunantsik kaptin, casakunapaq majata ashirnin y dirigimaqnintsikkuna imata ruranapaq nimashqapis Jehovä ninqankunaman confiakunapaqmi. Peru manam tsëkunallachötsu Jehoväman confiakunantsik. Kushikunapaq imata ruranantsik kaptin, imata estudianantsik kaptin, wamrantsikta imanö wätanapaq decidirnin o juk rurëkunachöpis Jehoväpa consëjunkunaman y cuidamänapaq änimanqantsikmanmi confiakunantsik, y manam imatapis rikanqantsikllapita o munanqantsikllapitaqa decidinantsiktsu. Jehovä nimanqantsikkunata cäsukurqa, pëtam imëpis sirwikäshun (Miq. 4:5).