15 KAQ
30 KAQ CANCION Teytä, Diosnï y amïgü
Diosnintsikwan mas amïgu kanantsikpaq kallpachakushun
“Noqapaqqa, Diosnintsikta adorë y pëman mañakuymi alläpa alli” (SAL. 73:28).
¿IMATATAQ YACHAKUSHUN?
Këchöqa yachakushun Jehoväpa mas amïgun kanantsikpaq imata ruranantsikpaq kaqta y imanö yanapamanqantsiktam.
1, 2. (1) ¿Imatataq ruranantsik mas alli amïguyoq kanapaq? (2) ¿Imatataq këchö yachakushun?
¿PITAN alli amïguyki? ¿Imatataq rurarqëki pëwan alli amïgu kanëkipaq? Capazchi atska tiempupa juntu karqëki, imanö kawakunqanta, imata gustanqanta y imata mana gustanqanta musyarqëki. Y cuentatachi qokurqëki alli nuna kanqanta y pënö këtachi munarqëki. Tsëchi tiempuwanqa masraq kuyarqëki.
2 Alli amïguyoq kanapaqqa, kallpachakunantsikran y tiemputaran wanantsik. Tsënöllam Jehoväwan alli amïgu kanapaqpis kallpachakunantsikraq. Tsëmi këchöqa yachakushun Diosnintsikwan mas amïgu kanapaq imata ruranapaq kaqta. Peru puntataqa yachakurishun Jehoväpa alli amïgun kanqantsik imanö yanapamanqantsiktaraq.
3. ¿Imamantan pensashwan Jehoväpa mas amïgun këta munarqa? Juk ejempluwan willakaramuy.
3 Jehoväwan mas amïgu kanapaqqa, allim pensanantsik pëwan amïgu kanqantsik imanö yanapamanqantsikman (Sal. 63:6-8). Këllaman pensarishun: nunakunaqa allim musyayan sänu mikuykunata mikuyanqan, yakuta seguïdu upuyanqan, ejerciciuta rurayanqan y alli punuyanqan alli saloryoq kayänampaq yanapanqanta. Peru tsëta musyëkarpis, wakinkunaqa manam rurayantsu y salorninkunatam descuidayan. Peru ¿imaraq yanapanqa tsëkunata mana descuidayänampaq? Sänu mikuykunata mikuyanqan, yakuta seguïdu upuyanqan, ejerciciukunata rurayanqan y alli punuyanqan imanö yanapanqanman alli pensayanqanmi. Tsënöllam noqantsikpis musyantsik Jehoväwan amïgu kanqantsik alli kanqanta. Peru pëwan amïgu kanqantsik imanö yanapamanqantsikman mas seguïdu pensarqa, mas amïgun këtam munashun (Sal. 119:27-30).
4. ¿Ima nirqantan Salmus 73:28 cancionta qellqaq nuna?
4 (Leyi Salmus 73:28). Salmus 73 cancionta qellqaqqa, Levï kastapitam karqan y templuchömi müsicata tocaq. Capazchi pëqa atska watakunapa Jehoväta sirwirqan, tsënö karpis, “Noqapaqqa, Diosnintsikta adorë y pëman mañakuymi alläpa alli” nirqanmi. Tsënöqa nirqan, Jehoväwan mas amïgu kanan pishinqanta musyarmi. Y tsëta wakinkunapis musyayänantam munarqan. Peru ¿imanötan yanapamantsik Jehoväwan amïgu kanqantsik? Tsëta yachakurishun.
JEHOVÄWAN AMÏGU KARQA KUSHISHQAM KAWAKUNTSIK
5. (1) ¿Imanirtan Jehoväpa mas amïgun karqa kushishqa kawakuntsik? (2) ¿Imanötan qamtaqa yanapashurqunki Jehoväpita yachakunqëki? (Proverbius 2:6-16).
5 ¿Imatataq rurashwan mas kushishqa kawakunapaq? Jehoväwanmi mas amïgu kanantsik (Sal. 65:4). ¿Imanirtan tsënö nintsik? Këllaman pensarishun: Bibliachö këkaq consëjukunata cäsukushqam imata ruranqantsikpis alli yarqun. Y Jehovä yachatsimanqantsikkunata yarparmi, wakinkuna mana allikunata rurayaptimpis mana allikunata rurantsiktsu, y allita decidinapaqmi imëpis kallpachakuntsik (leyi Proverbius 2:6-16). Tsëmi Diospa Palabranqa kënö nimantsik: “Teyta Dios yachaq kanqanta entiendeq nuna y alli pensëta yachaq nunaqa, kushishqam kawakun” (Prov. 3:13).
6. ¿Imanirtan salmusta qellqaq nuna llakishqa sientikurqan?
6 Peru Diospa amïgun karpis, höra höraqa llakikushunmi. Tsëmi pasarqan Salmus 73 qellqaq nunata. Pëqa, Diosta mana sirweq nunakunata y orgullösukunatam rikarqan alli kawakuyanqanta, rïcu kayanqanta, alli saloryoq kayanqanta y munayanqankunatapis fäcil-lla rurayanqanta. Tsëta rikarmi llakikurqan, y pëkunanö këtam munarqan. Peru rasumpa kaqchöqa, pantashqam këkarqan (Sal. 73:3-7, 12). Y hasta llakishqam kënö nirqan: “Limpiu shonqüwan kawakunqäqa manam imapaqpis välishqatsu, jutsata mana rurar kawakunqäqa manam sirwishqatsu” (Sal. 73:13).
7. Llakishqa këkanqantsik hörakunaqa, ¿imatataq rurashwan kushishqa sientikunapaq? (Rikäri dibüjuta).
7 Peru kë salmusta qellqaqqa llakishqalla kakunampa rantinmi, Jehoväpa ‘sagrädu sitiunman’ ëwarqan y tsëchömi mas allina pensanampaq Jehovä yanaparqan (Sal. 73:17-19). Jehoväqa alli kaq amïguntsikmi y musyanmi llakishqa këkanqantsikta. Peru yanapamänapaqqa, pëmanmi mañakunantsik y Palabran Bibliawan y wawqi panikunawan yanapamanqantsiktam chaskikunantsik. Tsëta rurarqa, alläpa llakishqa këkarpis o alläpa yarpachakuykarpis Jehovätam sirwir sïguikäshun. Pëqa consolamäshunmi y tranquïlu sientikunapaqmi yanapamäshun (Sal. 94:19).a
Salmus 73 cancionta qellqaq levïtam, Diospa “sagrädu” wayinchö këkan. (Leyi 7 kaq pärrafuta).
DIOSWAN MAS AMÏGU KARQA, KUSHISHQAM KAWAKUSHUN Y ÄNIKUNQANKUNATAPIS SHUYARÄSHUNMI
8. ¿Imakunachö mastan Diospa amïgun kanqantsik yanapamantsik?
8 ¿Imakunachö mastan Dioswan amïgu kanqantsik yanapamantsik? Imanir kawanqantsikta musyarnin kushishqa kawakunapaq y änikunqankunata kushishqa shuyaränapaqmi (Jer. 29:11). Imanir tsënö ninqantsikta rikärishun.
9. ¿Imanirtan Jehoväpa amïgun karqa kushishqa kawakuntsik?
9 Diospa amïgun karqa clärum musyantsik imanir kawanqantsikta. Peru wakin nunakunaqa pensayan Dios mana kanqantam. Tsëmi musyayantsu imapaq kawayanqanta y imë karpis nunakuna ushakäyänampaq kaqtam pensayan. Peru noqantsikqa Diospa Palabranta alli yachakushqa karmi creintsik Diosnintsikqa rasumpa kanqanta y ‘asheqninkunata bendicinqanta’ (Heb. 11:6). Teytantsik Jehoväqa pëta adoranapaqmi kamamarquntsik. Tsëmi pëta sirwirninqa, kushishqa kawakuyta puëdintsik (Deut. 10:12, 13).
10. Salmus 37:29 ninqannö, ¿imatataq Jehoväpa amïgunkunaqa shuyarantsik?
10 Mëtsikaq nunakunam Diosnintsik änikunqankunata musyayantsu. Tsëmi trabajarlla, wamrakunata wätarlla y awkinyarnin o chakwanyarnin mantenikuyänampaq trabajarlla kakuyan. Diosnintsiktaqa manam ni imanöpapis yarpäyantsu. Peru Jehoväpa amïgunkunaqa änikunqankunatam shuyarantsik (Sal. 25:3-5; 1 Tim. 6:17). Amïguntsik Jehovä llapan änikunqankunata cumplimunampaq kaqmanmi confiakuntsik. Shamoq tiempuchöqa alläpa shumaqmi kawakushun y Jehovä Diosnintsiktam imëpis adorashun (leyi Salmus 37:29).
11. ¿Imanötan yanapamantsik Diosnintsikpa amïgun kanqantsik, y imanötan Jehovä Diosnintsik sientikun amïgun kashqa?
11 Diosnintsikpa amïgun kanqantsikqa imëkachömi yanapamantsik. Këllaman pensarishun: Jehovämi änimantsik arrepentikushqaqa, jutsata ruranqantsikkunapita perdonamänapaq (Is. 1:18). Pë perdonamashqaqa, manam jutsata ruranqantsikkunata yarpar llakikushunnatsu (Sal. 32:1-5). Tsënöllam munanqankunata rurarnin Diosnintsikta kushitsishun, y noqantsikpis kushishqam sientikushun (Prov. 23:15). ¡Qampis mëraq atska bendicionkunata chaskirqunki Jehoväpa amïgun kanqëkipita! Peru ¿imatataq rurashwan Diosnintsikpa mas amïgun kanantsikpaq?
¿IMATATAQ RURASHWAN DIOSNINTSIKPA MAS AMÏGUN KANAPAQ?
12. ¿Imakunatataq rurankiman Jehoväpa mas amïgun kanëkipaq?
12 Testïguna karqa, Jehoväpa amïgunnachi kanki. Y amïgun kanëkipaqqa Jehoväpita y Jesuspitachi yachakurqëki, jutsata ruranqëkikunapitachi arrepentikurqëki, Diosnintsikmanchi markäkurqëki y mandakunqannöchi kawakurqëki. Peru Diosnintsikpa mas amïgun kanëkipaqqa, tsëkunatam rurarnin sïguinëki (Col. 2:6).
13. ¿Imakunatataq ruranantsik Diosnintsikpa mas amïgun kanantsikpaq?
13 ¿Imakunatataq rurashwan Jehoväpa mas amïgun kanantsikpaq? 1) Palabran Bibliatam leyinantsik y estudianantsik. Y manam puntata yachakunqantsikkunallawanqa conformakunantsiktsu. Tsënöllam noqantsikpaq Diosnintsik imata munanqanta musyanantsik y Palabranchö mandakunqannömi kawakunantsik (Efes. 5:15-17). 2) Diosnintsikman maslla markäkunapaq o yärakunapaqmi, kuyamarnintsik imëkakunata ruramunqankunaman alli pensanantsik. 3) Diosnintsik chikinqan rurëkunatam chikir sïguinantsik y manam mana allikunata ruraq nunakunawanqa amïgu kanantsiktsu (Sal. 1:1; 101:3).
14. ¿Imanötan cada junaq kawakunantsik Jehoväta kushitsinapaq? (1 Corintius 10:31; fötukunata rikäri).
14 (Leyi 1 Corintius 10:31). Jehovä Diosnintsikta kushitsinqan rurëkunata ruranapaqmi kallpachakunantsik. Tsëta mana rurashqaqa, manam reunionkunaman ëwanqantsik ni yachatsikoq yarqunqantsikpis välinqatsu. Cada junaqmi Jehovä munanqannö kawakunantsik. Këllaman pensarishun: Jehoväqa alläpam kushikun imëkachöpis honrädu kashqa y tarinqantsikkunata pitapis qararishqa (2 Cor. 8:21; 9:7). Tsënöllam Jehoväqa nimantsik vïdantsikta cuidanantsikpaq. Tsëmi alläpaqa mikunantsiktsu ni upyanantsiktsu y imata rurarpis salornintsiktam cuidanantsik. Jehovä munanqannö imatapis rurashqaqa, masmi kuyamäshun (Lüc. 16:10).
Jehovätaqa kushitsintsik cärruta cuidädu manejarnin, salornintsikta cuidanapaq ejerciciukunata rurarnin, sänu mikuykunata mikurnin y wakin nunakunawan alli karninmi. (Leyi 14 kaq pärrafuta).
15. ¿Nuna mayintsikta imanö tratanantsiktataq Jehovä munan?
15 Jehovä Diosnintsikqa alli ruraqta y mana alli ruraqtapis kuyëpam tratamantsik (Mat. 5:45). Y tsënölla nuna mayintsikta tratanantsiktam munan. Këllaman pensarishun: Jehoväqa manam munantsu piwampis discutirlla kakunantsikta ni “pipaqpis mana allita” parlanantsikta. Tsëpa rantinqa ‘llapan nunakunawan yachanëpaq kanantsiktam’ munan (Tïtu 3:2). Tsëmi noqantsik creinqantsikkunata wakinkuna mana creiyaptimpis, pëkunapita mas alli kanqantsiktaqa pensantsiktsu (2 Tim. 2:23-25). Imëpis nuna mayintsikta kuyëpa tratarninqa, Jehoväpa mas amïgunmi kashun.
QELANASHQA KËKARPIS, JEHOVÄPA AMÏGUN KËTAQA PUËDINTSIKMI
16. ¿Imanötan Salmus 73 cancionta qellqaq nuna sientikurqan?
16 Jehovä Diosnintsik manana yanapëkämanqantsikta pensarqa, Salmus 73 cancionta qellqaq nunamanmi pensanantsik. Pëqa unë pensanqankunata yarparmi kënö nirqan: “Noqaqa alli kaq nänipitam cäsi yarqukurirqä, cäsim mana allikunaman ishkirqä” (Sal. 73:2). Pëqa nirqan ‘cölerashqa’ kanqanta, ‘mana entiendeq nuna’ tikrakurishqa kanqanta y Jehoväpa rikënimpaqqa ‘animalnö imatapis mana musyaq’ tikrashqa kanqantam (Sal. 73:21, 22). ¿Jutsasapa karnin mana allikunata pensanqampita Jehovä manana kuyanqantaku o dejarishqa kanqantaku pensarqan?
17. (1) ¿Imataraq salmusta qellqaq nuna rurarqan alläpa llakishqa sientikurnin? (2) ¿Imatataq yachakuntsik salmusta qellqaq nunata pasanqampita? (Fötukunata rikäri).
17 Salmusta qellqaq nuna, Jehovä dejarishqa kanqanta pensashqa karqa, pöcu tiempullachöchi tsënö pensanqanta cambiarirqan. Pëqa alläpana llakikurchi yanapanampaq Diosnintsikta ashirqan. ¿Imanötan tsëta musyantsik? Kikinmi kënö nirqan: “Kananqa, qammanmi mas confiakamü, derëcha makïpitam jancharëkämanki. Alli kawakunäta munarmi consejamanki, tsëpitanam pïmëpis respetamänampaq permitinki” (Sal. 73:23, 24). Noqantsikpis alläpa llakikunqantsik hörakunam Jehoväman confiakunantsik. Tsëta rurarmi mas allina sientikushun (Sal. 73:26; 94:18). Y jutsata rurashqa karqa, ¿imatataq rurashwan? Jehovä perdonakoq kanqanman confiakurmi, perdonamänapaq mañakunantsik (Sal. 86:5). Alläpa mana alli sientikunqantsik hörakunam yanapamänapaq Diosnintsikta ashinantsik (Sal. 103:13, 14).
Diosnintsikta sirwita qelanäkurishqa karqa, pëpita mas yachakunapaqmi tiemputa rakinantsik. (Leyi 17 kaq pärrafuta).
AMA JEHOVÄ DIOSNINTSIKTA DEJASHUNTSU
18. ¿Imanirtan nintsik Diosnintsikpitaqa imëpis yachakuyta mana ushanapaq kaqta?
18 Jehovä Diosnintsikpita yachakuytaqa manam imëpis ushashuntsu. Bibliachömi Diosnintsikpaq nin ‘alläpa yachaq y imëkata musyaq kanqanta, y llapan ruranqantapis musyëta mana puëdinapaq’ kaqta (Rom. 11:33).
19. ¿Imapita següru kanapaqtan Salmus 79 y 73 yanapamantsik?
19 Salmus 79:13 textuchömi kënö nin: “Noqakunaqa Teyta Dios imëpis agradecikuyashqëki[m] y alabashqa kanqëkitam imëyaqpis willakuyäshaq. Noqakunaqa sirwishoqnikikunam kayä, qewëkichö mikoq üshëkikunam kayä”. Jehoväpa mas amïgun kanëkipaq kallpachakuyta mana dejaptikiqa, pëqa imëpis bendicishunkim. Y kënömi nita puëdinki: “Teyta Diosmi noqapaqqa herenciä, y qaqa cuenta tsapämaqnï” (Sal. 73:26).
32 KAQ CANCION Jehoväpa lädunman churakäshun
a Atska tiempupana yarpachakurlla kakoqkuna o llakishqalla kakoqkunaqa, capazchi doctorkuna atiendiyänanta wanayanqa. Mas yanapakuytaqa tarinki 2023 wata 1 kaq Täpakoq revistachömi.