Jövin, Marcuspita y Timoteupita yachakuy

1, 2. ¿Imanir-raq Marcuswan Timoteuqa Diosnintsikta maslla sirwita munayanmantsu karqan?

JÖVIN karqa, capazchi Jehoväta maslla sirwita munanki y congregacionchöpis yanapakuyta munanki. Yanapakuyta munaq mëtsikaq jövinkunata rikëqa alläpa kushikuypaqmi (Sal. 110:3). Peru tsënö yanapakuyta munarpis, capazchi imanö kawakunëkipaq kaqta yarpachakurnin o imanö ruranëkipaq kaqta mana musyarnin, Diosnintsikta maslla sirwitaqa decidinkitsu. Tsënö sientikurqa, ama yarpachakuytsu.

² Marcuswan Timoteupis tsënömi yarpachakuyarqan, peru tsënö yarpachakurpis Jehovä Diosnintsikta maslla sirwiyänampaqmi decidiyarqan. Pabluwan Bernabëqa viajayänampaqmi Marcusta invitayarqan. Tsë witsanqa capazchi Marcusqa mamänimpa wayinchö täkurnin imapaqpis alläpaqa yarpachakoqtsu (Hëch. 12:12, 13, 25). Peru alli wayichö kushishqa täkurpis, Marcusqa Diosnintsikpita masllata yachatsikuytam munarqan. Tsëmi puntataqa Antioquïata ëwarqan y tsëpitanam Pabluwan y Bernabëwan karu markakunapa viajayarqan (Hëch. 13:1-5). Tsënöllachi Timoteupis yachatsikuyänampaq Pablu invitanqan witsanqa, papäninkunapa wayinkunachö täkurqan. Pablu invitaptinqa, Timoteuqa manam pensarqantsu yachatsikunampaq alläpa jövinllaraq kanqanta (igualaratsi 1 Corintius 16:10, 11 y 1 Timoteu 4:12 textukunatawan). Tsëmi Pabluwan ëwarqan, y mëtsika bendicionkunatam chaskirqan (Hëch. 16:3-5).

3. (1) ¿Imanirtan Pabluqa Timoteutawan Marcusta alläpa kuyarqan? (2 Timoteu 4:6, 9, 11; dibüjukunata rikäri). (2) ¿Ima tapukuykunatataq këchö yachakushun?

³ Jövinllaraq këkarpis Marcuswan Timoteuqa congregacionchömi allipa yanapakuyarqan. Tsëmi apostol Pabluqa alläpa kuyarqan, y wanukunampaqna këkarmi ëwayänampaq qayatsirqan (leyi 2 Timoteu 4:6, 9, 11). ¿Imanirtan Pabluqa Marcustawan Timoteuta alläpa kuyarqan? ¿Imatataq kanan witsan jövinkuna Marcuspita y Timoteupita yachakuyanman? ¿Y Pablupa mëqan consëjunkunatan jövinkunata yanapanman?

MARCUSNÖ YANAPAKOQ KË

4, 5. ¿Imanötan Marcusqa rikätsikurqan wakinkunata yanapëta munanqanta?

⁴ Juk librum willakun “wakinkunata yanapë” ninanqa, mana fäcil kaptimpis “mana dejëpa yanapë” ninan kanqanta. Y tsënömi Marcusqa yanapakurqan. Capazchi Marcusqa llakikurqan ishkë kaq viäjinchö Pablu pushëta mana munaptin (Hëch. 15:37, 38). Peru ¿tsërëkurku qelanäkurirqan y wawqi panikunata yanapëta dejarirqan? ¡Manam!

⁵ Marcusqa prïmun Bernabëwanmi juk markakunata ëwarqan. Y tsëpita 11 wata pasariptinmi, carcelchö Pablu këkaptin Marcusqa yanapaqnin Römata ëwarqan (Filem. 23, 24). Y apostol Pabluqa alläpam agradecikurqan, tsëmi Marcuspaq nirqan alläpa shoqashqa kanqanta (Col. 4:10, 11).

6. ¿Imanötan Marcusta yanaparqan Diospa kaqchö poqushqa cristiänukunawan juntu kanqan? (Nötata leyi).

⁶ Marcustaqa Diosnintsikta maslla sirwinampaq yanaparqan, Diospa kaqchö poqushqa cristiänukunawan juntu kanqanmi. Marcusqa Pabluwanmi Römachö karqan, y tsëpitanam Pëdru kaqta Babiloniata ëwarqan. Pëdruwampis alli amïgum karqan, tsëmi Pëdruqa Marcuspaq “tsurillä” nirqan (1 Pëd. 5:13). Tsënö juntu kayanqan tiempuchi Pëdruqa Marcusta willarqan Jesus kë Patsachö imanö kawanqampaq y yachatsikur purinqankunapaq, y tsë willanqankunatachi Marcusqa qellqarqan.a

7. ¿Imanötan Marcus ruranqannö juk wawqi rurarqan? (Fötuta rikäri).

⁷ Marcusqa Jehoväta sirwirmi ocupädu karqan y Diospa kaqchö poqushqa cristiänukunawanmi juntakarqan. Jövin, ¿imanötan qampis Marcusnö rurankiman? Capazchi congregacionchö maslla yanapakuyta munanki. Peru ima cargutapis manaraq chaskishqa karqa, pacienciawanmi shuyänëki y Jehoväta sirwir y wawqi panikunata yanaparmi ocupädu kanëki. Wawqi Luistab pasanqanta rikärishun. Luisqa jövin kanqan witsanmi, jövin mayinkuna cargukunata chaskiyanqanta rikar mana alli sientikoq y pëta cuentachö mana katsiyanqantam pensaq. Tsëmi juk kutiqa anciänukunawan parlarqan, y juk kaq anciänum nirqan wakinkuna mana musyayaptimpis wawqi panikunata maslla yanapanampaq. Tsëmi Luisqa decidirqan edäna wawqi panikunata yanapanampaq y reunionkunaman pushanampaq. Luisqa, kananqa anciänunam. Tsë tiempukunata yarparmi kënö nin: “Wakinkunata imanö yanapana kanqantam yachakurqä y yanapakurqa rasumpam kushishqa sientikurqä”.

TIMOTEUNÖ YANAPAKOQ KË

8. ¿Imanirtan Pabluqa Timoteuta akrarqan viajayänampaq? (Filipensis 2:19-22).

⁸ Pabluqa chikiyanqan markakunaman visitakoq kutirqa, valienti wawqikuna pëwan ëwayänantam wanarqan. Tsëmi puntataqa Sïlasta akrarqan; pëqa imëkachömi yanapakoq (Hëch. 15:22, 40). Tsëpitanam Timoteuta akrarqan. Peru ¿imanirtan Timoteutaqa jövinllaraq këkaptimpis akrarqan? Wawqi panikuna pëpaq allita parlayaptin y wakinkunapaq rasumpa yarpachakuptinmi (Hëch. 16:1, 2; leyi Filipensis 2:19-22).

9. ¿Imanötan Timoteuqa rikätsikurqan wawqi panikunapaq alläpa yarpachakunqanta?

⁹ Timoteuqa qallanampitam rikätsikurqan, wawqi panikunapaq alläpa yarpachakunqanta. Tsëmi Pabluqa pëman confiakurnin, tsëllaraq cristiänu tikrashqakunata yanapanampaq Berëachö quedakunampaq nirqan (Hëch. 17:13, 14). Y tsë tiempupaqqa, Sïlaspis tsë markachömi këkarqan, y capazchi Timoteuqa pëpitapis yachakurqan. Tiempuwannam Pabluqa Timoteuta japallanta mandarqan Tesalönica congregacionchö wawqi panikunata animanampaq (1 Tes. 3:2). Timoteuqa 15 watapam wawqi panikunata yanaparqan. Tsëchi wawqi panikunataqa alläpa kuyarqan y waqayaptimpis pëkunawan waqarqan (Rom. 12:15; 2 Tim. 1:4). Jövin, ¿imanötan qampis Timoteu ruranqannö rurankiman?

10. ¿Imanötan juk wawqi jukkunapaq yarpachakuyta yachakurqan?

¹⁰ Wawqi Carluspaq parlarishun. Pëqa jövinllaraq karqa, manam edäna wawqi panikunawan parlakuyta yachaqllatsu y reunionkunachöqa saludareqllam. Tsëmi juk anciänuqa nirqan tsë edäna wawqi panikunata imanir valoranqanta ninampaq. Tsënöllam nirqan parlakuyta gustayanqankunapita parlapänampaq. Y tsë anciänu ninqannömi Carlusqa rurarqan. Kananqa pëpis anciänum y kënömi nin: “Kananqa edäna kaqkunawan y jövin kaqkunawampis fäcil-llam parlakurï. Imakunapa pasëkäyanqankunatam musyä, tsëmi wanayanqankunachö yanaparï”.

11. ¿Imanötan jövinkunaqa congregacionchö wawqi panikunapaq yarpachakuyanqanta rikätsikuyanman? (Fötuta rikäri).

¹¹ Jövin, qampis Carlusnömi wakinkunata yanapëta puëdinki. ¿Imanötan rurankiman? Reunionkunachömi edäna kaqkunawampis y jövin kaqkunawampis shumaq parlakurinkiman. Imanö këkäyanqantam tapurinkiman y willayäshuptikiqa shumaqmi wiyanëki. Tsëmi yanapashunki wanayanqankunachö yanapëta puëdinëkipaq. Capaz cuentata qokurinki juk edäna wawqiwan warmin, JW Library^® aplicacionta utilicëta mana yachayanqanta o pëkunawan yachatsikoq pillapis mana yarquykanqanta. Tsëkunata musyarqa, ¿manatsuraq yanaparinkiman? Yanapanëkipaq kallpachakurqa, congregacionchömi alli ejemplu kanki.

PABLUPA CONSËJUNKUNAM YANAPASHUNKI

12. ¿Imatataq jövinkuna rurayanman Pablupa consëjunkuna yanapanampaq?

¹² Pabluqa wamrantanömi Timoteuta kuyarqan, tsëmi alli kawakunampaq y Diosnintsikta alli sirwinampaq consejarqan (1 Tim. 1:18; 2 Tim. 4:5). ¿Imatataq rurankiman Timoteuta Pablu consejanqan qamtapis yanapashunëkipaq? Timoteupaq Pablu qellqanqan ishkan cartakunatam leyinëki, tsëpitam kënö pensanëki: “Këchöqa noqatam Pablu consejëkäman, ¿peru imanötan consejamanqanta cäsuküman?”. Imanö ruranapaq kaqta rikärishun.

13. ¿Imaraq yanapamäshun llapan shonquntsikwan Diosta sirwinapaq?

¹³ “Llapan shonquykiwan Diosta sirwinëkipaq alistakuy” (1 Tim. 4:7b). “Llapan shonquykiwan” nirqa parlëkan Jehovä Diosnintsik llapan mandakunqankunata y munanqankunata rurëpaqmi. Y tsëta ruranapaqqa alliraqmi yachakunantsik. ¿Imanötan rurashwan? Apostol Pablum “alistakuy” nirqan. Tsë palabrapaqqa griëgu idiömachö entienditsikun, cörreqkuna cörriyänampaq alli yachakuyanqantam. Tsë cörreqkuna ganayänampaqqa imëkatam cumpliyänan. Tsënöllam noqantsikpis Diosnintsikta llapan shonquntsikwan sirwinapaq y amïgun kanapaqqa, yanapamaqnintsik rurëkunata ruranantsik.

14. Bibliata leyirqa, ¿imamantan pensanantsik? Juk ejempluwan willakaramuy.

¹⁴ Tsëqa, ¿imakunatataq rurankiman? Bibliatam cada junaq leyinëki. Y Bibliataqa leyinëki Jehovä Diosnintsikpa mas amïgun këta munarmi. Këllaman pensarishun: leyikankiman gobernanti rïcu jövinta Jesus parlapëkanqanta (Mar. 10:17-22). Tsë jövinqa creirqanmi Diospa Akrashqan Jesus kanqanta, peru qateqnin tikranampaqqa mas markäkunan o yärakunanmi pishirqan. Tsëta musyëkarpis, Jesusqa alläpa kuyëpam parlaparqan y qateqnin kanantam munarqan. Jesus kuyëpa parlapanqanqa rikätsikun Jehoväpis tsë jövinta kuyanqantam (Juan 14:9). Tsë willakuyta leyirnin y imanö këkanqëkiman pensarnin kënö tapukuy: “Noqaqa, ¿imatataq ruräman Jehoväpa mas amïgun kanäpaq y wakinkunata maslla yanapanäpaq?”.

15. ¿Imanirtan jövinkunaqa alli ejemplu kayanman? (1 Timoteu 4:12, 13).

¹⁵ “Teyta Diosta mana dejëpa sirweqkunapaq alli ejemplu kë” (leyi 1 Timoteu 4:12, 13). Pabluqa Timoteuta consejarqan alli leyita y alli yachatsikuyta yachakunampaqmi. Tsënöllam consejarqan kuyakoq kanampaq, maslla markäkunampaq o yärakunampaq y limpiu shonquyoq kanampaq. ¿Imanirtan tsënö consejarqan? Imatapis ninqantsikkunaqa wakinkunapa shonqunman chärinqa kikintsik rurashqam. Këllaman pensarishun: capaz niriyäshunkiman Diosnintsikpita maslla yachatsikuyänampaq reunionchö discursuta ruranëkipaq. Yachatsikoq seguïdu yarqurqa, tsë asuntupaq kushishqam discursarinki y wakinkunapis ninqëkikunatam rurayanqa (1 Tim. 3:13).

16. (1) ¿Imakunachötan juk jövin alli ejemplu kanman? (2) ¿Imanötan juk jövin parlakunqanchö alli ejemplu kanman?

¹⁶ 1 Timoteu 4:12 textuchömi apostol Pablu nirqan parlakuyanqanchö, portakuyanqanchö, kuyakoq kayanqanchö, markäkoq o yärakoq kayanqanchö y limpiu shonquyoq kayanqanchö jövinkuna alli ejemplu kayänampaq. ¿Manatsuraq tsëkunapita maslla yachakurinkiman? Pensarishun parlakunqëkichö imanö alli ejemplu kanëkipaq kaqman. Papänikita o mamëkitam agradecikurinkiman qampaq rurayämunqankunapita, reunionkunachömi kikiki entiendinqëkimannö parlakurinkiman y reunion ushariptinmi yachatsikamoqkunata nirinkiman imata yachatsikayämunqan gustashunqëkita. Parlakunqëkichö alli ejemplu kaptikiqa, wakinkunapis cuentatam qokuyanqa poqu cristiänu tikrëkanqëkita (1 Tim. 4:15).

17. ¿Imakunata ruranqantan juk jövinta yanapanqa Diosnintsikta maslla sirwinampaq? (2 Timoteu 2:22).

¹⁷ “Jövinkuna munayanqampita cuidakuy, y [...] alli kaqta ruranëkipaq [...] kallpachakuy” (leyi 2 Timoteu 2:22). Apostol Pablum Timoteuta consejarqan, Diosnintsikwan mas amïgu kananta mana permiteq rurëkunapita cuidakunampaq. Capazchi rurëkanqëkikunaqa mana jutsa karpis, Jehovä Diosnintsikta maslla sirwinëkita michëkäshunki. Këkunallaman pensari: ¿atska tiempupaku pukllakurlla, Internetchö imëkata rikaräkurlla o videujuëgukunata pukllakurlla kakunki? ¿Manatsuraq tsëkunata ruranëkipa rantin Jehoväta maslla sirwinëkipaq y wawqi panikunata maslla yanapanëkipaq kallpachakunkiman? Y allim kanman Diosnintsikta adoranantsik wayita altsëchö o carrïtuwan yachatsikurnin yanapakunqëkipis. Tsëkunata ruranqëkim yanapashunki Jehoväta kuyaqkunawan mas amïgu kanëkipaq y mas cargukunata chaskinëkipaq.

WAKINKUNATA YANAPARQA, KUSHISHQAM KAWAKUNKI

18. ¿Imanirtan nintsik Marcuswan Timoteu alläpa kushishqa kawakuyanqanta?

¹⁸ Marcuswan Timoteuqa mana fäcil kaptimpis, wawqi panikunata yanapayänampaqmi alläpa kallpachakuyarqan, y tsëta rurayanqampitam kushishqa kawakuyarqan (Hëch. 20:35). Marcusqa Diosnintsikpita yachatsikurmi mëtsë markakunapa viajarqan, y Jesuspa vïdampitam qellqarqan. Y Timoteunam Pabluta yanaparqan congregacionkunata patsätsiptin, y wawqi panikunatapis animarqanmi. Jehoväqa alläpam kushikurqan Marcuswan Timoteu llapan puëdiyanqanmannö yanapakuyanqampita.

19. ¿Imanirtan jövinkunaqa Pablu consejakunqanta cäsukuyänan, y tsëta cäsukurqa imanötan kawakuyanqa?

¹⁹ ¿Imatataq yachakunki Timoteupaq Pablu qellqanqan cartakunapita? Timoteuta Pablu alläpa kuyanqanta, qamtapis Jehovä alläpa kuyashunqëkita y kushishqa kawakunëkita munanqantam. Tsëmi Pablu consejakunqankunata cäsukunëki y wawqi panikunata yanapanëkipaqmi kallpachakunëki. Tsëkunata rurarqa, kanan tiempuchömi kushishqa kawakunki y shamoq tiempuchönam ‘rasumpa alli kawëta’ chaskinki (1 Tim. 6:18, 19).