Estudiantikita yanapë Jehoväta sirwita decidinampaq

1, 2. (1) ¿Imanirtan wakin estudiantikunaqa Jehoväpa testïgun këta decidita mantsapakuyan? (2) ¿Imatataq këchö yachakushun?

¿QAMQA fäcil-llaku decidirqëki Jehoväpa testïgun kanëkipaq? Manachi. Capazchi mantsapakurqëki trabajaq mayikikuna, familiëkikuna o amïguykikuna chikiyäshunëkipaq kaqta. O Diosnintsik mandakunqannö kawëta mana puëdinëkipaq kaqtachi pensarqëki. Tsëkunapa pasashqa karqa, allichi entiendinki Bibliata yachakuykaqkuna Jehoväpa testïgun kayänampaq decidita mantsapakuyanqanta.

² Jesusqa musyarqanmi, tsënö mantsapakurninqa Jehoväta sirwiyänampaq decidita mana puëdiyänampaq kaqta (Mat. 13:20-22). Tsënö kayanqanta musyëkarpis, Jesusqa manam qateqninkunata yanapëta dejarqantsu. Jesusnö rurarqa, noqantsikpis estudiantikunatam yanapëta puëdishun 1) Jehoväta sirwinanta ima michëkanqanta cuentata qokuyänampaq, 2) Jehoväta maslla kuyayänampaq, 3) Jehoväta mas puntaman churayänampaq y 4) mantsayanqan kaqkunata venciyänampaq. ¿Imanötan Jesus ruranqannö estudiantikunata yanapashwan? ¿Imanötan Kushishqa kawakushun neq libruwan yanapashwan Jehoväpa testïgun kayänampaq?

ESTUDIANTIKITA YANAPË JEHOVÄTA SIRWINANTA IMA MICHËKANQANTA CUENTATA QOKUNAMPAQ

3. ¿Imanir-raq Nicodëmuqa Jesuspa qateqnin këta mantsarqan?

³ Nicodëmuqa judïukunapa gobernadorninmi karqan. Y Jesus yachatsikur qallanqampita joqta killakunanö pasariptinllam cuentata qokurqan Jesusqa Diospa Akrashqan kanqanta, peru qateqnin këtaqa mantsapakurqanmi (Juan 3:1, 2). Pëqa “judïukunata mantsarmi” Jesuswan pakëllapa parlanampaq decidirqan (Juan 7:13; 12:42). Capazchi pensarqan Jesuspa qateqnin tikrarqa, cargunta perdinampaq kaqta.a

4. ¿Imatataq Nicodëmuta Jesus entienditsirqan?

⁴ Nicodëmuqa Moises qellqanqan Leyta alli musyarpis, imata rurananta Jehovä shuyaranqanta entienditsiyänantam wanarqan. ¿Imanötan Jesus yanaparqan? Pëqa yanapanampaqmi tiemputa rakirqan, y hasta paqaspa parlayänampaqpis listum këkarqan. Y clärum entienditsirqan jutsankunapita arrepentikur-raq, yakuchö bautizakur-raq y Teyta Diospa Tsurinman markäkur-raq o yärakur-raq qateqnin këta puëdinampaq kaqta (Juan 3:5, 14-21).

5. ¿Imanötan juk estudiantita yanapashwan Jehoväpa sirweqnin tikranampaq?

⁵ Biblia ninqankunata alli musyarpis, capazchi juk estudianti cuentata qokunmantsu Jehoväpa sirweqnin tikrananta imakuna michëkanqanta. Capazchi alläpa trabajëkanman o Testïgu kananta familiankuna munayanmantsu. Tsëqa, ¿imanötan Jesusnö yanapankiman? Mas tiemputam rakinëki. Capaz imallatapis mikuyänëkipaq o parquipa pasyaq ëwayänëkipaq invitarinkiman. Tsë hörakunachömi mas tranquïlu sientikur, imakunapa pasëkanqanta willarishunki. Tsënam yanaparinkiman imakunachö cambiukunata ruranan pishinqanta, y yarpätsinëkim qamta kushitsishunëkipa rantin Jehoväta kuyarnin tsë cambiukunata ruranampaq.

6. ¿Imanötan juk estudiantita yanapankiman cambiukunata ruranampaq? (1 Corintius 16:13).

⁶ Juk estudianti Biblia ninqankunata cumplinampaqqa, puntataqa segürum kanan mandakunqankunata cumplinampaq kikin Jehovä yanapanampaq kaqta (leyi 1 Corintius 16:13). ¿Imanötan yanapankiman? Këllaman pensarishun: juk alli profesorqa manam alumnunkunata imata rurayänampaq kaqllatatsu yachatsin, sinöqa rurëta puëdiyänampaq kaqta següru kayänampaqmi pacienciawan yanapan. Tsë alli profesornömi qampis kanëki. Manam imata rurananta Jehovä munanqanllatatsu yachatsinëki, sinöqa cambiukunata rurayaptin Jehovä yanapanampaq kaqman confiakuyänampaqmi yanapanëki. ¿Peru ima mastataq rurankiman estudiantikita yanapanëkipaq?

ESTUDIANTIKITA YANAPË JEHOVÄ DIOSTA LLAPAN SHONQUNWAN KUYANAMPAQ

7. ¿Imanötan Jesusqa nunakunata yachatsirqan Jehoväta maslla kuyayänampaq?

⁷ ¿Imatan Jesuspa qateqninkunata yanapanman karqan Jehovä mandakunqankunata cumpliyänampaq? Jehoväta kuyayanqanmi. Tsëtam Jesusqa musyarqan, tsëmi qateqninkunata seguïdu yanaparqan Jehovä Diosnintsikta maslla kuyayänampaq. Këllaman pensarishun: juk kutim nirqan Teyta Jehoväqa wamrankunata allikunata qaraq teytanö kanqanta (Mat. 7:9-11). Tsënöllam cuentarqan wayimpita ëwakoq tsurin kutiptin alläpa kushishqa chaskeq papänö Jehovä kanqanta (Lüc. 15:20-24). Jesusta wiyëkaq wakin nunakunapaqqa, capazchi papäninkuna kuyakoqtsu kayarqan. Peru Jehovä alläpa kuyakoq kanqanta entiendiratsiptin y llapan nunakunatapis alläpa kuyanqanta yacharatsiptinqa, alläpachi kushikuyarqan.

8. ¿Imanötan estudiantikita yanapankiman Jehoväta mas kuyanampaq?

⁸ Qampis estudiantikitaqa Jehoväta mas kuyanampaqmi yanapëta puëdinki. Tsëpaqqa cada yachakuyanqëki höram Jehovä Diosnintsik imanö kanqanta y alläpa kuyakoq kanqanta entienditsinëki. Y noqantsikrëkur Jesus wanunqanta yachatsirna entienditsi, alläpa kuyamarnintsik Tsurin wanunanta permitinqanta (Rom. 5:8; 1 Juan 4:10). Estudiantikiqa, Jehovä Diosnintsik alläpa kuyanqanta entiendirqa, masmi Jehoväta kuyanqa (Gäl. 2:20).

9. ¿Imatan Michaelta yanaparqan cambiukunata ruranampaq?

⁹ Indonesia nacionpita Michael pasanqanta rikärishun. Pëqa wamrallaraq këkarmi Bibliapita yachakurqan, peru manam bautizakurqantsu. Y 18 watayoq këkarmi camionta manejar trabajanampaq juk nacionta ëwakurqan. Tsëpita tiempuwannam casakunampaq Indonesiata kutirqan, y tsëchömi juk warmi wamran yurirqan, y Michaelqa juk nacionchömi trabajar sïguirqan. Peru tiempuwannam warminwan wamranqa Bibliapita yachakur qallëkuyarqan y cambiukunata rurayarqan. Y Michaelqa mamänin wanukushqa kaptinmi, markanta yapë kutirqan papäninta cuidanampaq, y tsëchömi Bibliapita yapë estudiar qallëkurqan. Kushishqa kawakushun neq librupa 27 kaq yachatsikuyninchö këkarnam “Maslla yachakushun” neqchö, Jesus wanunqampaq yachakunqan shonqunyaq chärirqan. Noqantsikrëkur Jesus wanunqanta rikarnin Jehovä alläpa llakikunqanman pensarmi Michaelqa waqarirqan. Tsëmi agradecikurnin cambiukunata rurarqan y bautizakurqan.

JEHOVÄTA MAS PUNTAMAN CHURAYÄNAMPAQ YACHATSI

10. ¿Imanötan Jesusqa qateqninkunata entienditsirqan Diospa kaqta mas puntaman churayänampaq? (Lücas 5:5-11; dibüjuta rikäri).

¹⁰ Jesuspa qateqninkunaqa rasllam cuentata qokuriyarqan Jesusqa Diospa Akrashqan kanqanta, peru Diosnintsikpita yachatsikuyta puntaman churëtaqa manam entiendiyarqantsu. Pëdrutawan Andrestaqa juk tiempupana qateqninkuna këkäyaptinmi, Jesusqa invitarqan imëkankunatapis dejëkur llapan tiempunkunawan yachatsikuyänampaq (Mat. 4:18, 19). Pëkunaqa Juanwan y Santiäguwanmi pescador kayaq y allim ganayaq (Mar. 1:16-20). Pëdruwan Andresqa Jesuspa qateqnin kayänanrëkur trabäjunkunata dejarqa, capazchi familiankuna mana faltapakunampaq patsätsipakuyarqan. Peru ¿imatan yanaparqan Diospa kaqta mas puntaman churayänampaq? Lücas librum willakun juk milagruta Jesus ruranqanta, tsëwanchi Jesus entienditsirqan Jehoväpa kaqta puntaman churayaptinqa, wanayanqankuna mana faltanampaq kaqta (leyi Lücas 5:5-11).

11. ¿Imanötan estudiantintsikta yanapashwan Jehoväman maslla markäkunampaq o yärakunampaq?

¹¹ Noqantsikqa manam Jesusnötsu milagruta rurëta puëdintsik, peru estudiantintsiktaqa willarishwanmi Jehoväpa kaqta puntaman churaqkunata imanö bendicinqanta. Capaz willarishwan estudiantiraq këkashqa reunionkunaman ëwanapaq Jehovä imanö yanapamanqantsikta. Capazchi patronnintsik nimarqantsik mas hörakuna trabajanantsikpaq, peru noqantsikqa reunionnintsikman ëwanantsikrëkur mas hörakuna trabajëta mana puëdinapaq kaqta nirqantsik. Y tsë cambiukunata rurarishqa Jehovä imanö yanapamanqantsikta y pëman mas markäkunapaq o yärakunapaq yanapamanqantsiktam willarishwan.

12. (1) ¿Imanirtan wawqi panikunata invitashwan estudiantintsikkunata yachatsina hörapaq? (2) ¿Imanö mastan estudiantikunata yanapashwan Jehoväpa kaqta puntaman churayänampaq?

¹² Tsënöllam estudiantintsiktaqa yanapanqa wawqi panikunata estudiuman invitanqantsik. Pëkunam willarita puëdiyanqa Jehoväta sirwiyänampaq imakunata rurashqa kayanqanta. Capaz nirishwan Jehoväpita imanö yachakuyanqanta y Jehoväpa kaqta puntaman churayänampaq imakunata rurashqa kayanqanta cuentariyänampaq. Tsënöllam alli kanman estudiantintsikkunawan videukunata rikänapaq tiemputa rakinqantsik. Tsëpaqqa, capaz rikärishwan Kushishqa kawakushun neq libruchö “Maslla yachakushun” o “Masta yachakuy” neqchö yarqamoq videukunata. Këllaman pensarishun: 37 kaq yachatsikuychömi Wananqantsikkunataqa Jehovämi qomäshun neq videu yurimun. Tsë videuta rikäratsirmi rikanqan consëjukunata entiendiratsishwan.

ESTUDIANTIKITA YANAPË MANA MANTSAKUNAMPAQ

13. ¿Imanötan Jesusqa qateqninkunata yanaparqan mana mantsapakuyänampaq?

¹³ Jesusqa atska kutim qateqninkunata nirqan nunakuna o hasta familiankunapis chikiyänampaq kaqta (Mat. 5:11; 10:22, 36). Wanukunampaqna këkarnam nirqan, hasta wanutsita munayänampaq kaqta (Mat. 24:9; Juan 15:20; 16:2). Tsënöllam consejarqan yachatsikur sïguiyänampaqqa, piwampis mana discutiyänampaq, y imata rurarpis o imata parlayänan kaptimpis alli cuidakuyänampaq.

14. ¿Imanötan estudiantikunata yanapashwan nunakuna mana alli tratayaptin imata rurayänampaq kaqta musyayänampaq? (2 Timoteu 3:12).

¹⁴ Noqantsikpis Jesusnömi estudiantikunataqa puntallapitana yachatsinantsik nunakuna chikiyaptin mana mantsakäyänampaq. Tsëpaqqa capazchi alli yacharatsishwan trabäjuchöpis o amïgunkunawan o familiankunawan këkarpis imatapis alli pensëkur rurayänampaq o parlayänampaq (leyi 2 Timoteu 3:12). Capazchi wakin trabajaq mayinkunaqa Biblia ninqannö imatapis ruraptin burlakuyanqa. O familiankunapis capazchi Biblia ninqanmannö kawar qallaptin mana allikunata parlayanqa o rimayanqa. Tsëmi estudiantikunataqa puntallapitana alli yachatsinantsik nunakuna mana alli tratayaptin imata rurayänampaq o imata niyänampaqpis listu këkäyänampaq.

15. Juk estudiantita familiankuna chikir qallayaptinqa, ¿imanötan yanapashwan?

¹⁵ Juk estudiantita familian chikir qallaptinqa, imanir chikiyanqanta musyanampaqmi yanapanantsik. ¿Familiankunaqa Testïgukuna engañëkäyanqantatsuraq pensayan? ¿O Testïgukunata chikirllatsuraq michäkuyan? Tsëkunam Jesustapis pasarqan. Hasta wakin familiankunam pensayarqan löcu tikrakurishqa kanqanta (Mar. 3:21; Juan 7:5). Estudiantikitam yanapanëki pacienciakoq kanampaq y llapan familiankunatapis respëtuwan parlapänampaq.

16. ¿Imanötan juk estudiantita yanapashwan familiankunata respëtuwan parlapänampaq?

¹⁶ Capazchi estudiantipa familianqa imakunaman creinqampita musyëta munanqa. Tsëqa estudiantitam nirishwan juk kuti parlayanqanllachö llapan yachakunqankunata mana ninampaq. Tsëta ruraptinqa, mana entiendirmi yapëchöqa parlëta munayanqanatsu. Tsëmi estudiantitaqa ninantsik ichik ichiklla parlapänampaq. Tsëmi familiankunaqa Bibliapita masllata musyëta munar yapëchöpis parlakuyta munayanqa (Col. 4:6). Tsënöllam familiankunata ninman jw.org päginaman yëkuyänampaq. Tsëchömi Testïgukunapita masllata musyëta munarqa, publicacionkunata kikinkuna leyita puëdiyanqa.

17. ¿Imakunawantan estudiantikita yanapankiman Testïgukunapaq tapupäyaptin contestëta yachanampaq? (Fötuta rikäri).

¹⁷ Estudiantikitaqa jw.org päginachö, “Jehoväpa testïgunkunapaq musyëta munayanqan” neqwampis yanaparita puëdinkim. Tsëta alli yachakurmi familiankuna o trabajaq mayinkuna tapupäyaptin shumaq contestëta puëdinqa (2 Tim. 2:24, 25). Y Kushishqa kawakushun neq librupa cada yachatsikuynimpa ushananchömi “Wakin ima niyanqan” yurimun. Tsë niyanqankunapa respuestanta kikin parlakunqanmannö alli yachakunampaq y ensayanampaqmi puëdinqëkimannö yanapanëki. Alli yachakushqa karmi creinqankunapita jukkuna tapupäyaptin o musyëta munayaptinqa, mana mantsapakuypa parlakuyta puëdinqa.

18. ¿Imanötan estudiantikita animankiman wawqi panikunawan yachatsikoq yarqunampaq? (Mateu 10:27).

¹⁸ Jesusmi qateqninkunata nirqan alli noticiakunata llapan nunakunata yachatsiyänampaq (leyi Mateu 10:27). Juk estudianti yachakur qallarllana yachakunqankunapita nunakunata parlaparqa, Jehovä imanö yanapanqanta rikarmi Jehoväman confiakuyta yachakunqa. ¿Y imanötan estudiantikitaqa animankiman wawqi panikunawan yachatsikoq yarqunampaq? Congregacionchö campäñapaq willakayämuptinqa o Jesus wanunqanta yarpänapaq reunionman invitakunapaq willakayämuptinqa, tsëpitam parlapärinkiman y nirinkimanmi wawqi panikunawan yachatsikoq yarqunampaq imakunata ruranampaq kaqta. Entiendiratsi campäña kaptin yachatsikuy mas fäcil-lla kanqanta. Tsënöllam publicador kanampaqqa yanapanqa reunionkunachö demostracionkunata ruranampaq apuntakunqampis. Tsëkunam yanapanqa creinqankunapita mana mantsapakuypa parlakunampaq.

ESTUDIANTIKITA MUSYATSI PËMAN CONFIAKUNQËKITA

19. ¿Imanötan Jesusqa rikätsikurqan qateqninkunaman confiakunqanta, y imanötan noqantsikpis pënölla rurashwan?

¹⁹ Jesusqa manaraq wanur y ciëluta manaraq kutikurmi qateqninkunata nirqan pëkunawan juntu yapë kanampaq kaqta. Tsë hörachöqa qateqninkunaqa manam entiendiyarqantsu ciëluta ëwanampaq kaqta parlapëkanqanta. Peru mana entiendiyanqanta musyëkarpis Jesusqa manam, mana entiendiyanqan kaqmantsu yarparäkurqan, tsëpa rantinqa Diosnintsikta llapan shonqunkunawan kuyayanqantam masqa valorarqan (Juan 14:1-5, 8). Jesusqa musyarqanmi wakin yachatsinqankunataqa o ciëluchö kawayänampaq kaqkunata yachatsinqantaqa tiempu pasaptinraq entiendiyänampaq kaqta (Juan 16:12). Noqantsikpis Jesusnömi estudiantintsikkunaman confiakunantsik y Jehoväta sirwita munayanqantam valoranantsik.

20. ¿Imanötan Maläui nacionpita juk pani rikätsikurqan estudiantinman confiakunqanta?

²⁰ Estudiantikuna alli kaqkunata rurëta munayanqanmanmi confiakunantsik. Pensarishun Maläui nacionpita Chifundu jutiyoq panintsikta pasanqanta. Pëqa Alinafe jutiyoq catölica shipashtam Bibliapita yachëkätsirqan. Y Kushishqa kawakushun neq librupa 14 kaq yachatsikuyninta yachakuykarmi kënö tapurirqan: “Diosta adoranapaqqa, ¿allitsuraq kanman santukunata utilizanqantsik?”. Tsënam Alinafeqa “¡Tsëqa kikïpitam munarqa utilicëta puëdïmi!” nir cölerashqa contestarqan. Tsënö contestaptinmi Chifunduqa pensarirqan Bibliapita yachakuyta manana munanampaq kaqta. Peru santukunata adorë mana alli kanqanta imëllapis entiendinampaq kaqman confiakurmi pacienciawan yachatsir sïguirqan. Y tsëpita juk ishkë killakunatanam Kushishqa kawakushun neq librupa 34 kaq yachatsikuyninta yachakuyarqan. Y tsëchö tapukuy ninqannömi kënö tapurirqan: “¿Imanötan Jehoväpita yachakuykanqëki yanapëkäshunki?”. Chifundum kënö willakun: “Alinafeqa shumaqmi parlakamurqan y Biblia ninqannölla Testïgukuna imatapis rurayanqantam nirqan”. Y tsëpita ichik tiempu pasariptinmi, Alinafeqa santukunata adorëta dejarirqan y bautizakurqan.

21. ¿Imanötan estudiantikunata yanapashwan Jehoväta sirwita decidiyänampaq?

²¹ Sirweqnin kayänampaq Diosnintsik yanapanqanta musyarpis, noqantsikpis estudiantikunataqa Jehoväta sirwiyänampaqmi yanapëta puëdintsik (1 Cor. 3:7). Manam imakunata rurayänanta Jehovä munanqanllatatsu yachatsintsik, sinöqa Jehoväta mas kuyayänampaq, Jehoväpa kaqta mas puntaman churayänampaq y mana allikunapa pasarnin Jehoväman confiakuyänampaqmi yanapantsik. Estudiantikunaqa pëkunaman confiakunqantsikta cuentata qokurqa, segürum kayanqa Jehoväta sirwita puëdiyanqanta.