“Kikin Teyta Jehovämi [...] pelyanqa”

1999 watachömi, Franciachö gobiernuqa tsë nacionchö këkaq sucursalta exigirqan 1993 a 1996 watakunachö chaskiyanqan donacionkunapita impuestuta pagakuyänampaq. Tsëmi juiciuchö kayarqä, peru juiciuchöqa perdiyarqämi y apelarpis yapëmi perdiyarqä. Tsëmi Franciachö gobiernuqa 4 millönes 500 mil euruta o 6 millönes 300 mil dölarta sucursalpa cuentanchö këkaqta duëñutsakuyarqan. Tsënam Tribunal Europeo nishqanman ëwayarqä tsë asuntuta rikäyänampaq. Peru tsëchö trabajaq juezkunaqa, imatapis manaraq decidirmi niyarqan Franciachö gobiernupaq trabajaq abogädukunawan juk acuerduman chäyänäpaq, y tsë reunionchöqa Tribunal Europeo cortichö trabajaq warmim kanan karqan.

Noqakunaqa tsë warmipaq pensayarqä gobiernu mañakunqan impuestuta wakinllatapis pagakuyänäpaq obligayämänampaq kaqtam, tsënöpa tsë problëma arreglakänampaq. Peru noqakunaqa decidishqanam kayarqä ni ichikllatapis mana pagakuyänäpaq. Tsëta rurarqa, Biblia ninqampa contrannam rurëkäyäman karqan. Wawqi panikunaqa manam gobiernuta pagayänäpaqtsu qellëninkunata churakuyashqa kayarqan, sinöqa Diospa Gobiernumpita yachatsikunapaqmi (Mat. 22:21). Peru Tribunal Europeo ninqanta cäsukurmi Franciachö gobiernupaq trabajaq abogädukunawan parlayänäpaq juntakäyarqä.

Tsë reunionpaqqa juntakäyarqä Tribunal Europeo cortipa juk shumaq sälanchömi. Y pensayanqänöllam tsë warmiqa niyämarqan Francia gobiernu mañakunqan impuestuta wakinllatapis pagayänäpaq. Tsënö niyämaptinnam noqakunaqa kënö niyarqä: “Franciapa gobiernunqa cuentäkunapitam qechuyämashqana o qochiyämashqana cuatru millon y mediu euruta. ¿Tsëta musyarqëkiku?”.

Tsë warmiqa manam musyanaqtsu, tsëmi alläpa cölerakurqan. Y Francia gobiernupa abogädunkuna rasumpa kanqanta niriyaptinmi qayapar usharqan, y tsëllachömi reunion usharirqan. Tsëchömi cuentata qokuyarqä tsë juiciuchöqa Jehovä yanapëkäyämanqanta. ¡Pasakunqanqa mana creipaqmi karqan! Tsë reunionpitaqa alläpa kushishqam yarquyarqä.

Y 2011 wata 30 de juniuchömi Tribunal Europeo cortiqa favornintsik yarqurqan. Y Franciachö gobiernutam nirqan Testïgukunata impuestuta mana cobranampaq y qechunqan qellëtapis interesyoqta kutitsinampaq. Tsë kutichö juiciuta ganayanqämi Francia nacionchö wawqi panikunata kananyaq yanapëkan. Tribunal Europeo cortichö trabajaq warmita tapuriyanqäqa, Goliatpa peqanchö o umanchö hundikaq ruminömi karqan; tsëwanmi juiciuta ganariyarqä. Davidmi Goliat-ta nirqan ‘Teyta Jehovä pëkunawan pelyanampaq’ kaqta (1 Sam. 17:45-47).

Peru manam tsë kutillachötsu juiciutaqa ganarquntsik. Alläpa puëdeq religiösukuna y polïticukuna michäkuykäyaptimpis, 70 nacionkunachömi 1.225 juiciukunata ganarquntsik, y wakin juiciukunataqa llapan nacionkunapa problëmankunata rikaq cortichömi ganarquntsik. Tsë gananqantsik juiciukunam derëchuntsikkunata välitsin religionnö reqishqa kanantsikpaq y libri yachatsikunantsikpaq. Tsënöllam himnu nacionalta mana cantanapaq, bandërata mana saludanapaq y yawarta mana churakunapaq yanapamantsik.

Peru noqaqa Estädus Unïduschömi Jehoväpa testïgunkunapa principal oficïnankunachö trabajarqä. Peru tsëchö këkarqa, ¿imanöpatan Euröpachö Testïgukunata defendeq abogädukunawan trabajar qallëkurqä?

PAPÄNÏKUNAM JEHOVÄTA KUYANÄPAQ YACHATSIYÄMARQAN

Papänï Georgewan mamänï Lucilleqa Galaad Escuëlapa 12 kaq cläsinmanmi ëwayarqan, y 1956 watachömi Etiopïa nacionchö Diospita yachatsikur yanapakuyarqan; tsëchömi noqapis yurikurqä. Y Biblia willakunqan Felïpiman pensëkurmi Philip nirir jutï churayämarqan (Hëch. 21:8). Peru 1957 watachöqa, Etiopïachö gobiernuqa manam Testïgukuna yachatsikuyänanta permitirqannatsu. Tsë witsanqa wamrallaran karqä, peru yarpämi reunionkunaman y yachatsikoqpis pakëllapa ëwayanqäta. Tsë rurëqa, ¡noqataqa gustamaqmi! Y 1960 watachömi Etiopïa nacionpita qarqayämarqan.

Tsëmi Estädus Unïduschö Kansas niyanqanchö këkaq Wichita markata ëwakuyarqä. Papänïkunaqa manam Diosnintsikpita yachatsikuyta dejayarqantsu; kushishqa yachatsikuyanqanqa alläpam yanapakoq. Pëkunaqa Jehoväpita yachakuytam alläpa gustayaq. Tsëmi noqata, mayor kaq panï Judyta y menor kaq wawqï Leslietapis Jehoväta kuyayänäpaq yachatsiyämarqan. Pëkunapis Etiopïa nacionchömi yurikuyarqan. Noqaqa 13 watayoq këkarmi bautizakurqä, y tsëpita kima watallatam Perü nacionchö Arequipa markaman ëwakuyarqä. Tsëchöqa Diosnintsikpita yachatsikoqkunata alläpam wanayaq.

Perü nacionchö këkäyaptïnam 1974 watachö 18 watayoq këkaptï, noqata y chusku wawqikunata precursor especial kayänäpaq churayämarqan. Y Testïgukuna mana kayanqan markakunachö yachatsikuyänäpaqmi cordillëra këkanqan lädupa mandayämarqan. Tsëchömi quechuata y aimarata parlaq nunakunata Diosnintsikpita yachatsiyarqä. Viajayanqä cärrullachömi punuyaq kayä, y tsë cärrükunataqa kuyarmi Arca niyaq kayä. Quechuata y aimarata parlaq nunakunatam Bibliawan yachatsiyarqä waktsa këpis, qeshyapis y wanuypis manana kanampaq kaqta Jehovä änikunqanta (Apoc. 21:3, 4). Y mëtsikaqmi Bibliapita yachakur qallëkuyarqan.

PRINCIPAL OFICÏNACHÖ YANAPAKUNÄPAQ INVITAYÄMAN

1977 watachömi Albert Schroeder jutiyoq wawqi Perü nacionta shamurqan. Pëqa Jehoväpa Testïgunkunata Pushaqkunapitam karqan. Pëmi animamarqan Jehoväpa testïgunkunapa principal oficïnanchö yanapakunäpaq solicitudta llenanäpaq, tsëmi llenarqä. Y tsëpita ichik tiempullatanam 1977 wata 17 de juniuchö Brooklynchö këkaq Betelchö yanapakunäpaq invitayämarqan. Tsëchöqa chusku watapam limpiëzachö y mantenimientuchö yanapakurqä.

1978 wata juniu killachönam Elizabeth Avallone jutiyoq panita juk asamblëachö reqirqä. Tsë asamblëaqa atska nacionkunapaqmi karqan y Luisianachö këkaq Nueva Orleans markachömi rurakarqan. Pëpa papäninkunapis noqapa papänïkunanöllam yachatsikuytaqa alläpa gustayaq. Elizabethqa chusku watapanam precursöra regular kanaq y llapan tiempunwan yanapakuytam munanaq. Pëwan mas reqinakurmi mas kuyanakuyarqä. Tsëmi 1979 wata 20 de octubrichö casakuyarqä y juntum Betelchö yanapakur sïguiyarqä.

Casakuskirqa Brooklyn Spanish congregacionchömi kayarqä, tsëchö wawqi panikunaqa alläpam kuyayämaq. Y mas congregacionkunachöpis yanapakuyarqömi. Tsë congregacionkunachö wawqi panikunapis alläpam kuyayämaq y Betelchö yanapakur sïguiyänäpaqmi animayämaq. Alläpam agradecikü papänïkuna edäna kayaptin cuidayaptï amïgükuna y familiäkuna alläpa yanapayämanqampita.

LEY ASUNTUTA RIKAQKUNACHÖ YANAPAKÜ

1982 watachömi Betelchö Ley Asuntuta Rikaqkunachö yanapakunäpaq niyämarqan. Tsëpita kima wata pasariptinmi abogädupaq estudianäpaq y tïtuluta jorqanäpaq niyämarqan. Tsëchö estudiëkarmi cuentata qokurqä Testïgukuna juiciukunata ganayanqankunaqa Estädus Unïduschö y juk nacionkunachöpis nunakuna derëchunkunata välitsiyänampaq alläpa yanapakunqanta. Tsëchöqa allipam estudiayaq kayä.

1986 watachönam 30 watayoq këkaptï Betelchö Ley Asuntuta Rikaqkunachö diriginäpaq niyämarqan. Jövinllaraq këkaptïpis noqaman confiakuyanqantaqa alläpam agradecikurqä, peru musyarqämi imëka sasa o aja asuntukunata atiendinanqa mana fäcil kanampaq kaqta.

1988 watachömi abogädu kanäpaq tïtuluta jipirqä, peru manam cuentata qokurqätsu universidächö estudiarnin Jehoväpa kaqkunata alläpa manana valorëkanqäta. Universidächö karqa, wakinkunapita mas reqishqa këtam munantsik y mas yachanqantsiktam pensantsik. Peru warmï Elizabethmi ichikllapa ichikllapa yanapamarqan Jehoväpa kaqkunata mas puntaman churanäpaq. Kananqa clärum musyä imëkata yachanqantsikpitapis Jehoväpa amïgun kë, pëta kuyë y sirweqnin kë mas alli kanqanta.

LEY NINQAMPITA VÄLIKURMI ALLI NOTICIAKUNATA DEFENDIYÄ

Tïtulüta jipiskirqa, masllanam Diospa Gobiernunta defendirnin juiciukunachö yanapakur qallëkurqä. Tsëchö trabajë alläpa shumaq kaptimpis, imëka cambiukuna kaptinmi höraqa fäciltsu karqan. 1990 watachömi Betelchö Ley Asuntuta Rikaqkunata niyämarqan publicacionnintsikkunapita manana cobrakunapaq juk documentuta alistayänäpaq. Tsëpita witsëpaqa Jehoväpa testïgunkunaqa manam publicacionkunapita cobrakuyänannatsu karqan. Tsë cambiu kariptinqa, Betelchö y congregacionkunachöpis mas mënusllanam trabäju karqan y autoridäkunapis mananam impuestuta pagakunantsikpaq exigikuyarqannatsu. Tsë cambiu kariptinmi wakinkunaqa pensayarqan publicacionkunapita manana cobrakurqa, qellëninnaq quedarinapaq kaqta y yachatsikuyta manana puëdinapaq kaqta. Peru rasumpa kaqchöqa, manam tsënötsu karqan. Kanan witsanqa 1990 wata witsampitapis, mas atskaq Testïgukunam kantsik y mëtsikaq nunakunam publicacionkunata grätislla chaskiyan. Clärum rikarqö Jehovä yanapamashqalla y dirigimaqnintsikkunata pë yanapaptinlla tsënö cambiukuna alli yarqunqanta (Ex. 15:2; Mat. 24:45).

Peru höraqa manam abogädukuna yachaq kayanqampitatsu o reunionkunachö alli parlapäyanqampitatsu juiciukunata ganayaq kayä, sinöqa wawqi panikuna alli portakuyanqampitam. Tsëmi pasakurqan Cüba nacionchö. 1998 watachömi Cüba nacionchö juk asamblëa rurakarqan, tsë asamblëamanmi Jehoväpa Testïgunkunata Pushaqkunapita kimaq wawqikuna warminkunawan ëwayarqan. Pëkunata alläpa kuyakoqta y respetakoqta rikarmi Cübachö autoridäkunaqa Testïgukuna polïtica asuntuman imanir mana mëtikuyanqanta entiendir qallëkuyarqan.

Peru höraqa ima asuntupis arreglakänampaqqa juiciumanran chäyaq kayä, Biblia ninqannöpis “ley ninqampita välikur alli noticiakunata” defendiyänäpaq (Filip. 1:7). Euröpachö y Corëa del Surchömi autoridäkunaqa jövin wawqikunata exigiyarqan ejercituman ëwayänampaq. Tsë autoridäkunaqa manam respetëkäyarqantsu ejercituman mana ëwayänampaq derëchunkunata. Tsënö exigikuyaptinmi Euröpachö 18 milnö wawqikuna y Corëa del Surchö 19 milpitapis mas wawqikuna carcelchö kayarqan.

Y 2011 wata 7 de juliuchömi Tribunal Europeo de Derechos Humanos cortichö wawqi Bayatyanpa cäsunta rikäyarqan y Euröpa nacionkunachö llapan autoridäkunatam niyarqan ejercituman ëwayänampa rantin juk trabäjukunachö jövinkuna trabajëta puëdiyanqanta. Y tsëpita tiempuwannam 2018 wata 28 de juniuchö Tribunal Constitucional de Corea del Sur cortichöpis tsënölla pasakurqan. Tsë juiciukunataqa ganarquntsik jövin wawqintsikkuna alli firmi tsarakuyanqampitam.

Jehoväpa testïgunkunapa principal oficïnanchö y juk sucursalkunachö trabajaq wawqikunaqa allipam trabajayan Diospa Gobiernunta defendirnin. Autoridäkuna mana kaqpita acusayaptin Jehoväpa sirweqninkunata defendirqa alläpam kushikuyä. Juiciuta ganar o mana ganarpis, autoridäkunataqa Diosnintsikpitam parlapëta puëdiyä (Mat. 10:18). Y documentukunaman churayanqä textukunatam juezkuna, autoridäkunata yanapaqkuna, periodistakuna y juk nunakunapis leyita puëdiyan. Alli shonquyoq kaqkunaqa masllam Jehoväpa testïgunkunata reqimantsik y Biblia ninqankunaman creinqantsiktam musyëta puëdiyan, y wakinqa Testïgum tikrayan.

¡GRACIAS JEHOVÄ!

40 watakunapam mëtsë nacionchö sucursalkunata yanaparqö juiciuchö kayaptin y alläpa puëdeq cortikunamanmi charqö y alläpa reqishqa autoridäkunawanmi parlarqö. Ley Asuntuchö trabajar yanapamaq wawqikunata y mëtsë sucursalkunachö Ley Asuntuta Rikar trabajaq wawqikunataqa alläpam valorä. Jehovä Diosnintsikqa allipam bendicimashqa y kushishqam sientikü.

Y warmï Elizabethqa qeshyapäkuykarpis, 45 watakunapam allipa yanapamashqa. Pëqa alläpam qeshyapäkun y kallpannaqmi sientikun. Qeshyapäkuykarpis allipa yanapamanqantaqa, ¡alläpam agradecikü!

Warmï Elizabethwanqa clärum rikäyarqö imëka juiciuchöpis Jehovä yanapamashqalla gananqantsikta. Tsëchi gobernanti Davidqa kënö nirqan: “Teyta Jehovämi sirweqninkunata kallpayoqta tikratsin” (Sal. 28:8). Y rasunmi, “kikin Teyta Jehovämi” sirweqninkunata yanaparnin pelyan.